Pahadar 70 thun Jayah Điện Biên Phủ, gam haong peih ngak Danak dak “Jalan ngak pahla – klah rabha anit ranam”, Tổng cục Hậu cần, Mintri Quốc phòng pambuak haong Kapul chữ Thập đỏ Việt Nam pakat negar peih bruk iek ruak, tacei jalan khik iek prein yava, pabak brei jru tavao oh mek jien ka mikva daok pak dom xã Nà Tấu, ban Điện Biên Phủ; xã Keo Lôm, huyện Điện Biên Đông, tỉnh Điện Biên. Danak dak hu mbaok dom gru jru hu ilamo glaong. Kapul dom y bác sỹ hu mai iek ruak, tacei jalan khik iek prein yava, brei jru oh mek jien ka jaik 1.700 urang, haong yaom jien abih tih lac labaih 300 triệu đồng.

Piah daong jhul patagok bruk likei kumei samu gauk saong khik ramik ilamu siam mekre meng kan thun 2014, kalup kapul kong cheng kumei camereip abih di tỉnh Gia Lai hu padang tagok haong 60 urang, tal urak ini dalam tỉnh Gia Lai tagok hu 33 kalup kapul kong cheng kumei haong labaih 1.610 urang. Abih di nyu lac dalam bhum peih ngak danak dak bruk ngak negar cakrok KTXH bhum urang bangsa takik saong bhum ceik, hu 18 kalup kapul kong cheng hu padang tagok haong 680 adei sa-ai kumei hu mbaok tame. Bruk ini ngak brei salih hatai sahneng meng lavik mai, lac taih me-in kong cheng lac bruk di likei.

Dalam dom bruk ngak di Harei ilamo bangsa Việt Nam, di Palei Ilamo - Du lịch dom bangsa Việt Nam (Đồng Mô, Sơn Tây, Hà Nội), mikva bangsa Ê Đê mai meng tỉnh Đắk Lắk hu padang ngak veik adat raok matau likei biak gheih mekre di bangsa drei. Tui adat di urang Ê Đê, hadei di bilan ngak salah puh cakak, dom urang kumei dara meda nao tok pasang. Tuk hu dua gah njauk hatai, urang kumei Ê Đê meda mai sang pasang ngak matau meng 1 tal 3 thun. Gah likei hu quyền ndok pandap lakhah saong gah kumei brei kuhria abih jien ngak lakhah. Adat raok matau likei hu peih tabiak hadei di tuk abih tukvak urang kumei daok pak gah likei ngak matau saong gah kumei hu jao ginup jien ndok lakhah di gah likei.

Bộ Tư lệnh bhum 5 Hải quân bahrau pambuak bruk haong gah daong brei, alin hadiah 150 bồn padang ia, 200 bình ia hacih haong 50 pok pandap, tui yaom jien abih tih lac jaik 400 triệu đồng ka bhap bini tỉnh Cà Mau.  Tapa nan, Bộ Tư lệnh Hải quân jeng hu tacei pato Bộ Tư lệnh bhum 5 Hải quân saong Hải đoàn 129 patui bruk pajeng ba ia taba meng pulao Phú Quốc, tỉnh Kiên Giang saong tỉnh Bà Rịa - Vũng Tàu mai brei saoh ka mikva bhum pandiak bhang, bhum ia njom mbak di tỉnh Cà Mau saong Bến Tre. Hu labaih 400m3 ia hu ba tal rahra dom puk palei saong dom bruk daong ka mikva jeng daok hu peih ngak

Pasak pasang iek ruak kik TP. Hồ Chí Minh bahrau taduan 13.000 mbang vaccine 5 dalam 1 meng Danak dak klauk jru peih praong dalam taneh ia. Pasak hu parabha dom vaccine ini ka abih tih 22 pasak y tế quận huyện, ban Thủ Đức piah peih bruk klauk jru ka uranaih. Ini lac vaccine pambuak caga 5 janih ruak njom mbak biak kan kandah ka uranaih, lac bạch hầu, ho gà, uốn ván, viêm gan B, viêm phổi/viêm màng não mủ kayua vi khuẩn Hib. Klauk jru lac jalan ngak siam abih piah tagok prein pacang caga ruak ka uranaih. Amaik ame njauk tui iek harei klauk jru saong ba uranaih nao klauk njauk tukvak, ginup mbang klauk.

Bruk salih ralow bhong meriah meng dom janih ikan sit yau ye ikan trích, cá mòi saong ikan ndel bau dalam dom var mbang meda daong ka 750.000 menuac klah di matai yaok thun saong daong langyah bruk srau kadau khí hậu. Ini lac panuac tamat di sa kapul dom urang roh duah di Japon saong Australia ba tabiak hadei di tuk langyah dữ liệu praong abih kuhria meng dahlau mai meng labaih 130 taneh ia. Pathau khan langyah hu tacei tabiak dom kein laba di dom janih ikan sit lac hu dinh dưỡng glaong, siam ka alam langik tasik, pabak hu rilo, dalam tuk dak harei dak hu rilo bruk brei mboh ka talei pambuak gauk di ralow bhong meriah haong bruk mbuan njauk ruak jang di menuac saong ngak jhak ka alam langik tasik.

Trung Quốc harei kabroi bahrau ba tabiak blah bản đồ taneh riya ia bulan hu yaom tantu cambaih laih biak glaong, camriep abih di dunya, iek tui dom paka hu blaoh dalam danak dak nao pasang iek ia bulan. Blah bản đồ taneh riya hu tỷ lệ 1 : 2,5 triệu, hu bản đồ taneh riya di abih tih mbaok ia bulan, bản đồ parabha dom janih patau di mangaok ia bulan, bản đồ cih tabiak piah kiến ​​tạo ia bulan saong 30 bản đồ taneh riya tui tanut chuan di ia bulan. Blah bản đồ hu cih tabiak meng bruk hu thau ka asal di nyu saong jalan tiến hóa di ia bulan, gam haong duah thau dom roh duah hu blaoh di dalam saong langiu taneh ia.

Rilo taneh ia Đông Nam Á, Nam Á daok hu pandiak khang dui atah, khang jang abih oh ka bhian mboh dalam bilan pandiak thun ini. Cục Khí tượng Thái Lan kuhria mboh dahlau lac 15 tỉnh, ban, dalam nan hu ban ine Bangkok, meda hu pandiak pa-uh biak khang. Karja hu panuac ieu bhap bini caik hatai ka bruk mebuk pandiak, mbuan ba tal metai menuac. Ấn Độ jeng hu pandiak khang ngak brei 1 urang matai, jaik 70 menuac tame sang iek ruak. Dom labik gah meraong Bangladesh langik pandiak tal 42,6oC.