Di mbang nyaom di HĐND TP.HCM dah page ini (11/10), dom urang di HĐND Ban raya hu pok ong Bùi Xuân Cường, akaok mban khik ramik jalan pasei đô thị TP.HCM ngak Phaok akaok UBND TP.HCM, tukvak 2021 - 2026. Brei thau ka bruk ngak di drei, ong Bùi Xuân Cường ndom lac meda ngak pasiam dom cuang kandah, tavak tavaiy dalam khik ramik saong patagok đô thị urak ini, pataom prein tame dom gah yau ye sarak dalam bruk buh jien tame padang ngak, quy hoạch bruk khik ramik patagok đô thị, padang ngak, khik ramik taneh riya, kaya pandap saong alam môi trường, jalan mbak nao mai pajeng ba, pabak ia, tathuak ia, khik ramik sang danaok…langiu di nan, HĐND TP.HCM jeng njauk gauk brei padeih ngak HĐND TP.HCM mbang X, tukvak 2021 - 2026 ngan haong ong Nguyễn Thành Phong, akaok UBND TP.HCM dahlau deih.

UBND tỉnh Đồng Nai bahrau peih bruk pok meyaom anek saih, sinh viên urang bangsa takik daok di dalam tỉnh. Rilo thun tapa, meng hu bruk sangka di Đảng, Karja haong dom sarak karei, bruk pato megru bhum bangsa takik di tỉnh Đồng Nai hu tagok biak rio. Dom sarak ka anek saih, sinh viên bhum bangsa takik daok hu peih ngak, daok hu ngak pasiam. Dom sarak ini hu rik daong praong dalam bruk paglaong bac da-a ka bhap bini, pato pakai menuac ngak, caga ka bhum bangsa takik.

UBND tỉnh Hậu Giang bahrau njauk gauk brei peih ngak adat blei gilai du lịch nduac di mangaok ribaong Xà No. UBND tỉnh hu ieu kakei dom jabat chức năng sahneng kuhria jalan peih ngak, khik ramik ka nyu lagaih, ba tame ngak di dalam thun ini. Gilai du lịch hu maong lac kadha praong di bruk du lịch di pak ini, rik daong mayaih khan thaot binguk bhum taneh saong anek menuac Hậu Giang tal dom ayut sahabat, tuai damuai dalam saong langiu taneh ia. Gam tui di nan, daong  parilo janih dịch vụ du lịch, abih di nyu nan lac bruk cak rok patagok du lịch di jalan ia.

Urak ini tỉnh Tiền Giang hu 119 pandap hu taong yaom, brei harak chứng nhận OCOP. Piah daong dom pandap OCOP peih praong darak pasar pablei pandap, Tiền Giang hu peih ngak rilo jalan, dalam nan hu yaih khan, ba  pandap OCOP tame dom siêu thị; daong padang dom labik yaih khan saong pablei pandap di dom puk palei. Tal urak ini, Tiền Giang hu labaih 70% pandap OCOP hu mbaok dalam dom siêu thị saong dom cửa hàng tiện ích. Langiu di nan, tỉnh hu daong jaik 600 triệu đồng piah padang 8 labik parang iek saong pablei pandap OCOP.

UBND tỉnh Trà Vinh bahrau tabiak bruk samar drah bala glut jaleih dom ar pacang kraong Tân Dinh saong kraong Bông Bót di xã Tam Ngãi, huyện Cầu Kè, atah 170m. Bruk glut jaleih rahtabiak kayua kan kandah di biến đổi khí hậu, glut jaleih oh lac dalam bilan hajan, ribuk bo daok rahtabiak dalam bilan thu. Dom thun tapa, di ar pacang kraong Tân Dinh saong kraong Bông Bót hu rahtabiak bruk glut jaleih di rilo labik, bhap bini eng drei pacang caga, ngak pasiam meng cừ tràm, ngak ar pacang caga. Min, jaik di ini, bruk glut jaleih rahtabiak dak harei dak kan kandah, mbuan ngak pacah ar pacang, mbuan ba tal metai lahik saong khut khat drap ar, sang danaok di bhap bini.

Bruk lạm phát yaok thun di Lào tagok meng 30,01% dalam bilan 8, tagok 34%  di bilan 9. Ini lac tanut lạm phát glaong abih hu mboh dalam 22 thun tapa di Lào. Makna lac kayua suy thoái kinh tế dunya, bruk meriak gauk di dom taneh ia praong saong bruk tamuh tabiak jit praong COVID-19 nyu ngak brei klaih klaoh dom bruk ngak mbang kinh tế saong ngak kan kandah tapak tal Lào. Lạm phát nyu tagok biak rilo meng thun blaoh saong Lào urak ini, lac taneh ia hu bruk lạm phát glaong abih di Đông Nam Á.

Trung Quốc daok kham marat pacang cakak bruk tamuh veik di jit ruak COVID-19, dalam tuk dom urang njom ruak di dalam taneh ia daok tagok di tanut glaong di abih dalam jaik 2 bilan tapa. Dalam harei 9/10 dalam negar hu mboh veik 1.878 urang njauk ruak COVID-19. Dom urang ruak hu tagok glaong hadei di mbang padeih lễ Quốc khánh kayua rilo urang nao du lịch mai gilac taneh ia. rilo tinh, ban hu pacang cakak kayua hu rilo urang njom ruak. Thượng Hải saong Bắc Kinh hu peih dom adat pasang iek jit ruak biak catang ngan haong dom tuai mai gilac taneh ia hadei di tuk padeih lễ.

Pandiak bhang khang abih di bang California - negar Mỹ, mbuan ngak brei khat lahik trak ka bilan baoh traong ndaiy. Bang California, Mỹ ngak tabiak labaih 30% dom traong ndaiy tame pa-op di dunya, min di bilan 8 meng bloh, Mintri ngak nong Mỹ brei patrun bruk kuhria mboh dahlau di thun ini trun daok labaih 10 triệu tấn, kayua kurang ia saong nhiệt độ glaong ngak brei baoh traong ndaiy trun khang. Langiu di nan, pandiak bhang daok ngak kan kandah tal yaok ratuh mẫu njam hijao saong chà là hu paik di bilan brak thun ini./.

Urang lang: M.P & Thu Thảo – 11/10/2022