Tui Kapul urang ngak mbao Việt Nam, hu 165 kadha báo chí gheih abih hu pilih ruah tame dhil chung khảo Jai báo chí negar mbang ka 18 thun 2023.  Meng di tuk ba tabiak bruk Jai báo chí pakat negar mbang ka 18 hu 1 ribau 905 kadha hu payua tame pakacah, dalam nan hu 1 ribau 827 kadha pabak ginup bruk pakacah. Dom kadha hu mbaok tame pakacah hu pambuak kajap haong dom asal kadha praong meng chính trị, kinh tế, ilamo. xã hội, quốc phòng, an ninh saong dom gah karei dalam raidiuk dalam taneh ia thun 2023. Akaok kapul urang ngak mbao VN, Akaok Hội đồng Jai báo chí pakat negar Lê Quốc Minh brei thau, ini lac jai thuong hu yaom glaong abih piah alin ka dom tac pham báo chí, pok mayaom dom urang vak, kapul urang vak hu kadha gheih abih yaok thun.

LĐLĐ ban sit Bến Cát, tỉnh Bình Dương bahrau tabiak mbaok Nghiệp đoàn vé số phường Mỹ Phước, piah khik caga quyền lợi saong paglaong raidiuk ka urang ngak bruk pablei vé số kiến thiết dalam tỉnh. Bruk tabiak rai di Nghiệp đoàn vé số piah daong khik caga quyền lợi saong paglaong raidiuk ka urang ngak bruk pablei vé số kiến thiết dalam tỉnh. Ini lac nghiệp đoàn ka 2 dalam tỉnh Bình Dương, hadei di Nghiệp đoàn radaih xe ôm ban sit.Bến Cát hu padang tagok di thun năm 2016. 

Yaom pandap mbang raong glang tagok gam gam, langik pandiak dui atah ngak tamuh tabiak rilo jit ruak ngak ka urang raong glang pak ĐBSCL huac khat nan ye raong takik veik. Tui rilo baoh sang raong amuk ada pak huyện Cần Giuộc, tỉnh Long An, urak ini yaom yaok mbao pandap mbang (janih 25kg) tagok, meng 280.000 tagok tal 340.000 đồng, dalam tuk yaom pablei manuk ada trun ngak ka urang raong glang khat lahik. Di Tiền Giang, hu labaih 290.000 drei pabui, min kayua jit aih traoh pabui châu Phi daok rahtabiak sarau kadau, nan ye rilo urang raong oh khin raong gilac veik. Kayua yau nan ye rilo baoh sang raong glang likau trun jien je blei pandap panda tame ngak tabiak pandap mbang.

Urak ini dalam tỉnh Hậu Giang hu rilo janih phun mbang baoh trun taneh pala biak khang, salih tame nan, lac taneh pala phun durian tagok biak khang. Taneh pala phun panat trun rilo abih,  meng jaik 9.700ha, trun labaih 220ha. Patui di nan, lac pa-ok, dalam tỉnh urak ini daok jaik 3.000ha, trun labaih 120ha… Dalam tuk nan, taneh pala phun durian urak ini labaih 2.500ha, tagok labaih 600ha. Urak ini taneh pala phun durian daok paik baoh lac jaik 1.000ha, năng suất hu meng 14-16 tấn baoh sa  ha. Tui kuhria, yaok kong taneh pala durian, laba hu meng 50 triệu đồng tagok. 

UBND tỉnh Sóc Trăng hu brei adat camriep peih bruk kuac mek cuah labik mỏ cuah 5 di kraong Hậu di Tổng Công ty padang ngak Trường Sơn – labik njauk thầu jalan nduac samar Châu Đốc - Cần Thơ - Sóc Trăng, danak dak thanh phan 4 labik nao tapa Sóc Trăng. Akaok UBND tỉnh Sóc Trăng ieu dom po thau dalam tuk kuac cuah njauk khik tani tanat salamat, njauk tui tacei pato, njauk labik. Gam tui di nan, pajeng ba, pandar njauk bruk ba tabiak lac pabak ka danak dak. Danak dak jalan nduac samar Châu Đốc - Cần Thơ - Sóc Trăng hu phun jien buh tame abih tih lac labaih 44.690 tỉ đồng; praong 4 jalan radiah.

Anak bruk eik lipa dak harei dak tagaok khang di Sudan, dom jabat di Liên Hợp Quốc hu panuac brei thau lac bruk dinh dưỡng di urang kumei saong uranaih di taneh ia ini daok jhak nao biak rilo. Panuac nan hu ba tabiak hadei di tuk langyah bahrau ka dom bruk di urak ini saong kuhria mboh dahlau ka bilan hajan mada mai tal dalam sa bilan tra. Jabat rami ramik dom bruk ngak pahla di Liên Hợp Quốc (OCHA) brei thau, dom bruk mesruh gauk daok rah tabiak daok ngak brei trak damak jang makna ba tal suy dinh dưỡng, lavang lavaih di uranaih. 

Mỹ hu panuac lên án dom bruk cuh pandar kong nghe tên lửa đạn đạo di Triều Tiên dalam dom harei tapa. Mỹ ndom lac bruk Triều Tiên pandar kong nghe tên lửa đạn đạo ngak suan tapak tal rilo sarak di Hội đồng bảo an LHQ. Gam haong nan, bruk ngak ini lac bruk ngak jhak biak trak damak tal kaoh pulao Triều Tiên,  saong bruk saron bon, siam makre di dunya, ngak cagar veik dom kham matat oh peih ngak rilo vũ khí hạt nhân di dunya. Mỹ ieu Triều Tiên patrun dom bruk khiêu khích saong taduan bruk hu mbaok tame ndem mayai nao mai.

Hội đồng Bảo an Liên hợp quốc  brei dui atah lệnh pakauk phao ndao jeng yau daok pandar dom lệnh trừng phạt piah pacang cakak bạo lực di Nam Sudan 1 thun tra tal harei 31/5/2025. Sarak hu panuac lên án "bạo lực daok tagok, dalam nan hu gam bạo lực di dom rahra, dui atah bruk srau kadau chính trị, an ninh, kinh tế saong bruk pahla di jaik abih dom labik di taneh ia". Sarak ini jeng brei dui atah bruk miễn trừ hu brei tapa sa thun dahlau, brei adat ba bruk daong quân sự oh ngak brei matai menuac piah daong ka thỏa thuận hòa bình thun 2018 bo oh cang khan brei thau dahlau./.