Hu peih ngak di harei 24/10 

Harei ni (24/10), mbang nyaom ka 4, Quốc hội mbang 15 yam tapa adit ngak bruk  ka  2 song rilo asal kadha prong.Njauk caik hatai lac, Quốc hội caik  2 harei ginum biai ka bruk peih ngak jalan  patagok kinh tế-xã hội thun 2022 song ba tabiak jalan ngak ka thun  2023; bruk peih ngak kadung jien karja thun 2022, kuhria kadung đầu tư công thun  2023…Dom mbang nyaom ni hu papar sap papar – papar binguk tapak piah cử tri song bhap bini tui iek.

Melam bloh, di Hà Nội, hu peih jao giải Bruk pakacah vak kadha ka khik caga jalan sahneng di Đảng mbang ka 2. Bruk pakacah ngak jeng prein pambak tabiak praong dalam hệ thống chính trị di taneh ia haong labaih 116 rabau kadha vak payua mai pakacah. mBan peih bruk hu jao 12 giải A; 20 giải B; 30 giải C haong 40 giải khuyến khích. Tui ong Nguyễn Xuân Thắng - Yam ndok Học viện Chính trị quốc gia Hồ Chí Minh, dom kadha vak hu ngak jeng jalan lý luận saong thực tiễn praong piah patui bruk taong yaom, pataom iek veik bruk khik caga jalan sahneng di Đảng, mesruh pacang dom bruk suan, ba tabiak jalan ngak njauk haong bruk di anak meta piah paglaong siam lagaih, jak jeng bruk chính trị praong ini.

Mintri  Y tế brei thau, harei  23/10 dom urang njauk COVID-19 trun biak beir dok  158 urang bahrau hu pathau khan. Ni lac harei hu urang ruak bahrau bier abih  kuhria meng harei 15/6/2021. Urak ni, Việt Nam hu jiak 11,5 triệu urang ruak COVID-19, dang ka 13 dalam  230 negar song  bhum taneh; hu 43.159 urang metai, dang dhi  26 ka urang metai kayua COVID-19 di dunya. Dom urang njom bahrau song urang ruak trak trun bier dalam tuk vak ni, dom chuyên gia ndom lac njauk tabiak panuac lac  tamat tukvak jit praong COVID-19, kayua urak ni dok hu rilo jit ruak njauk pacang caga dahlau yau pandiak tabiak darah, adenovirus, tangin takai cambuia ... song anak tal mbuan si  hu jit cúm, sởi.

Dalam dom bruk salam uan pahadar 27 thun harei Du lịch Bình Thuận (24/10/1995 - 24/10/2022), labaih 1.300 vận động viên hu mbaok tame Harei pataom radaih juak pakat negar di Bình Thuận rah tabak meng harei 23/10 di ban Phan Thiết, dalam nan hu dom vận động viên mai meng Campuchia. Tui Sở Ilamu Thể thao du lich tỉnh, ini lac tuk yaih khan dom inem krung sajarah, dom labik gheih mekre, dom ilamu di Bình Thuận tal tuai damuai atah jaik, peih tabiak jalan siam ka bruk pachreih pabak du lịch, saong jeng lac peih tabiak jalan praong salam uan dom bruk praong jaik hu peih tabiak di akaok thun 2023, peih akaok ka thun Du lịch pakat negar “Bình Thuận – Pataom hijao”.

Labaih 3 thun ni mai, 24 boh sang di palei  An Thạnh 1, xã An Hải, huyện Ninh Phước, tỉnh Ninh Thuận dok dalam boh sang  khut khat trak, kayua bruk peih ngak  ar krong Dinh rah tabiak . UBND xã An Hải, huyện Ninh Phước brei thau hu pasang iek,  ngak  dự toán pok tagok dom pakat piah dong ka mik va. Tui Chi cục Thủy lợi tỉnh Ninh Thuận – po buh jien ngak danak dak , jabat hu bayar ka labaih  40 sang njauk kan kandah. 24 sang dok veik, ka oh njauk hatai ka bruk dong brei ni. Harei  4/10, dom jabat njauk gauk hu dong 1,2 tỷ đồng ka bhap bini dalam quý 4.

Akaok Mintyri Quốc phòng Nga Xéc-gây Xô-gu (Sergei Shoigu) harei 23/10 hu rilo mbang ndom biai tapa phone haong Akaok Mintri Quốc phòng Mỹ, Anh saong Prang piah ndom biai nao mai ka bruk di Ucraina. Dalam mbang ndom biai tapa phone haong akaok Mintri Mỹ Loy Ớt-tin (Lloyd Austin), dua gah ndom tal makna biak praong di bruk khik talei taom gaok dalam tuk daok rah tabiak bruk meriak gauk urak ini. Dalam tuk nan, akaok Mintri Quốc phòng Anh tabiak panuac brei thau lac oh ngak brei tagok jang bruk meriak gauk, ndom lac Ucraina saong Nga brei duah jalan saong Anh halan hatian daong. Mintri Quốc phòng Pháp jeng brei thau hatai caong hu sa jalan sron mbon ka bruk meriak gauk di Ucraina.

Dom mon hadei di tuk Thủ tướng Viktor Orban hu panuac sinya khik ramik bruk tani tanat  kinh tế saong patrun  jien pandar năng lượng ka boh sang dalam tuk  EU laik tame srau kadau kinh tế trak, harei  23/10, hu labaih  80.000 urang trun jalan cagar veik thủ tướng Orban song rajaei Hungary. Ni lac mbang trun jalan prong di abih kuhria  meng di thun  2014 mbiah tal ni. Dahlau di nan, yaok ribau gru pato padeih bruk di grauk labik dalam Hungary piah cagar bruk bayar jien bilan beir . Tui yaok pataom bahrau di abih, gru pato di Hungary hu jien bilan bier di abih dalam 38 taneh ia thành viên di kapul pambuak bruk song patagok Kinh tế.

Bruk gah jihad taong tame khách sạn Ta-oa-can (Tawakal) daok di ban pabah lamnge Kít-may-u (Kismayu), gah meraong Somalia harei 23/10 ngak brei 9 urang metai saong 47 urang njauk rambus. Rilo urang gaok bala lac anek saih kayua labik rah tabiak bruk taong tame nan nyu daok jaik sa sang bac. Urak ii gah an ninh pametai hu taong abih dom menuac taong tame nan. Kapul An-Sa-báp (al-Shabaab) hu talei pambuak bruk haong gah khủng bố dunya Al-Qaeda hu panuac khan lac drei ngak bruk nan, pamaong tame dom urang jakar ngak praong daok hu mbaok di khách sạn nan./.

Urang lang: Hanipha- Mousaphuong- 24/10