Hoi ndong Bangsa di Quốc hội saong Ủy ban bangsa daok pambuak gauk peih ngak danak dak Hukum Bangsa. Bruk ini, Thường trực Hoi ndong bangsa hu padang  jalan roh duah cambaih laih. Tui nan, ba tabiak jalan roh duah njauk lang yah, ngak cambaih dom makna; ba tabiak cơ sở lý luận, jalan pambuak gauk, ba tabiak asal kadha padang ngak Hukum Bangsa; langyah dom hệ thống hukum, sarak ka bangsa tui jalan đồng bộ hóa iek tui jalan ngak di Đảng, Kanja saong Hukum negar thun 2013.

Mbang pakacah palih ruah anek saih pakat negar THPT thun 2022 - 2023 peih tabiak dalam 2 harei 24 saong 25/2. Mbang pakacah thun ini hu 68 labik tame pakacah, nan lac 63  Sở Pato megru saong 6 sang bac đại học, ngan haong labaih 4 ribau 500 anek saih tame pakacah. Mbang pakacah hu peih tabiak piah pacheih ba urang pato saong urang bac patagok bruk sahneng duah bahrau, pato joi, bac naih; rik daong salih  birau, paglong bruk pato saong bac pamong tal prein bac saong bruk siam di gah khik iek; tui nan duah hu urang bac naih gheih piah pabak bruk pato pakai, peih ngak bruk bac biak, pakacah biak bai, palih ruah hu urang naih joi biak.

Di Nyaom biai pataom iek veik 10 thun peih ngak sarak Trung ương 8 (khóa XI) saong Danak dak bruk ngak ka 26 di Tỉnh ủy (mbang XII) ka Jalan khik caga taneh ia dalam saman bahrau di tỉnh Bình Thuận, ong Nguyễn Trọng Nghĩa, Bí thư Trung ương Đảng, akaok Ban Tuyên giáo Trung ương pok mayaom saong taong yaom glaong bruk brei thau cambaih, peih ngak sarak Trung ương 8 meng danak dak bruk ngak cambaih laih. Dom bruk ka padang ngak dom jalan pacang caga di mangaok tasik, bruk đối ngoại haong dom taneh ia ayut saabat, yau ye Campuchia, Lào... jeng hu  peih ngak siam. Taphia di nan, ong Nguyễn Trọng Nghĩa caong lac: Bình Thuận njauk  maong tabiak dom labaih kurang, dom bruk ngak suan ba tal bruk dom urang jakar, urang đảng, dalam nan hu dom urang jakar ngak praong par akaok njauk duas.

Mentri Ngak nong saong Patagok palei pala saong UB bhap bini tỉnh Đồng Nai birau pablei patei that tabiak  negar langiu akaok thun 2023. Patri lac sa dalam 24 phun hu pala rilo di Đồng Nai ngan haong taneh praong 13.000 ha, ralo abih dalam taneh ia.  Ini lac janih phun mbang baoh meda patagok jeng bhum pala praong meng 400 -500 ha. Patei  di Đồng Nai hu pablei tapa dom negar yau: Trung Quốc, Hàn Quốc, Nhật Bản, Malaysia. Đồng Nai urak ini dang akok dalam negar  ka mã số  bhum pala patei hu Cục Khik caga phun pala brei mã số saong Tổng cục Hải quan Trung Quốc mbaoh tangin 30 bhum pala praong abih tih 5.669 ha, hu 39 labik papaok patei hu brei mã số.

Urak ini abih 5 jalan cáp quang tasik pambuak Internet nao dunya di Việt Nam jeng daok khut. Ini lac bruk khut praong abih bo dom gah mạng Việt Nam daok ramik ngak pasiam meng dahlau mai tal urak ini, ngak kan kandah tal chất lượng Internet di urang pandar. Dalam dom jalan cáp quang tasik daok khut, hu sa jalan lahik abih dung lượng, dom jalan karei daok ngak bruk hu sa binah. Urak ini, Mintri Thong tin saong Truyền thông daok pambuak bruk haong dom gah pabak dịch vụ Internet ba tabiak rilo jalan ngak piah pasiam veik. Tui kuhria tal kreih bilan 4, dom bruk khut ini meng hu ngak pasiam veik abih.

Rajaei Pakistan brei cakak trun jien daong saong jien nao mai ngak bruk di dom akaok mentri saong urang cố vấn piah kham patak pataom 200 tỷ rupee (sumu 766 triệu USD) di kadung jien karja yaok thun.Thủ tướng taneh ia ini hu tacei pato taong abih dom mentri lien bang, jabat rajaei brei cakak trun piah patak pataom 15% jien di karja saong caong khin dom akaok metri saong co van di drei oh taduan jien daong phu cap, radaih ô tô chiat jien saong oh pandar harak ve kapal haok chiat jien di dom mbang nao negar langiu. Taneh ia Nam Á ini daok dang anak dom bruk kurang jien ndo trak damah.

Dom tỉnh di Trung Quốc daok brei dom diuk pasang bahrau lakhah hu padeih 30 harei hu mbang jien bilan piah pachreih dam dara ngak lakhah saong ndih tapui anek. Tui Viện roh duah patagok Xã hội di Đại học Tài chính saong Kinh tế Tây Nam, dom tinh jeng daok caong ba tabiak dom sarak daong karei, pagap yau daong sang danaok saong brei ka urang ngak lac likei padeih hu jien bilan tuk diuk manek. Thun 2022 rahra Trung Quốc mbang camriep njauk patrun hadei di 6 piluh thun. Ini lac sa bruk ngak brei mboh bruk peih mbaok di sa saman patrun rahra dui atah.

Mintri Y tế Campuchia brei thau, taneh ia ini bahrau mboh sa uranaih kumei umo 11 thun metai kayua ruak cúm manuk ada H5N1. Ranaih kumei mboh pandiak 39 độ C, patuk saong pandik tarakaong meng harei 16/2. Prein yava oh siam veik, ranaih kumei hu payua tagok Sang iek ruak uranaih negar di ban ine Phnom Penh. Dom bác sĩ hu payua mẫu ruak di urang ruak tal Viện Y tế rahra pakat negar saong mboh dương tính haong virus cúm manuk ada H5N1. Hadei di nan, urang ruak metai. Cục Pasang iek jit ruak njom mbak hu ieu kakei taong abih rahra gaok manuk ada njauk ruak, metai, yaom lac manuk ada raong atau athur glai./.