Rilo anek nao bac veik njauk ruak hu patagok 

“Dut saong tukvak ini thun blaoh, dom doanh nghiệp tame saong gilac veik darak pasa hu tagok, phun jien buh tame ngak meng kadung jien kanja, jien mek tame kadung kanja, bruk pablei salih rai pandap panda saong raok tuai dunya jeng hu tagok” - Ini lac hu thau tapa yaok pataom dalam bilan 2 saong 2 bilan akaok thun ini bahrau hu Tổng Cục yaok pataom, Mintri Kế hoạch saong Đầu tư brei thau, tapa nan mboh hu dom bruk siam lagaih dalam kham marat ngak pasiam bruk patagok di dalam taneh ia. Bilan 2, bruk ngak kong tui kuhria trun 12,4% dut saong bilan dahlau, kayua laik tame tukvak padeih Tết Nguyên đán. Min, dut saong tukvak ini thun blaoh, bruk ini hu siam lagaih ngan haong tanut tagok lac 8,5%; kuhria gam 2 bilan, hu tagok 5,4%. 

Harei ni (28/2), ban raya HCM yam tame adit  ka  3 pato bac tapak ka anek saih  tong abih pakat bac meng  mầm non, tiểu học, THCS song  THPT. Dalam tuk vak urang njom  Covid-19 oh padeih patagok, bruk gam khik ramik salamat ka anek saih gam ngak siam bruk pato bac jeng bruk kan kandah prong ngan saong dom sang bac. Lambaok  Sở pato megru ban raya kakei, meyah rah tabiak jit ruak kan kandah(yau anek saih hu taom gaok gauk pambak praong ralo, anek saih hu ruak dahlau dalam rup, labaih kilo, anek saih oh ngak tui bruk klauk vaccine Covid-19…), Mban tacei jalan pacang caga jit sang bac atau quận, huyện tong yaom bruk song batabiak bruk pato bac ka nyu lagaih.

Piah pacang hu bruk biến đổi khí hậu saong ia tasik tagok, tỉnh Tiền Giang meda patui viek brei buh jien tame ngak binek pacang ia mbak di ribaong ia Xáng Đồng Tâm, daok lac  ribaong Nguyễn Tấn Thành, di xã Bình Đức, huyện Châu Thành, Tiền Giang. Ni lac danak dak pacang ia mbak, khik piah ia taba praong abih pak ini. Tui nan, binek pacang ia mbak di ribaong Xáng Đồng Tâm tui kuhria meda hu peih ngak di puac thun ini, ngan haong jien buh tame labaih 300 tỷ đồng.  Tuk ia mbak di mangaok kraong Tiền njom tame dalam, binek meda kariek piah pacang ia mbak, khik ia taba piah pabak ia  pandar,  pala drak di yaok ribau baoh sang daok di tỉnh Tiền Giang saong Long An.

Tui bruk batabiak bilan  tabau thun 2022 ni, huyện Phụng Hiệp, tỉnh Hậu Giang patrun pajaih  3.000ha, trun  1.700ha dut song mbang tabau dahlau. Min, urak ni, mikva dalam huyện bahrau trun pajaih hu  2.400ha, sumu  80% bruk batabiak.  Ong Trần Văn Tuấn- Akaok jabat Ngak nong song patagok palei pala  huyện Phụng Hiệp, brei thau: Rilo bruk thun ni mblang taneh pala tabau oh mek hu yau bruk batabiak, kayua urak ni dalam  tỉnh tok hu sa sang mac saradang di Công ty cổ phần tabau saradang  Cần Thơ (Casuco) ngak bruk  min sang mac saradang ni patrun bruk  blei tabau di taneh pala dalam tỉnh, yau nan ye, urang haduh hatai meda gaok kan kandah dalam bruk pablei tabau.  

Dom harei tapa, langik pandiak catang saong dui atah harei ngak ka Labik khik caga janih sinh cảnh Bein Cim Bạc Liêu di ban Bạc Liêu, tỉnh Bạc Liêu mbuan apui khuah gilai pakat 5, lac pakat tabung glong. Piah pacang caga khuah gilai, mban khik ramik gilai đặc dụng saong pacang caga bhum tapen tasik tỉnh Bạc Liêu hu pambuak haong kapul Khik iek gilai tinh peih bruk ramik hala phun kayau glai thu, jak ramik phun ram rah jalan, ar pacang, labik mbuan apui khuah. Kapul jeng jhul samar bruk pathau khan, jak ba dom baoh sang bhap bini daok  jaik tapen labik glai khik caga juai tame glai, oh cuh pui jaik ar gilai atau pacang jalan ia nduac tame Bein Cim. Labik khik caga janih sinh cảnh Vườn cim Bạc Liêu hu mblang taneh praong labaih 380ha, hu taduan angan lac Labik khik caga alam pakat negar.

Gah  Y tế dunya  (WHO) harei  27/2 hu panuac ieu padang sa  hành lang siam mekre  tapa Ba Lan piah pajeng dong dom pandap  y tế  hu makna praong tal Ukraine, jang yau hu panuac khan dong pabak  khí ôxy ka dom sang iek ruak  dalam negar dok takik jaik abih. Tổng yam ndoc  WHO Tedros Adhanom Ghebreyesus song yam ndoc dhar  châu Âu Hans Kluge brei thau jiak abih dom sang iek ruak meda abih pandap caga  dalam  24 tuk tal, ba tal yaok ribau urang mbuan metai. Urak ni WHO dok kham merat ba bình ôxy tame mai meng dom labik jaik taphia. Dom urang jakar nan ndom lac, bruk dong pabak brei hu "pajeng ba salamat, dalam nan brei pajeng ba meng logistics tapa Ba Lan".

Dalam mbang ngak bruk  pablei salih page ini 28/2, yaom manyek Brent tasik Bắc tukvak jao di bilan 4/2022 hu tukvak tagok 7% dut saong yaom kariek pambang dahlau di nan, tagok tal tanut 105 USD/thùng. Dahlau di nan, manyek Brent saong WTI dalam mbang pablei salih di harei 24/2 lac mbang camriep hu tagok labaih 100 USD/thùng  kuhria meng thun 2014, hadei di tuk Nga peih bruk ba bol lin tame  Ukraine. Min, yaom manyek samar trun veik, tuk Nhà Trắng brei thau  bruk taong phat camriep tame Nga bo oh pakauk bruk pajeng ba năng lượng.

Tui  mintri  Kinh tế song Kế hoạch Cuba, meng bilan 9/2021 tal ni hu brei adat ngak bruk ka  92 doanh nghiệp biak sit, sit song mbiah, ba tong abih doanh nghiệp hu batabiak tagok  2.177 jabat. Cuba mbang camereip hu ba adat ka dom  doanh nghiệp janih ni dalam bilan  9 thun bloh, piah tagok bruk salih birau song peih prong dom bruk ngak mbang kinh tế./.

Urang lang: Hanipha- Thu Thảo -28/2