Dalam dom bruk di Harei pataom pakacah papar sap dalam taneh ia mbang 16 thun 2024 kayua Rayo sap ndem VN pambuak haong UBND tỉnh Thanh Hóa peih ngak, dah page ini (8/7) di ban Thanh Hóa, peih mbaok dhi Chung khảo bruk pakacah Papar sap tapak. Dhi pakacah hu mbaok di 33 labik, lac dom Rayo papar sap – papar binguk dom tinh, ban; dom gah di rayo sap ndem VN,… Ong Trần Minh Hùng, Phaok taong yam ndok rayo sap ndem VN, Phaok akaok Kapul Giám khảo dhi Chung khảo ndom lac, papar sap tapak ndung bak suan yava di raidiuk pamaong tal manuac sia, kak kajap haong manuac sia, tok hu papar sap tapak ye kol drei meng patagok hu bruk hu mbaok di urang pang, patagok bruk ndom biai nao mai piah ngak jeng prein dui pachreih manuac sia mai haong papar sap.

Pagaiy mesup ini (8/7) di ban Cần Thơ, Mintri ngak nong saong Patagok palei pala peih Ginum biai so ket bruk ngak iek danak dak 1 triệu hecta padai chất lượng glaong, tathuak nerak biar. Tui Mintri Ngak nong saong Patagok palei pala, hadei di tukvak pala iek, mboh hu kein laba tuk năng suất tagaok, takik tathuak nerak sang kreih camin saong hu doanh nghiệp blei veik abih haong yaom glaong jang yaom darak pasar meng 200 tal 300 đồng sa kg padai. Bruk praong abih lac trun hu tathuak nerak sang kreih camin, patagok kein laba. Dom chuyên gia ndom lac, tapa ini kol drei brei pambak tabiak bruk ngak ini di dom tỉnh, ban dalam bhum ĐBSCL saong abih Việt Nam, ngak hu bruk caong khin di urang pala padai lac hu raidiuk siam mekre jang, jien mek tame glaong jang saong hu rik daong tame bruk di dunya lac pacang BĐKH.

Tỉnh Trà Vinh urak ini hu labaih 4.400 urang jakar lac urang Khmer, meblah jaik 21% urang jakar, vien chuc dalam tinh. Tukvak tapa, di pak ini tuk halei jeng caik hatai pato pasram paglaong ilamo ka urang jakar lac urang Khmer. Hu brei bruk lagaih haong ilamo, njauk haong bruk ngak, urang jakar lac urang Khmer daok patagok bruk ngak di drei, rik daong biak rilo tame bruk cak rok patagok kinh te xa hoi di puk palei. Tapa nan brei mboh dom kham marat dalam bruk pato pakai saong brei bruk ka urang jakar, daong paglaong prein ngak bruk saong ba mbuan lagaih ka bruk cak rok khang kajap di tỉnh.

Anak tal, tỉnh Cà Mau brei patagok bruk padang dom kapul peih bruk pablei salih langiu taneh ia, daong dom doanh nghiệp pathau khan, yaih khan thaot binguk, pandap panda piah ka doanh nghiệp duah tuai damuai, peih praong darak pasar, patagok kim ngạch xuất khẩu; sangka patagok pablei salih điện tử saong peih bruk pablei tapa negar langiu, yaih khan angan je, daong ka doanh nghiệp hu mbaok tame dom sàn pablei salih điện tử praong. Dalam 6 bilan akaok thun ini, kim ngạch xuất khẩu di Cà Mau hu labaih 604 triệu USD, samu meteh bruk ba tabiak. Min bruk pablei tabiak negar langiu daok gaok kan kandah, mai meng bruk mesruh gauk Nga - Ukraine saong bruk taong gauk di Trung Đông ba tal yaom pajeng ba tui jalan tasik tagok glaong.

Piah paglaong bruk pacang khuah padam khuah di dom baoh sang glaong rilo tal, rilo sang, dom harei tapa Công an TP. Hồ Chí Minh gam gam peih rilo mbang pasang iek. Tapa nan mboh hu 60.500 labik mbuan khuah patuh glaong, dalam nan hu 3.670 sang daok pambuak haong pablei salih. Anak tal, Công an TP. Hồ Chí Minh daok brei pasang iek dom bruk pacang khuah padam khuah, brei padeih ngak dom labik oh ngak ginup dom bruk pacang khuah padam khuah.

Pandiak khang daok me-om bak taneh ia Nhật Bản, tuk mbang camereip abih dalam thun ini, langik pandiak tal 40 độ C. Gah tui iek bruk langik tasik negar Nhật Bản hu tabiak panuac brei thau ka bruk mbuan abih prein kayua langik pandiak di jaik abih dom pulao kaoh, kakei bhap bini takik tabiak langiu tuk harei saong pandar jamriak la-an daok dalam sang. Tui kuhria mboh dahlau, langik meng bilan 7 tal bilan 9 di Nhật Bản glaong jang yaok thun, hu tuk pandiak meda yam tapa bilan hè pandiak glong abih dalam thun 2023..

Jabat kuhria mboh dahlau bruk langik tasik negar Mỹ jeng kuhria mboh lac sa mbang langik pandiak khang yau apui daok hu mboh di labik Bờ Tây saong pambak praong tal rilo ban dalam adit ini tuk nhiet do tui kuhria meng 38-43 độ C. Kanja hu kakei rahra manyum rilo ia, plaih tabiak langik pandiak saong caik hatai haong dom bruk mbuan ba tal mebuk pandiak. Langik pandiak saong thu lagu ba tal dom mbang khuah glai di bang California, ngak ka yaok rabau menuac njauk panduan nao daok di labik karei, ngak kan kandah tal rilo bein pala nho.

Dom urang roh duah di Viện Sinh thái saong Địa lý Tân Cương dalam Viện Hàn lâm Khoa học Trung Quốc hu duah mboh sa janih njei sa mạc meda diuk hu dalam kan kandah angaok sao Hỏa. Bruk nan jeng hu makna lac janih njei sa mạc ini meda jeng janih diuk hu di baoh taneh camereip abih hu ba tagaok sao Hỏa. Dom duah mboh ini hu jhul atah jang bruk hu thau di anek menuac ka prein diukrai di kayau patau dalam labik biak thu lagu kan kandah./.