Hadei di 28 thun peih ngak, Hukum Khik caga danak dak quoc phong saong khu quan su mboh hu dom tavak tavaiy, yau: Bruk tacei tabiak labik khik caga danak dak quoc phong saong  khu quan su oh hu  sambaic laic; daok rah tabiak bruk lih mek, pala drak suan hukum tame labik hu jao brei khik iek, pacang caga…Kayua yau nan ye, bruk padang ngak Hukum  Khik iek, khik caga danak dak quoc phong saong khu quan su lac njauk ngak piah pasiam dom bruk daok tavak tavaiy  di Hukum; saong piah peih ngak jaln tacei ba di Dang saong Karja ka bruk ngak salah hukum ka bruk quoc phong, rik tame padang ngak Karja phap quyen XHCN.

Sở Pato Megru TP.HCM brei thau, thun ini, taong abih bruk pilih ruah anek saih tame akaok pakat bac di TP.HCM hu ngak tapak tui jalan online, anek saih tal 9 brei hu căn cước công dân pagam chip duh ka bruk pilih ruah anek saih akaok pakat bac. Urak ini, ban raya jeng daok hu 28% anek saih meng tal 9 tal tal 12 oh ka hu căn cước công dân pagam chip. Anak tal, Sở brei pambuak bruk haong gah công an dom puk palei nao tal dom sang bac piah ngak căn cước công dân pagam chip brei ka anek saih dom tal bac 9, brei ngak salah dahlau di harei 15/5 piah ka dom adei tut angan pakacah tame tal bac 10.

Thun ini, Tet Bol lin bhap bini peih ngak di xã Song Phụng, huyện Long Phú, xã Liêu Tú, huyện Trần Đề saong xã Long Bình, ban sit Ngã Năm, tỉnh Sóc Trăng ngan haong kadha “ Bol pan phao karong Sóc Trăng mai veik halau gha, sambai raok Tet nasak tapai thun 2023”. Tukvak tapa, dom kapul urang lin tame Tet Bol lin bhap bini  hu rivang saong alin labaih 2.120 paok pandap ka baoh sang dalam sarak karja, baoh sang kathaot; pasiam saong padang ngak birau 70 baoh “ Sang Đồng đội”, “ sang jum ptaom”, sang “ anit ranam”, alin 390 sruh radaih juak, 430 paok jien bac saong 10.000 baoh siphau ka anek saih kathaot, takre bac…Kuhria taong abih jien ngak bruk nan, lac jaik 23 tỷ đồng.

Tukvak jaik di ini, yaom pabui diuk gam gam trun khang, meng 54 rabau đồng/kg trun daok 47 rabau đồng/kg, dalam tuk yaom pandap mbang raong pabui tagaok glaong, ngak ka urang raong gaok kan kandah. Anak bruk ini, Kapul raong glang tỉnh Đồng Nai hu harak likau trun jien kak je đậu nành blei meng negar langiu tame ngak pandap mbang ka athur raong, meng 2% trun daok 0%. Ong Nguyễn Kim Đoán, Phaok akaok kapul raong glang tỉnh Đồng Nai brei thau: Rilo taneh ia dalam bhum hu trun yaom kak je đậu nành blei meng negar langiu tame, trun daok 0%, dalam tuk Việt Nam oh ka trun, ngak kan kandah ka urang raong.

Kuhria tal puac thun 2022, dalam tỉnh Bình Dương daok khik labaih 3.000 urang ghien matuy, dalam nan tok hu 1.114 urang ghien dalam dom labik khik, sang tam khik, labik cakak ghien jru phien;  daok veik lac langiu. Ralo urang ghien jru phien lac dam dara, uranaih. Piah pacang caga matuy  gam tame urang dam dara, uranaih, dalam thun tapa C.A tỉnh Bình Dương saong Tỉnh đoàn pambuak bruk peih ngak rilo bruk, jalan pacang caga dom kol toi pham, ngak suan hukum pambuak tal matuy. Tui nan, pambak praong dom bruk ngak hu lagaih, yau: “ Kapol kong nhan xung kich  eng drei khik an ninh trật tự dalam D.N”, “ Dam dara sang trọ pacang caga matuy”.  

Bol lin Hàn Quốc brei thau, saboh mesup ini (16/3) Triều Tiên cuh sa tên lửa đạn đạo oh thau cambaih lac janih hagait tabiak bhum tasik gah Đông. Bruk cuh ini rah tabiak hadom mon dahlau di nyaom biai pakat glaong abih pak Tokyo di Tổng thống Hàn Quốc haong Thủ tướng Nhật Bản piah ginum biai dom bruk đe dọa hạt nhân saong tên lửa di Triều Tiên jeng yau dom bruk praong karei di dunya. Dahlau di nan, Triều Tiên hu cuh 2 tên lửa đạn đạo di harei angar (14/03).

Dom uang jaing mek menyek di Trung Quốc ngak bruk di labik trun dalam abih di gah kuac menyek, kuac trun dalam 9.396 mét ala taneh sa mạc cuah Taklamakan, mỏ menyek praong abih di TQ piah hu jeng bingun menyek dalam abih di châu Á. Ini lac sa bruk kham merat di gah cong nghiep menyek tamo di Trung Quoc piah jhul bruk ngak tabiak menyek  saong khí đốt dalam negar, piah trun bruk pambak tame blei meng negar langiu. Thun dahlau, Trung Quốc blei tame kuhria abih tih labaih 508 triệu tấn, sumu labaih 10 trieu thùng yaok harei.

Mon 5 meteh, tuk ia harei hu harei ka oh tagaok, min dom anek saih tal bac 12 di ban Kupang, Indonesia daok tame mon bac. Danak dak ini bahrau hu karja palei ba tabiak piah patagaok bruk iek glaong adat sang bac di anek saih saong pandar tukvak dalam harei hu kein jang. Dom urang ilamu saong amaik ame di anek saih oh pachreih tui bruk ngak iek ini, kayua prein yava di anek saih meda laik tame bruk oh siam kayua brei medeih aval jang saong bac biak aval, meda kurang ndih, glaih glar. Min karja palei brei thau lac daok khik bruk ngak iek ini saong kuhria peih praong tal dom labik pato pakai karei dalam palei./.