Tui Pasak Pasang iek saong Taong yaom asar pato megru Đại học Quốc gia TP.HCM, hadei 30 harei peih blah web brei tut angan mbang ka 1, hu labaih 130.000 anek saih  tut angan  pakacah thun 2025. Ini lac mbang tut angan hu rilo anek saih di abih  dut saong tukvak ini dom thun dahlau.  Thun 2025, mbang ka 1 pakacah hu peih ngak di harei 30 bilan 3 di 25 tinh, ban. Tui kuhria mboh dahlau, diem pakacah mbang ka 1  hu khan brei  anek saih thau di harei 16 bilan 4. Mbang 2 tui kuhria dahlau brei pakacah di harei 1 bilan 6, brei thau diem pakacah di harei 16/6. Meng thun 2025, Đại học Quốc gia TP.HCM brei Harak chung nhan diem pakacah  tui online  piah tut angan palih ruah. Urak ini hu labaih 100 sang bac  pandar tut diem pakacah ini piah palih ruah tame dai hoc.

Tui kuhria mboh dahlau di dom jabat chuyen mon tinh Ben Tre, bruk njom ia mbak dalam bilan thu thun ini mai tal samar, hu tabung glaong di dom harei anak tal. Ia mbak urak ini tame dalam dom kraong ribaong saong taneh hamu, tanut mbak labaih 2 angaok ribau, tame dalam labaih 40 km tame taneh riya. Gah chuc nang tinh Ben Tre pachreih rahra pacang caga dahlau prein yava saong pacang caga jit, ruak dalam bilan pandiak, kurang ia, njom ia mbak. Dom labik atah di pabah kraong meng 15km tal 69km ba trun brei pasang iek tanut mbak tuk ba tame pandar braong saong pandar ia tapak.

Dom palei di bhum U Minh Thượng, tinh Kiên Giang nan hu huyen An Minh, An Biên, U Minh Thượng lac bhum taneh gaok kan kandah khat lahik kayua pandiak bhang, njom ia mbak dalam dom thun tapa. Anak bruk gleng iek mboh dahlau langik pandiak dui atah saong njom ia mbak glong jang dom thun dahlau di jabat chuyen mon, bhap bini saong karja brei caga rilo jalan, piah takik khat lahik. Ralo bhap bini  brei njuk pruh ia padang piah yau nan ye mbiah tal ini ginup ia pruh ka phun pala, njam patam jeng yau ia pandar di baoh sang.

Kham merat tal puac bilan 3 anak tal salah blaoh bruk brei oh daok baoh sang taik tahak, huyen Sa Thầy, tinh Kon Tum hu ngak siam bruk paglaong prein rik daong di rahra saong dom gah ngak pahla. Kuhria tal kreh bilan 2 ini, huyen hu brei oh daok jaik 90 baoh sang dalam 346 baoh sang taik tahak. Urak ini, dom bhum palei daok ba tame padang, pasiam 139 baoh sang. Langiu di jien pabak anak meta meng jien jak ba di tinh, di huyen saong jien patak pataom buh tabiak bhian lac labaih 2,7 ty dong, rahra jeng hu rik daong jak jeng saong jien piah padang, pasiam sang daok hu abih tih jien labaih 7 ty dong.

Meng thun bac 2025 -2026, TPHCM oh mek jien bac ka anek saih meng mam non tal tal bac 12. Tui nan, Ban raya kuhria mboh dahlau brei buh tabiak 653 ti dong dalam thun anak tal piah daong jien bac ka uranaih mam non umo 5 thun, anek saih THPT karja, langiu karja, sang bac thuong xuyen, oh kuhria dom sang bac hu phun jien negar langiu. Jalan ngak nan hu khan tapa di mbang nyaom Hoi dong bhap bini TPHCM peih tabiak di biar harei kabroi. Dahlau di nan, TPHCM jeng brei khan tapa sarak oh mek jien bac ka anek saih THCS.

Microsoft bahrau ba tabiak sa bruk hadah krah dalam gah mac tính lượng tử hu ngak tabiak sa janih chip lượng tử biak bahrau hu angan Majorana 1. Ini hu maong lac sa bruk jak jeng hu makna hadei 19 roh duah di Microsoft. Bruk hu makna lac piah ngak tabiak hu chip ini, Microsoft hu ngak tabiak sa trạng thái pandap panda biak bahrau nan lac siêu dẫn tô pô, sa janih pandap panda hu brei lac oh hu dalam dunya. Chip Majorana 1 hu caong takre brei peih jalan ka bruk patagok dom he thong mac tính lượng tử bahrau.

Jabat khik iek pandap meng kan lavik di Ai Cập birau ini khan lac, urang duah mboh ghul kubo meng kan lavik di Patao Thutmose II di labik dar patao akaok meti. Ghul kubo nan duah mboh  jiak Thung lũng dom patao di Luxor, gah meraong negar Ai Cập, atah di ini jaik 3.500 thun. Bruk duah mboh nan lac sa dalam dom bruk birau gah roh duah hu makna praong abih dalam dom thun jiak ini. Thun dahlau, Ai Cập taduan raok  jaik 16 trieu tuai damuai yulit saong kham merat pachreih hu 18 trieu tuai damuai dalam thun ini.

Kum menuk ada hu ngak ka urang ngak nong di Mỹ brei palahik yaok trieu drei menuk yaok bilan ngak ka gah pabak baoh menuk trun rilo. Bruk ini pambuak haong palai ngak ka yaom baoh menuk tagok samar drah. Rahra di rilo bang brei patakik baoh menuk pablei tabiak yaok harei. Tui Mentri Ngak nong Mỹ, meng akaok thun tal ini hu labaih 21 trieu drei menuk binai njauk kurang tapol. Dom ban saong ban sit di Mỹ mbaoh tangin brei ka rahra raong menuk di sang meyah rahra ngak tui njauk tanut chuan pacang caga jit ruak.