Mintri jalan mbak pajeng ba bahrau ieu kakei dom po thau ngak salah dom danak dak tatua cầu vượt, canah dua gah jalan cao tốc Vĩnh Hảo – Phan Thiết saong Phan Thiết– Dầu Giây dalam bilan 6 ini. Tui pathau khan di Cục khik ramik buh jien tame padang ngak (di Mintri jalan mbak pajeng ba), hadei di tuk ba tame peih ngak ye bruk pasang iek, ngak salah dom bruk daok kadaong veik hu Kapul pasang iek kanja ka bruk nghiệm thu danak dak padang ngak karei, jang yau bruk peih  ngak dom bruk daok kadaong veik biak suai, oh pabak hu panuac ieu kakei. Kayua yau nan ye, Mintri jalan mbak pajeng ba hu ieu kakei dom kapul hu pataom prein tame peih ngak salah taong abih tih dom bruk ini dahlau di harei 15/6. Ngan haong labik canah jalan, jalan gar, jalan pataom, rãnh dọc, taluy,... ngak salah dahlau di harei 30/6

Meng bilan 6 ini, Jabat tut angan taneh riya TPHCM meda pandar yaom thu phí bahrau tuk rahra ngak harak taong yaom hồ sơ brei harak  chứng nhận quyền pandar taneh (daok ieu lac sổ đỏ) saong tut angan ngak harak đảm bảo. Dalam nan, yaom jien taong yaom hồ sơ brei harak sổ đỏ, tagok yaom haong bruk pablei salih, baoh sang, menuac urang, bol bhap rahra, meng 1 triệu pluh ribau đồng tagok 1 triệu 4 ratuh rabau đồng, jabat, kapul nyaom, labik agama, meng 1 triệu 8 ratuh rabau đồng, tagok 2 triệu 250 rabau đồng saong pabak yaom jien ka mbang ngak camereip, ngak bahrau, salih bahrau, ngak veik saong dom janih biến động. Daok ngan saong bruk thế chấp, yaom thu phí ngan saong baoh sang, menuac urang lac meng 720.000 tal 1 triệu đồng.

Dom thun jaik di ini tanut prein maraik gauk pakat tỉnh (PCI) di Bạc Liêu  gam gam trun meng điểm số tal labik dang. Dalam thun 2022 tỉnh dang 61/63 di nyaom rami ramik tui kuhria mboh biak bier. Piah pasiam veik bruk ini, akaok UBND tỉnh Bạc Liêu hu ba tabiak 7 jalan ngak katut panak soang 7 jalan ngak suai lavik piah ngak pasiam veik chỉ số PCI di tỉnh yau ye peih bruk ndem mayai nao mai hu siam lagaih haong doanh nghiệp; ngak pambuan jang, jhul khang bruk pasiam veik hành chính taong abih gah; paglaong bruk langyah adat hành chính dịch vụ công online; paglaong bruk pasang iek, padang ngak kanja điện tử....

Dalam 2 harei, lac harei 30 saong harei 31/5, di huyện Chợ Mới, huyện Châu Phú saong ban Long Xuyên, tỉnh An Giang hu 3 bruk glut jaleih taneh, pacah ra-ai takai kraong, ribaong, ngak ka rilo baoh sang njauk panduan ba nao samar drah. Dahlau di nan, harei 29/5, di takai kraong gah hanuak kraong Hậu, labik tổ 20, khóm An Thạnh, atah di jalan Roya 91C jaik 8m, atah di takai kraong jaik 5m, rah tabiak bruk talah takai kraong atah abih tih jaik 40m, praong meng 1 tấc tal 2 tấc, ngak brei mbuan jaleih 5 baoh sang saong bruk mbuan glut jaleih di labik ini lac biak glaong.     

Mintri Ilamo, Thể thao saong Du lịch bahrau brei thau Ilamo yuk khèn di urang Mông daok di Yên Bái lac Inem krung ilamo oh maong mboh pakat negar. Khèn Mông lac sa janih alat ragam hu rilo sap yava, lac sap di ceik glai. Khèn Mông hu pandar biak rilo tui yaok bruk karei di gauk, abih di nyu nan lac, sap khèn hu jeng sap piah gul gaok gauk, payua panuac anit ramam di urang likei, kumei. Sap khèn lac suan yava di urang Mông di Yên Bái jeng lac Inem krung ilamo oh maong mboh pakat negar dak harei dak brei mboh yaom glaong ilamo meng kan di sap khèn dalam raidiuk di rahra bangsa Mông.

Mintri Y tế Nhật Bản brei thau, kuhria tal thun 2022, bruk menek, bruk ndih tapui anek di taneh ia ini trun thun ka 7 gam gam, trun biar jang tanut biar di abih. Kadha ini meda ba tal sa bruk srau kadau gah menuac sia biak trak damak saong urang taha hu rilo jang. Thủ tướng Nhật Bản Kisida hu ba bruk menek anek lac bruk dahlau, dang akaok dalam sarak. Yaom lac paok sraiy di karja biak praong, akaok adit ini, ong Kisida hu panuac ieu patagok kadung jien karja, meng 3 tỷ yên tagok tal 3,5 tỷ yên brei ka bruk daong iek glang uranaih saong dom jalan ngak karei piah daong dom amaik ame. Ini lac jalan peih tabiak puac abih piah Nhật Bản pasiam veik bruk menuac sia taha.

Gah Y tế Dunya (WHO) urak ini daok ieu dom taneh ia ba tabiak jalan ngak salih ka phun pakao meng phun pandap mbang. Dom mblang taneh daok pala pakao mayah hu salih tapa pala phun mbang baoh meda rik tame bruk daong pabak an ninh pandap mbang, langyah dom kan kandah, tavak tavaiy di pandap mbang, pabak pandap mbang ka dom baoh sang ngan haong yaok trieu urang hu mbang tui kein laba. Dom kapul nyaom dunya jeng daok pambuak bruk daong urang nong di rilo taneh ia klaak bruk pala phun pakao hala piah salih tapa pala janih phun karei.

Abih labik dalam taneh ia Jordan daok chreih chrai tagok tuk rah tabiak ndam lakhah di anek patao. Anak likei kachoa di Patao Abdullah – lac Thái tử Hussein hu ngak lakhah haong Rajwa Al Saif, lac anek kumei di sa doanh nhân Saudi Arabia. Ndam lakhah hu peih ngak di ban ine Amman, hu mbaok di 140 tuai da-a, dalam nan hu rilo menuac dalam hoàng gia di mangaok dunya saong dom urang pan akaok dom taneh ia. Thái tử Hussein, umo 28 thun, hu Patao pilih ruah di thun 2009 piah tagok ngak patao di harei hadei. Daok cô dâu Rajwa Al Saif, umo 29 thun, lac sa urang kumei kiến trúc sư, jeng lac anek di sa baoh sang hu angan je.