Yaok thun, hu jaik 7.000 urang hu daong duah labik ngak

Tui UBND ban raya Hồ Chí Minh, dalam 5 bilan tapa, kinh tế di ban raya tagok siam saong siam veik samar. Yaom pandap ngak kong di ban raya tagok 2,6% dut song tuk vak ni thun bloh. Dalam nan, 4 nyaom gah ngak cong lac điện tử; hóa dược; padai brah pandap mbang, pandap menyum song cơ khí tagok 5,6% dut song tuk vak ni thun bloh. Njauk caik hatai nan lac, abih tih yaom pablei rai pandap panda song jien mek tame meng dịch vụ hu labaih 456.000 tỷ đồng. Anak tal, ban raya daok brei peih ngak dom jalan pachreih bruk pablei salih yau: danak dak khuyến mãi, bilan blei pandap hè… piah patagok prein blei. 

Huyện bhum ceik, bhum tapen negar Tịnh Biên, An Giang urak ini hu buh jien tame ngak siam dom janih yau ye: jalan mbak, điện, ia, sang bac, bilai iek ruak. Yaok thun, huyện jeng hu danak dak daong pato bruk ngak ka urang ngak, duah jalan ngak mbang duah jien ka rahra. Yaok thun, hu jaik 7.000 urang hu daong duah labik ngak, ba brei bruk ngak, pato pakai bruk ngak brei ka labaih 1.500 urang ngak palei pala… Abih di nyu lac dua thun jaik di ini, huyện hu daong patagok bruk pala, ngak, parilo jalan ngak mbang duah jien ngan saong yaom jien peih ngak abih tih lac jaik 2 tỉ 400 triệu đồng ka 178 sang, dalam nan hu 103 sang lac urang bangsa Khmer.

Urak ni, tỉnh Bình Dương taduan hu biak takik harak gar likau dong jien pah sang ka urang ngak tui sarak 08. Tal urak , dalam tỉnh bahrau taduan hu labaih 1,2% harak dalam abih tih 820.000 urang ngak hu mbang tui sarak. Tui Sở Lao động-Thương binh song Xã hội tỉnh makna lac kayua bruk pasang iek urang ngak, piah ginup điều kiện taduan hu bruk dong nan, dok rilo cuang kandah, bruk duah thau urang hu mbaok blei bảo hiểm bắt buộc di urang ngak dok gaok rilo tavak tavaiy .

Yaok ratuh SV daok bac di dom sang bac Cao đẳng, Đại học dalam ban Cần Thơ tatuak drei tuk thau lac drei tavak sraiy meng 10 tal 60 triệu đồng. Dalam tuk dom adei oh taduan hu jien hagait atau pandap panda hagait. Makna lac, dom SV ini njauk sa urang angan Trương Quang Anh Đức, daok di Cần Thơ nyim ngak lac menuac tut angan blei pandap piah pabak ginup doanh số ka cửa hàng Thế giới di động saong cửa hàng FPT. Hadei di tuk rah tabiak bruk nan, phone tangin di Đức oh ieu hu. Công an quận Ninh Kiều hu taduan harak pathau di dom sinh viên, daok duah thau, ngak brei cambaih laih bruk nan.

Nghệ nhân thư pháp Vũ Đăng Học (ban raya Hồ Chí Minh) hu alin hadiah brei Sở Ilamu, Thể thao song Du lịch tỉnh Bến Tre baoh tapuk thư pháp haroh Quốc ngữ “Nguyễn Đình Chiều thi tuyển”. Tapuk kapan 209 blah, ngak meng tangin mangaok blah baar xuyến chỉ, trak labaih 500 kg. Asal kadha di tapuk hu 2 binah prong : Nguyễn Đình Chiểu danh tác (dom kadha di cụ Đồ) song Ngưỡng vọng Nguyễn Đình Chiểu (tuyển tập thơ di dom rairah hadei vak ka Nguyễn Đình Chiểu). baoh tapuk hu Nghệ nhân alin hadiah veik ka tỉnh Bến Tre di tuk pahadar 200 thun harei menek Danh nhân Nguyễn Đình Chiểu (1822 - 2022).

Urang lambaok Liên hợp quốc ka Yemen brei thau lac mek hu bruk njauk gauk brei dui atah jang 2 bilan bruk padeih cuh gauk, dalam tuk harak sanya padeih cuh gauk di urak ini jaik tal harei abih tukvak. Bruk njauk gauk brei padeih cuh hu daong patrun biak rilo bruk metai lahik di rahra, patagok dom nhiên liệu pajeng ba tame Yemen, gam haong nan, dom mbang par pajeng tuai nao tal saong mai meng mblang kapal haok dunya Sanaa hu pambuak veik hadei di jaik 6 thun kreik pabah mbang. Lambaok Liên hợp quốc jeng brei thau lac daok kham merat piah ngak pakhang, pasiam sa harak sanya padeih cuk miat miat, piah mek hu sa jalan chính trị khang kajap di Yemen.

Dalam 21 adit akaok di thun ni, di Mỹ rah tabiak tong abih 213 mbang cuh phao biak rilo, dalam nan hu 27 mbang rah tabiak di sang bac. Bahrau di abih lac harei 1/6 hu rah tabiak sa mbang cuh phao di sa sang iek ruak di ban Tulsa, bang Oklahoma, ngak brei 5 urang metai. Bruk rah tabiak 10 harei hadei di bruk cuh phao di siêu thị Tops d iban Buffalo (bang New York), ngak brei 10 urang metai

Kadung jien uranaih Liên hợp quốc (UNICEF) brei thau, labaih 5 triệu uranaih Ucraina caong hu daong dalam tuk bruk mesruh gauk di Ucraina jaik yam tame harei sa rituh. Dalam nan, labaih 2,2 triệu uranaih klaak sang nduac nao daok di taneh ia langiu, saong 3 triệu uranaih daok di Ucraina. UNICEF jeng brei thau cambaih laih ka tanut trak damak di bruk mesruh gauk ngan saong uranaih Ucraina, dalam nan, kuhria rah tapa yaok harei hu labaih 4 uranaih njauk rambus saong labaih 2 uraniah metai./.

Urang lang: Hani Pha & M. Phuong – 04/06