Tỉnh Bình Thuận dok peih ngak rilo danak dak dong salih bahrau mbaok meta ban

Patui danak dak mbang nyaom ka 10, bier harei kabroi, brei panuac mbang camereip ka danak dak Hukum Pasang iek, Ủy ban Thường vụ Quốc hội hu panuac ieu khik ramik saong patagok ka pasang iek pakat huyện piah pacang caga tham nhũng, tiêu cực, taduan rahra saong langyah dom bruk khiếu nại, tố cáo. Sa bruk bahrau jeng njauk caik hatai tal, danak dak pasang iek brei klaak bruk pasang iek gam gam. Bruk klaak pasang iek gam gam meda rik daong pasiam bruk “kateik angaok gauk" ba tal ngak tapa bruk ba tabiak, kan thau lac pasang iek atau tui iek.

Harei ni (19/4) lac harei pahadar 47 thun peih paha ban Phan Thiết (Bình Thuận). Jayah ni hu tame dalam dakrai bangsa yau sa bruk hadah tanyak, dong ngak brei salih bruk mesruh song peih tabiak jalan ba tal Jayah bilan xuân thun 1975. Tui bruk rami ramik patagok labik du lịch pakat negar Mũi Né, tỉnh Bình Thuận tal thun 2025, pamong tal thun 2030, tỉnh Bình Thuận dok peih ngak rilo danak dak dong salih bahrau mbaok meta ban tasik ni. Nan lac dom danak dak: ar krong Cà; Chung cư krong Cà Ty; Labik dân cư gah merong jalan Lê Duẩn; mblang kapan haoh Phan Thiết; ramik pasiam, papraong jalan Nguyễn Đình Chiểu pambuak atah,; mbang bein Thương Chánh; takai jalan tathuak ia dom jalan dalam ban ...

Lambaok Sở Lao động – Thương binh saong Xã hội TP.HCM brei thau, peih bruk pacang caga jit COVID-19 saong dom sarak đặc thù pabak ka bruk pacang caga jit ruak… taong abih jien hu daong tui Sarak 09 di HĐND ban raya lac labaih 2.160 tỷ đồng; tui Sarak 97 lac labaih 6.523 tỷ đồng ngan haong labaih 6 triệu 5 rituh urang hu mbang tui… Min, kayua jit ruak rahtabiak sarau kadhau, dom urang caong hu daong tagok glaong jang rilo dut saong kuhria mboh dahlau nan ye ngak kan kandah tal bruk biyar jien daong.

Danak dak alin brei saoh bình halang ia di ban Cần Thơ mbang ka 1 thun 2022 dok rah tabiak meng harei 18 - 22/4 di 3 huyện Cờ Đỏ, Thới Lai, Vĩnh Thạnh. mBan Thường vụ Thành đoàn pambuak bruk haong dom huyện Đoàn hu peih bruk brei 11.241 bình halang ia, yaok bình yaom 1 trieu meteh, abih tih yaom jiak 17 tỷ đồng. Ni lac , bruk ngak piah rik dong patrun phát thải khí nhà kính song pacang biến đổi khí hậu di ban Cần Thơ song di bhum taneran krong Cửu Long

Bier harei 18/4, di xã Hòa An, huyện Krông Pắk, tỉnh Đắk Lắk rahtabiak sa bruk mblung ia ngak ka 3 anek saih metai. 3 adei kumei njauk bala jeng ndik tapui thun 2012, bac haong gauk di tal 4B, sang bac Tiểu học Trần Phú, dalam nyaom 5 anek saih jak gauk tabiak binek Bà Tỵ di palei Thăng Tiến 2, xã Hòa An main. Dalam tuk main di labik ia, oh patuak 3 adei blait takai labuh trun lubang ia dalam. Mboh yau nan, 2 adei daok viek nduac nao ieu manuac praong mai daong, min tuk urang praong mai daong sraong tagok ye tuk nan 3 adei metai bloh.

Rajaei Mỹ di Tổng thống Mỹ Biden oh hu adat patagok bruk pacap cuk pataih pacang mbaok angaok dom radaih nao mai công cộng, hadei di tuk sa thẩm phán di bang Florida tabiak panuac lac, sarak dui atah 14 bilan pagam tal bruk pacap cuk pataih pacang mbaok lac suan hukum. Dom urang njom Covid-19 dok tagok di Mỹ. Tui kuhria mboh, yaok harei hu 36 ribau 251 urang njom bahrau song 460 urang metai kayua Covid-19 di negar ni.

Jit sởi daok tamuh khang di Áp-ga-ni-xtan. Dalam tuk rajaei Taliban tame mek Áp-ga-ni-xtan, dom kadung jien daong njauk cakak abih, bruk khủng hoảng y tế pambuak tal jit sởi di pak ini dak harei dak trak damak. Meng di akaok thun tal ini, hu takik di nyu 16 ribau ranaih njom ruak sởi saong labaih 130 ranaih metai kayua ruak ini di Áp-ga-ni-xtan. Gah Y tế dunya krieh bilan 3 meng blaoh hu peih tabiak danak dak klauk vắc-xin piah klauk ka 1 trieu 2 rituh ranaih mala umo 5 thun di taneh ia ini.

Giáo hoàng Francis harei kabroi (18/4) hu payua panuac anit ranam song sron mbon di tuk uan harei lễ phục sinh tal dom urang công giáo, abih di nyu nan lac dom urang ranaih umo. Jeng dalam harei kabroi, sa var lễ ngan song rilo bruk salam uan lễ phục sinh 2022 mbang camereip hu mai veik Nhà Trắng hadei di 2 thun jit prong. Tổng thống Mỹ puac sa tapuk uranaih gam song dom uranaih mai hu mbaok. Lễ Phục Sinh bhian hu mong lac sa dalam dom harei lễ prong abih dalam thun di urang tui Cơ Đốc giáo./.

Urang lang: Thu Thao – Hani Pha – 19/04