Urak ni hu labaih 80% anek saih trúng tuyển khan lac tame bac

Hệ thống bruk tame bac tui jalan online song anek saih trúng tuyển di Mintri pato megru hu kreih veik. Tui nan mboh lac, urak ni hu labaih 80% anek saih trúng tuyển khan lac tame bac, dalam tuk nan dom thun dahlau bruk ni rilo di abih lac 63%, daok thun 2021 hu labaih 55,3% anek saih trúng tuyển tame bac. Bruk ni brei mboh bruk lọc ảo lac hu makna biak prong, dong ka dom labik pato pakai patrun hu thí sinh ảo meng dom jalan palih ruah song di dom labik pato pakai; anek saih hu palih ruah hatia khin njauk gah song sang bac drei khin, bo oh dok njauk kateik greik brei tame bac avar.

Dah page ini (30/9), UBND TP.HCM peih mbaok Adit pachreih tui bruk bac taa tal luac rai di thun 2022. Ngan haong kadha: “Jhul samar bruk salih số pabak ka bruk bac taa tal luac rai hadei di jit ruak COVID-19”, TP.HCM daok brei jhul khang danak dak bac taa praong dalam, di dom rai rahra. Dalam nan, sangka paglaong akaok saneng di bhap bini ka makna di bruk salih số ngan haong bruk bac taa tal luac rai, paglaong bruk ngak saong ieu pataom hu bruk sanka, hu mbaok tame di dom pakat karja, dom gah, dom kapul nyaom, kalup kapul dalam bruk pandar dom asal kadha công nghệ piah parilo dom jalan saong pandap panda bac taa tal luac rai, pabak hu hatai caong bac taa di bhap bini hadei di jit praong COVID-19.

Dalam dom harei jiak di ni, li u that di Tiền Giang dok trun yaom. Urak ni, li uthat pajaih Mã Lai tok pablei hu meng 2.000 đồng tal 3.000 đồng/sa boh (trun jiak meteh dut song bilan dahlau ), gaok mai hu rilo labik oh pablei hu. Dalam tuk nan, li u thu di tanut mala 20 ribau đồng/ 12 boh. Di tỉnh Tiền Giang hu labaih 20.000 ha bein pala phun li u dalam nan hu labaih 60% mblang taneh phun li umek ia. Jiak di ni, tuk thanh long trun yaom, urang nong salih tapa pala li u ngak ka taneh phun ni dak harei dak peih prong.

Jit ruak pandiak tabiak darah urak ini daok tamuh tabiak di rilo labik dalam tỉnh Ninh Thuận. Yaok adit hu 120 urang ruak pandiak tabiak darah, tagok tal 5 mbang dut saong tukvak ini thun dahlau. Huyện Thuận Nam lac sa dalam dom labik tamuh jit ruak pandiak tabiak darah, kayua hu biak rilo phun kayau, danao ia kadaong veik saong dom labik padang ia ngak tamuh anek loăng quăng. Kuhria tal urak ini, dalam tỉnh Ninh Thuận hu jaik 900 urang ruak pandiak tabiak darah, dalam nan hu rilo urang ruak trak, njauk ba tagok sang iek ruak praong.

Harei ni, ia ndik rah tabiak di dom tỉnh dalam bhum taneran krong CL. Kayua njauk tuk vak ribuk ka 4, rilo tỉnh, ban dalam bhum hu dom mbang hajan prong, hangin khang ngak dauh padai song njam patam. Di tỉnh Vĩnh Long, ia ndik ngak dauh di rilo jalan dalam ban ngak kan kandah ka bruk nao mai, dok dang di bhap bini. Gam song ia ndik ia sua, hajan khang song ribuk dom harei tapa ngak ka 10 boh sang di bhap bini par tabung song labaih 2 ha phun mbang boh njauk jaoh jaleih

Thượng viện Mỹ bahrau brei tapa danak dak hukum pabak kadung jien kanja katut harei piah plaih bruk rajaei njauk kareih pabah mbang. Tui hukum ini, rajaei meda hu pabak kadung jien kanja di anak meta piah hu ngak bruk tal kreih bilan 12. Bruk ini meda daong ka dom urang padang ngak meda hu veik tukvak piah ginum biai ka sa sanya pabak kadung jien ka rajaei thun jien padai 2023 hu peih tabiak meng harei paguh (1/10). Danak dak Hukum ini hu labaih 12 tỷ đô la jien daong an ninh saong jien padai ka Ukraine jang yau kadung jien karja trun manieng bala di langik tasik tui panuac ieu di Nhà Trắng.

Cảnh sát Afghanistan brei thau, takik di abih 19 urang metai song 29 urang njauk rambuac dalam mbang tong bom pametai rup eng, mong tame sa labik pato pakai di ban ine Kabul di Afghanistan tuk mesup 30/9. Tui cảnh sát pak ni, bruk nan rah tabiak tuk anrk saih dok kuhria caga hu mbaok tame pakacah di 1 labik pato pakai, labik nan rilo meng lac urang Islam gah Shiite dalam bhap bini urang Hazara. Utrang Hazaras tui gah Shiite bhian lac labik njauk kol IS taong tame. Thun bloh, hu takik di abih 85 anek saih kamei metai song 300 urang njauk rambuac tuk 3 boh mbom patuh jiak sa sang bac.

Xưởng ngak jien di Hoàng gia Anh bahrau ni hu ba tabiak brei thau thaot binguk camriep abih di jien xu hu rup thaot di Patao Charles III. Bruk njauk ndem di đồng xu bahrau lac di mbaok likuk di đồng 5 bảng Anh hu 2 blah thaot bahrau di Nữ hoàng Elizabeth 2 cagar gauk, dalam tuk mbaok likuk di đồng 50 pence thaot di Vương miện saong huy hiệu Hoàng gia. Tui kuhria, dom jien bahrau ini meda hu ba tame pandar di kreih thun 2024./.

Urang lang: Thu Thao & Hani Pha – 30/09