Hukum Taneh riya hu ba tame pandar meng harei 1/8 tacei lac yaom taneh oh daok pandar tui he so ramik veik, jeng yau brei hu yaom taneh labik daok birau. Kayua yau nan ye, UB bhap bini TP.HCM brei ramik veik yaom taneh sumu haong yaom di gah langiu, piah tui nan langyah, ngak harak gar sang danaok taneh riya di bhap bini jeng yau tabiak yaom bayar jien, labik daok birau di dom danak dak njauk mek veik taneh. Ong Phan Văn Mãi, akaok UBND TP.HCM brei thau, TP.HCM kham merat padang yaom taneh hu lagaih abih di Karja, doanh nghiep saong bhap bini, dalam nan kein laba di bhap bini brei hu iek glong.

Tui Cục Khik iek phun pala, Mintri Ngak nong saong patagok palei pala, Hàn Quốc brei blei baoh kruac bhung that tame darak pasa ini. Tui adat tuk baoh kruac bhung that hu pablei tapa Hàn Quốc tal labik tame paok, kadung baoh kayau paik blaoh njauk hu tauk nhãn. Nhãn njauk vak cambaih baoh kruac bhung that hu ngak tabiak dalam bhum pala pablei tabiak negar langiu hu tut angan bloh, dalam nan hu gam angan atau laik so tut angan di bhum pala. Labik tame paok pablei tabiak negar langiu brei duah thau tantu cambaih laih khau tin vak di mangaok nhãn. Dahlau di nan, thanh long saong pa-ok hu blei tame darak pasa ini.

Urak ini daok tame bilan pala pajaih phun mbang baoh di tỉnh Bến Tre min janih ini yaom tagok glaong, kurang phun pajaih. Yaom rilo janih phun pajaih tagok jang labaih sa bilan dahlau meng 40 tal 50%, abih di nyu lac phun durian tagok jiak 100%. Yaom phun pajaih tagok lac kayua jaik ini, bhap bini di bhum taneran kraong Cuu Long, Tây Nguyên peih praong bruk pala phun mbang baoh, abih di nyu lac phun durian saong phun panat daok hu yaom glong; dalam tuk nan dom phun pajaih puac bilan trun daok takik. Pala phun pajaih lac bruk ngak meng kan di tỉnh Bến Tre, yaok thun pabak ka darak pasar dalam negar jaik 20 trieu phun pajaih yaok janih.

Yaom hadang di tanut bier, meda lac biar abih dut saong dom thun, ngak ka urang raong hadang pak bhum ĐBSCL gaok biak rilo kan kandah, abih di nyu nan lac urang raong hadang siêu thâm canh. Tui kuhria di urang raong, jien blei pandap mbang ka 1 tan hadang meng 1 - 1,3 tấn pandap mbang. Yaom pandap mbang lac 45.000 đồng/kg, dalam tuk yaom hadang tok pablei hu 98.000 đồng, nan ye urang raong hadang lahik labaih 50 triệu đồng/tấn hadang. Dom gah chuc nang kakei rahra pilih ruah dom jalan raong hadang lagaih, patak pataom hu phun jien, trun yaom kaom yau raong hadang quảng canh bahrau 2 - 3 tukvak, cak rok patagok dom bruk raong hadang pablak ngak padai, raong hadang gam ngak glai.

Dalam bilan 7 meng blaoh, gah Barak negar yam tapa sa bilan rilo hajan saong ribuk. Kuhria tal harei 1 bilan 8, hajan ribuk, glut jaleih, ia dauk, ia sua ngak brei takik di nyu 36 urang metai saong lahik. Dom urang ilamo hu panuac brei thau lac, bilan 8 meda hu rilo mbang hajan praong meda ba tal glut jaleih taneh. Yau nan ye, bhap bini njuak brei bhian tui iek langik tasik, brei caga dahlau bruk nao mai, nao ma-in dulich, ndik ceik, pablei salih…tal dom bhum ceik, tapa dom jalan mbuan glut jaleih di tukvak ini.

Tui yaok pataom di Jabat Khik ramik bala pakat negar Pakixtan, hajan ia sua biak trak damak rahtabiak dalam bilan 7 bahrau blaoh ngak brei 99 urang metai saong 214 urang karei njauk rambuac. Dom labik jalan mbak nao mai saong co so ha tang di rilo labik jeng njauk khut tayah biak trak. Abih tih dom mbang hajan khang saong ia sua ngak tayah 8 mbaik tatua, ngak khut labaih 400 baoh sang, yaok ratuh athur njauk ia sua bak theik nao. Tui kuhria meng urak ini tal abih harei 6/8 hangin khang saong hajan khang daok rahtabiak di jaik abih dom bhum labik dalam taneh ia Pakixtan.

Gah tinh mbao negar Thổ Nhĩ Kỳ dang tabiak peih bruk ginum biai brei salih palao urang guk praong pambuak tal 7 taneh ia. Abih tih 26 bhap bini hu salih palao ka gauk, hu pajeng di 7 sruh haok mai Thổ Nhĩ Kỳ. 10 bhap bini Nga, njauk chap mek pak taneh ia NATO, dalam nan hu 2 uranaih hu mai tal Nga saong hu Tổng thống Nga Putin mai raok. 13 urang karei hu ba nao Đức saong 3 urang ba nao Mỹ. Tổng thống Mỹ hu payua panuac dhar phol tal Thổ Nhĩ Kỳ kayua bruk ngak “ kan kandah” min mek hu jak jeng siam mekre ini./.

Di 10 taneh ia châu Phi, kuhria meng akaok thun tal puac bilan 7 meng blaoh, hu abih tih 14.250 urang ruak đậu mùa khỉ saong 456 urang metai. Ruak đậu mùa khỉ mbang camriep hu duah mboh di kara dalam bilik dut iek di thun 1958. Ini lac sa janih ruak kayua virus takik mboh, bhian njom mbak tapa jit rup pabhap, ia pabah saong dom pandap njom nerak karei. Njom ruak bhian ba tal pandiak, ndaih baoh saong brah baong darah.