Hoi dong bhap bini Ban raya HCM meda brei pasang iek, brei tapa sarak njuak hatai haong jalan rami ramik đơn vị hanh chinh pakat xã vaktu 2023-2030 di Ban raya. Tui jalan rami ramik hu Mentri Nội vụ njauk hatai, TPHCM oh salih karei ka dom quan, huyen bo brei ba tame 80 phuong di 10 quan. Mbiah tal urak ini, UB bhap bini TPHCM hu ngak salah baloh bruk mek panuac cử tri 80 phường njauk ba tame piah padang 38 phường birau.

Akaok UBND tỉnh Bình Phước bahrau pok Harak meyaom brei ka 112 sang urang ngak nong hu angan dalam bruk urang nong pala drak, ngak mbang naih joi; pok angan 15 janih kaya nong praong di Bình Phước mbang ka 3… Tui Kapul urang ngak nong tỉnh Bình Phước, bruk urang nong pakacah gauk pala drak, ngak mbang naih joi, jum pataom, daong gauk ngak kaya mada saong patrun kan kathaot khang kajap daok hu cakrok, mboh hu rilo kreih camin urang nong hadah krah dalam pala drak, ngak mbang naih joi, sahneng duah bharau, khang hatai pandar ilamu kong nghe bahrau tame bruk pala drak, ngak mbang, pablei salih. 

Sa labik di jalan Tắc Thủ - Đá Bạc, nao gah Inem krung sajarah pakat Negar Hòn Đá Bạc, tỉnh Cà Mau njuak khut trak, hu rilo lubang dalam, radaih kan nao mai. Mbaok jalan mbaih mbaoh, hu labik luk lak meng labaih 1 thun dahlau min oh hu ngak pasiam veik nan ye dak harei dak khut trak jang. Mikva rilo mbang khan tagok, abih di nyu nan lac, radaih dulich nao mai di jalan ini ralo saong kan tapa gaok rilo kan kandah. Sở Jalan mbak – Pajeng ba tỉnh Cà Mau daok kuhria ngak veik labik jalan khut ini.

Harei ilamu, Du lịch Ninh Thuận bahrau hu UBND tỉnh Ninh Thuận peih ngak meng harei 13/7 tal harei 15/7 di quận Sơn Trà, ban Đà Nẵng. Dalam dom bruk di Harei pataom, Pasak peih bruk Đầu tư, Pablei salih saong du lịch hu padang 15 gian hàng parang iek, yaih khan dom pandap OCOP, pandap ngak kong palei pala hu angan je di tỉnh pambuak haong yaih khan, brei thau ka du lịch, jalan lagaih piah buh jien tame ngak mbang saong thaot binguk palei Ninh Thuận. Tapa harei pataom, hu daong ka dom doanh nghiệp, HTX yaih khan dom kaya pandap tal urang blei pandar di ban Đà Nẵng.

Tui Rayo Kuhria mboh dahlau bruk langik tasik bhum Nam Bộ, tapa tui iek thaok taginum vệ tinh, thaot binguk rada langik tasik, labik jakala brei mboh taginum hangin daok khang tagok ngak jeng hajan, gam hangin, jakala di dom tỉnh Bình Dương, Đồng Nai, Bình Phước saong Tây Ninh (huyện Dương Minh Châu). Dalam dom mon anak tal, taginum hangin daok khang tagok saong ngak jeng hajan gam hangin, jakala klak di dom labik angaok nan, saong dak tuk dak praong saong pambak praong tal dom labik jaik nan. Hajan ralo meng 5 – 15 mm, hu labaih 15mm. Dalam hajan khang caga hangin gavang saong yuh catang.

Harei ini, Nyaom biai mbang ka 3 mBan Chấp hành Đảng Cộng sản Trung Quốc mbang ka 20 hu peih tabiak di ban ine Bắc Kinh. Nyaom biai mbang ini pataom tame roh duah dom bruk tame dalam jang piah salih bharau abih gah saong jhul patagok bruk salih bharau tui jalan di Trung Quốc. Tui kuhria mboh di dom urang ilamu, nyaom biai mbang ini meda oh ba tabiak dom jalan ngak pachreih kinh tế ndung bak samar drah bo meda ba tabiak dom sarak, dom jalan ngak di yaok gah.

Negar Mỹ saong dunya jeng daok “ pandiak” anak bruk urang tabiak mbaok piah pilih ruah pok ngak Tổng thống di Đảng Cộng hòa dalam mbang pilih ruah anak tal, lac Tổng thống dahlau diah Donal Trump njauk urang cuh phao tuk daok jak ba urang buh phieu. Sa bruk pasang iek taong abih gah hu urang jakar Mỹ samar peih ngak, haong ralo jalan sahanenghu ba tabiak. Dalam sa mbang brei panuac, Cục Điều tra Liên bang Mỹ ndom lac, biak tatuak drei ka dom mbang patuh phao di urang cuh nan; gam khan lac Thomas Matthew Crooks (umo 20 thun) mai meng bang Pennsylvania, lac urang pambuak tal bruk patuh phao nan.

Kum menuk ada daok njaom mbak di dom trang trại raong menuk ada di Australia. Ta-eng di Canberra, kum mrenuk ada daok hu mboh di menuk ada raong dalam sang. Tui dom gah chức năng Australia, kuhria meng tuk kum menuk ada tamuh tabiak di taneh ia ini di bilan 5 meng blaoh, labaih 1 triệu drei menuk, ada di dom labik raong praong hu kum njauk ba nao am cuh klaak. Bruk kurang baoh jeng hu mboh kayua rilo menuk ada raong mek baoh njauk am cuh klaak. Min biak patuah lac jaik abih dom chủng cúm lac H7 saong oh hu chủng cúm njaom mbak samar drah lac H5N1./.