Harei pathi mbang ka 93 di ong Phó bảng Nguyễn Sinh Sắc – Ame di Chủ tịch Hồ Chí Minh bahrau hu peih tabiak di Đồng Tháp. 93 thun tapa meng di tuk ong Phó bảng Nguyễn Sinh Sắc palang lahik di bhum taneh Cao Lãnh, harei 27/10 saka ia bilan yaok thun hu jeng harei hu makna praong di bhap bini daok pak ini. Thun ini, dom kapul, manuac urang hu rik tame Kadung jien pachreih bac Nguyễn Sinh Sắc hu labaih 12,4 tỷ đồng piah jao jien bac ka anek saih gaok kan kandah. Tukvak anak tal, di Labik inem mek sajarah Nguyễn Sinh Sắc daok brei ngak ka nyu salah dom danak dak piah njauk haong angan lac inem krung ilamo pakat negar di thun 2025. 

Sang bac Đại học Trà Vinh peih bruk tame thun bac 2022-2023 saong brei thau Sarak brei padang sang bac Kinh tế, Luật di Sang bac Đại học Trà Vinh. Urak ini Sang bac Đại học Trà Vinh pato pakai labaih 30 gah bac megru ilamu hadei di ĐH, jaik 60 gah ilamu ĐH, 33 gah ilamu cao đẳng saong rilo danak dak pato pakai katut panak harei karei ka labaih 20.000 urang bac mai meng dom  tỉnh bhum ĐBSCL saong anek saih Campuchia tapa bac.

Dah page ini (21/11), Tòa án bhap bini ban Hà Nội hu peih mbang lang yah camereip Akaok Mintri Y tế dahlau deih ong Cao Minh Quang saong 8 urang karei karei dalam bruk oh ngak njauk bruk di drei ba tal palai pajoa labaih 3,8 triệu USD blei pandap panda, jru tavao piah pacang caga ruak cúm A(H5N1) rahtabiak di Mintri Y tế saong Công ty Cổ phần Jru tavao Cửu Long. Tui kuhria mbang lang yah meda ngak bruk dalam 5 harei.

Dua bilan tapa, yaom pabe, pabo dalam tỉnh Ninh Thuận gam gam trun, bruk pablei ralow pabe, pabo jeng gaok kan kandah. Urak ini, yaom pabe pablei di var ro meng 90.000- 105.000 đồng/kg, yaom ralow pabo meng 80.000 - 95.000 đồng/kg, trun 15.000- 20.000 đồng/kg duk haong 1 bilan dahlau. Urak ini, Ninh Thuận hu tapon pabe, pabo labaih 250.000 drei, ralow pabe Ninh Thuận hu Cục Sở hữu trí tuệ - Bộ Khoa học & Công nghệ brei harak Bảo hộ nhãn hiệu angan “pabe Ninh Thuận”; ralow pabo hu brei harak bảo hộ Chỉ dẫn địa lý.

Meng akaok thun 2022 tal urak ini, Công an tỉnh Bình Dương hu taduan labaih 200 hu khau brei thau ka kol tội phạm pachot pagait meblah mek drap ar. Pambuak tame bruk jia di bhap bini meblah mek drap ar pambuak tal bruk ma-in hue. Hu rilo bruk khat lahik tagok tal jaik 30 tỷ đồng, hu urang main lahik tal 2 tỷ đồng. Jabat công an kakei bhap bini njauk duah thau cambaih laih dom adat hukum, abih di nyu nan lac Sarak 19 thun 2019 di Rajaei ka họ, hụi, biêu, phường. Langiu di nan, salih ka main hua, bhap bini njauk nao payua jien di gilang paraik piah patak pataom atau  masaiy phun jien.

Nyaom biai mbang ka 27 dom gah hu mbaok tame Công ước khung di Liên hiệp quốc ka biến đổi khí hậu (COP27) bahrau brei tapa thỏa thuận khí hậu tổng quát, hu dom kham merat praong di dunya piah patrun patakik tanut tagok nhiệt độ baoh taneh di tanut 1,5 độ C duk haong tukvak dahlau di ngak kong. Mbang nyaom jeng brei tapa bruk padang Kadung jien khat lahik, tui nan, dom taneh ia kaya meda hu bruk tathuak khí thải praong brei bayar ka dom khat lahik bo dom taneh ia daok cakrok daok ndua naong kayua dom bruk meng langik tasik oh siam lagaih. 

 Jabat Năng lượng Nguyên tử Dunya (IAEA) brei thau, hu labaih mbang pháo kích dalam 2 harei tapa ngak magei sang mac điện hạt nhân praong abih di châu Âu Zaporizhzhia, daok dalam pasang iek di Nga, mbuan rahrabiak bala hạt nhân. Taong Yam ndok Jabat Nguyên tử Dunya, ong Rafael Grossi jeng huac lac, bruk patuh rahtabiak di labik sang mac điện hạt nhân praong di châu Âu lac bruk oh taduan hu. 

Jaik 9.000 urang di cư suan hukum njauk pacang veik di labik tapen negar Séc saong Slovakia kuhria meng bilan 9, jaik abih lac mai meng Syria. Dalam tuk bruk di cư suan hukum tagok rilo dalam 2 bilan tapa, Cộng hòa Séc brei dui atah tukvak pasang iek di labik tapen negar haong Slovakia tal kreh bilan 12. Ủy ban châu Âu ieu klaak taong abih dom jalan pasang iek bhum tapen negar di dua taneh ia, gam haong nan hu panuac ndom lac, dom jalan pasang iek di anak meta tok meda hu pandar dalam dom bruk praong./.