Rajaei njauk gauk haong UBTVQH dom asar kadha taduan panuac, langyah dự thảo Hukum Yaom kaom (pasiam veik) tui jalan oh ba pandap sữa brei ka urang umo taha saong rilo pabui tame angan pandap, dich vụ tani tanat yaom kaom dalam dự thảo hukum. Rajaei birau payua harak pathau khan tal UBTVQH ka bruk taduan panuac, langyah, ramik pasiam Hukum Yaom kaom pasiam. Hukum nan meda QH brei yar tangin di harei ini 19/6, harei akok di mbang ka 2, mbang nyaom ka 5 di QH. Dahlau di nan, harei 12/6, hadei tuk QH ginum biai blaoh, UBTVQH brei panuac ka dom asar kadha daok sahaneng karei di gauk dalam dự thảo.

Bier harei kabroi (18/6), di xã Vĩnh Hảo, huyện Tuy Phong, tỉnh Bình Thuận, hu peih tabiak harei peih pakah danak dak jalan nduac samar Vĩnh Hảo - Phan Thiết di danak dak padang ngak jalan nduac samar gah Barak - Maraong, gah Timun tukvak 2017 - 2020. Ong Lê Minh Khái, Bí thư Trung ương Đảng, Phó Thủ tướng Rajaei mai hu mbaok saong cakak harak khan bai peih pakah. Danak dak jalan nduac samar Vĩnh Hảo - Phan Thiết hu jalan atah labaih 100,8km nao tapa tỉnh Bình Thuận. Gah danak dak jalan nduac samar Vĩnh Hảo - Phan Thiết tukvak 1 hu buh jien tame padang ngak praong 4 jalan radaih, ngan haong prein nduac glaong abih lac 80km sa maong. Ngan haong abih tih phun jien buh tame jaik 11.000 tỷ đồng.

Rilo gilang pariak ramik pasiam veik brei trun jien laba payua tame tukvak ala 6 bilan hadei tuk Gilang pariak Karja brei trun jien laba. Meng harei 19/6, dom bruk breei trun jien laba di Gilang pariak Karja mbang ka 4 gam gam dalam 3 bilan ngak tui, dalam nan hu trun jien bala payua ala 6 bilan meng 5% trun 4,75% sa thun. Yaom lac, meng page 17/6, rilo gilang pariak  brei tui jien laba birau trun tui dom tukvak payua, dalam nan hu dom tukvak panak.

Pahadar 98 thun Harei Báo chí cách mạng Việt Nam (21/6/1925 – 21/6/2023), Kapul Urang ngak mbao Việt Nam – Kapul Xuất bản Việt Nam, Sở Khau tin saong Truyền thông, Kapul urang ngak mbao TP.HCM saong mbao Thanh Niên pambuak gauk peih bruk parang iek, yaih khan tapuk di dom blah mbao, urang ngak mbao ngan haong kadha “Adit tapuk di urang ngak mbao". Adit ini hu peih tabiak meng harei 17/6-22/6 di Jalan tapuk TP.HCM. Ini lac mbang camriep, Ban raya hu bruk ngak piah pok mayaom dom urang ngak mbao pambuak haong bruk dak padang cak rok patagok ilamo puac tapuk, yaih khan dom kadha paneh tabiak kayua kapul urang vak, dom jabat ngak mbao, rayo papar di dalam taneh ia. Dalam nan parang iek labaih 281 angan tapuk saong 55 kadha di 7 jabat báo chí.

Tiền Giang lac sa dalam dom tỉnh, ban dalam bhum taneran kraong Cuu Long patagok khang dom pandap OCOP. Tapa  4 thun peih ngak Danak dak “ Yaok sa xã sa pandap OCOP”, mbiah tal ini, tỉnh Tiền Giang hu 119 pandap hu pasang iek, taduan OCOP; dalam nan hu 75 pandap 4 patuh saong 44 pandap 3 patuh. Jaik abih dom pandap OCOP di yaok bhum palei yamen bingi karei tui bhum taneh di nyu. Mbiah tal tukvak ini, tỉnh Tiền Giang hu labaih 70% pandap OCOP hu mbaok di dom sieu thi di tỉnh saong dom cửa hàng sit.

Hãng tin Bloomberg hu brei thau ka bruk El Nino biak trak damak abih daok tamuh tabiak gilac veik, tui kuhria mbuan ba tal kurang pandap mbang saong lahik dien, ngak klaih klaoh chuỗi cung ứng saong lạm phát di dunya. Bruk salih tapa tukvak El Nino bahrau meda ngak tabiak bruk sarau kadau, abih di nyu nan lac di dom gah kinh te bahrau tamuh tabiak daok cak rok patagok samar. Jalan điện daok catang tagok saong ngak tahik dien rahtabiak rilo mbang jang. Tui bruk ngak di Jabat roh duah kinh tế Bloomberg Economics,  dahlau deih El Nino bhian ngak kan kandah cambaih laih tal bruk lạm phát di dunya saong nyu ngak kan kandah tapa tal bruk patagok GDP di rilo taneh ia.  

Takik di nyu labaih 98 urang metai di dua mbang ralo bhap  bini abih di Ấn Độ dalam 4 harei tapa di dom labik nan having akok kayua pandiak bhang catang. Tui karja pak nan, pandiak  ngak ka 54 urang metai di bang gah barak Uttar Pradesh saong 44 urang di bang gah timun Bihar. Urang jakar mboh lac jaik abih dom urang metai nan umo 60 thun saong hu ruak dahlau dalam rup yau nan ye mbuan ruak trak kayua pandiak. Nyaom bhap bini nan hu kakei dahlau di harei pandiak juai brei tabiak jalan.

Dua harei tra, dom anek saih Trung Quốc meda yam tame mbang pakacah đại học biak trak damak di abih di dunya. Rilo tinh, ban di taneh ia ini hu paglaong veik bruk pasang iek an ninh piah duah mboh dom pandap panda mbleik saleik. Dalam nan, rami ramik pandap panda pasang iek an ninh thông minh mbang camriep saong ieu kakei dom anek saih oh cuk pandap trang sức meng kim loại, piah pacang caga mbleik saleik saong tani tanat bruk samu gauk di mbang pakacah ini. Piah plaih njaik dom bruk ngak suan meda rahtabiak dalam mbang pakacah, dom harei jaik di ini, Mintri Công an Trung Quốc hu ba tabiak danak dak “ba tabiak ia harei” dom bruk pambuak tal bruk mbleik saleik hu caga dahlau, pandar pandap mek thaot binguk kadauk piah mbleik saleik dalam mbang pakacah./.