Mintri pato magru hu khan brei thau đáp án dom môn pakacah trắc nghiệm dalam mbang pakacah tamat THPT thun 2023. Hu 14 đáp án dom môn pakacah trắc nghiệm dalam mbang pakacah tamat hu khan brei thau lac: Toán, Vật lý, Hoá học, Sinh học, Địa lý, Lịch sử, Giáo dục công dân, sap Anh, sap Pháp, sap Nhật, sap Trung Quốc, sap Hàn, sap Đức, sap Nhật. Anek saih saong amaik ame meda tame iek di mangaok Cổng khau tin online di Mintri pato magru di labik: https://moet.gov.vn atau di dom blah mbao online.

Meng harei 10/7, 2 bruk karja pambuak gauk ngak sa mbang haong gauk lac “ngak harak khai sinh, tut angan thường trú, ngak thẻ BHYT ka uraniah umo ala 6 thun" saong "ngak harak khai tử, klaak angan thường trú, daong jien ngak ndam metai" hu peih ngak dalam negar. Bruk pandar blah điện tử Harak khai sinh, Trích lục khai tử duh ka bruk pambuak gauk ngak harak hu dui katut veik tukvak ngak, trun takik bruk ngak di urang jakar tuk ngak dom harak gar nan…, daong duh siam ka bhap bini saong doanh nghiệp tui jalan ngak di Rajaei lac “Mek rahra, doanh nghiệp lac pasak piah duh pamere”.

Di paha Long Phước (phường 5, ban Bạc Liêu, tỉnh Bạc Liêu), Jabat Cảnh sát jalan mbak (Công an tỉnh Bạc Liêu) pambuak haong Giáo hội Phật giáo tỉnh peih bruk pathau khan ka Hukum jalan mbak brei ka jaik 200 ong bhik, ong car, phật tử. Bruk pathau khan piah daong ka dom ong bhik, phật tử thau cambaih jang ka hukum salamat jalan mbak; paglaong hatai ngak njauk tui hukum salamat jalan mbak di tăng ni, phật tử tuk  peih radaih, dak harei dak jeng bruk  bhian randap, jalan diukrai siam makre tuk peih radaih di labik hu rilo manuac. Dalam 6 bilan akaok thun, di Bạc Liêu rahtabiak 13 mbang bala jalan mbak, ngak ka 7 urang metai, 11 urang njauk rambuac.

Urak ini, dom urang njauk ruak pandiak tabiak darah saong takai tangin cambuai tame sang iek ruak piah taong ruak di tỉnh Đồng Nai jeng daok tagok glaong. Dalam adit bloh, dalam tỉnh hu jaik 370 urang njauk ruak pandiak tabiak darah njauk tame sang iek ruak. Meng akaok thun tal ini, dalam tỉnh hu labaih 1 rabau 800 urang njauk ruak, dalam nan hu 4 urang metai. Dom bác sĩ kakei lac, tuk mboh rup drei atau mboh uranaih pandiak glaong, handaoh rup saik, tatuak drei tuk ndih, saluah cambuai, takai, tangin… brei samar drah ba tame labik iek ruak hu angan je piah pasang iek, taong ruak, plaih caik ka ruak trak tagok.

Meng akaok thun tal urak ini, hu 122 mbang glut jaleih di 13 tinh, ban dalam ĐBSCL. Rilo baoh sang rahra daok tapen kraong, ribaong daok haduh hatai tuk bruk glut jaleih meda rahtabiak tuk halei jeng oh thau. Di An Giang, dalam 3 harei gam rahtabiak bruk glut jaleih di dom huyện Châu Phú, Thoại Sơn saong ban Long Xuyên. 6 bilan tapa, tỉnh Vĩnh Long hu 80 labik glut jaleih, ngak lahik labaih 2.400 m ar takai kraong saong ngak kan kandah tapak tal 79 baoh sang, ngak khat lahik drap ar lac labaih 7 tỷ đồng. Di Sóc Trăng, glut jaleih di bhum mala kraong Hậu rahtabiak yaok harei saong rahtabiak biak trak damak. Tỉnh Sóc Trăng hu njauk likau tagok Mintri ngak nong saong patagok palei pala langyah samar drah rilo labik njauk glut jaleih khang.

Hajan ia sua trak damak ngak kan kandah tal bruk ngak mbang nao mai di labaih 95.000 menuac saong ngak ka labaih 14.000 urang klaak sang danaok nao daok labik karei di tỉnh Hồ Nam, gah kreh negar Trung Quốc. Kuhria ta-eng dalam tỉnh ini, khat lahik tapak gah kinh tế lac jaik 575 triệu nhân dân tệ (lac labaih 79 triệu đô la Mỹ). Dom labik ia dauk khang, urak ini ia daok trun meneing. Jalan nao mai, jalan điện, ia saong thông tin liên lạc daok hu ramik ngak pasiam veik. Di dom labik rahra panduan mai daok, hu pabak brei pandap mbang, ia menyum, phui, kamo.

Kanja Hàn Quốc daok caga padang jabat pacang caga pablei salih manuac, hu brei ngak dalam 6 bilan anak tal. Jabat ini meda taduan bruk daong ba dom urang njauk bala di dom mbang pablei salih manuac, padang sa jalan ngak taong abih gah piah pacang caga bruk pablei salih manuac, daong pato magru ka dom urang njauk bala mai gilac veik haong raidiuk yaok harei tapa bruk pato bruk ngak, langyah ka adat hukum saong bảo hiểm y tế. Di bilan 1 thun ini, rajaei Hàn Quốc hu peih ngak Hukum pacang caga pablei salih manuac, dalam nan pakauk bruk bleih saleih saong taong paoh pandar ngak tapa prein manuac.

Harei 3/7, Cao ủy Liên hợp quốc ka quyền anek menuac brei thau, biến đổi khí hậu lac sa bala praong di menuac sia dunya, meda ngak ka harei hadei di anek menuac laik tame kan kathaot, eik lipa saong dom kan kandah trak damak karei. Dom bruk langik tasik oh lagaih daok ngak brei khat lahik bruk pala drak, raong glang saong hệ sinh thái, ngak ka menuac sia gaok kan kandah dalam bruk dak padang raidiuk. Dalam thun 2021 hu labaih 828 triệu menuac di dunya laik tame eik lipa. Min dalam tuk biến đổi khí hậu dak harei dak trak damak, dom menuac laik tame eik lipa, kan kathaot di harei hadei meda hu labaih 80 triệu menuac tra./.