Jabat Rajaei bahrau tabiak harak brei thau panuac tamat di Thủ tướng Phạm Minh Chính di mbang ngak bruk haong urang par akaok TPHCM. Dalam nan, Thủ tướng ieu kakei TPHCM patui veik pataom tame peih ngak dom jalan ngak ka hạ tầng, sarak, manuac ngak saong 6 bruk ngak hu makna praong tui Sarak  Nyaom roya Đảng mbang ka XIII, dom sarak di rajaei; patui veik peih dom bruk ngak siam lagaih pacang caga jit ruak Covid-19, njauk caik hatai lac oh caik rah tabiak jit kateik angaok jit, pataom tame  jhul samar bruk klauk vaccine ka dom urang tui njauk adat…

Meng akaok thun tal ni, Mintri Công an samar tacei pato Công an dom jabattỉnh ban, peih dom jalan pacang caga  jit Covid-19 song dom jit ruak njom mbak karei karei. Pagap yau,  peih bruk klauk vắc-xin pacang  Covid-19 mbang ka 3 ka tong abih dom urang jakar, urang lin ginup tanut, song urak ni dok samar  peih bruk klauk jru mbang ka  4 ka urang jakar, urang lin dalam bilan 8/2022. Gam song nan, hu dong  jru tavoa, hóa chất, pandap panda pacang caga jit ka dom jabat  tỉnh ban song  260 mbang, tong abih tih jiak 16 tỷ đồng; pajeng ba pandap panda, dong ba ka Công an jabat, tỉnh ban labik gah merong negar, dong brei  1 ribau  837 lít hóa chất ka Công an dom jabat, tỉnh ban, pabak ka bruk pacang caga jit ruak pandiak tabiak darah.

Harei 17/8, Kapul urang nong tỉnh An Giang peih nyaom roya Pok mayaom urang nong ngak mbang - pablei salih naih joi, mbang ka XIX, tukvak 2019 - 2022. Nyaom roya ini, pok mayaom 330 kapul saong dom manuac urang nong naih joi, lambaok ka labaih 86.000 urang nong, ngak mbang pablei salih di tinh dalam 5 thun tapa. Tapa 5 thun, abih tih dom urang nong mek hu angan ngak mbang, pablei salih naih joi dom pakat lac labaih 86.118 sang. Rilo sang urang nong lac urang bangsa takik, biak naih dalam bruk ngak mbang, pablei salih.

Anak bruk menuac urang palao ikan hải tượng (hải tượng long) tabiak krong ribong di ban raya  HCM, ong Trần Đình Luân, Tổng cục trưởng Tổng cục kaya ikan (mintri ngak nong song patagok palei pala), brei thau, ikan hải tượng hu asal meng  Nam Mỹ. Ikan prong  nyu biak prong, atah tal  3m, trak tal  200kg. Ikan  hải tượng oh daok dalam angan hu adat pablei salih di  Việt Nam. Meyah palao tabiak krong ribong, janih ikan ini meda ba tal kanyah jhak ka alam môi trường sinh thái.

  Piah ramik pasiam bruk oh cih sarau kadhau di tatua Thủ Thiêm 2, Sở Jalan mbak pajeng ba TPHCM hu pato tacei Pasak khik ramik jalan mbak dalam ban peih bruk uak hacih dom labik njauk cih sarau kadhau meng dom ia chuyên dụng, biyar veik mbaok tamo ka danak dak. Taphia di nan, Sở likau UBND ban caik pagam camera, brei dom kapul pasang iek luac harei melam, ngak catang langyah dom bruk cih vak sarau kadhau, tauk quảng cáo, pathau khan di mbaok tatua. Gam tui di nan, likau ban raya pato tacei dom puk palei pambuak gauk pathau khan, pachreih bruk salamat jalan bak, alam môi trường, sajarah, ilamo di dom danak dak labik pasak ban raya.

Mintri Quốc phòng Trung Quốc harei kabroi (18/8) brei thau, bol bala negar ni mai  tal  Nga piah hu mbaok tame mbang pasram mesruh haong gauk hu angan  “Phương Đông – 2022” dalam tuk anak tal, tui jalan pambuak bruk yaok thun  di bol bala 2 taneh ia song njauk gauk di 2 gah. Mintri  Quốc phòng Trung Quốc jeng brei thau, bruk nan dok hu mbaok di Ấn Độ, Belarus, Tajikistan song Mông Cổ... gam song nan hu panuac khan bruk negar ni hu mbaok tame pasram ini “Oh pagam tal bruk dunya song labik laboa urak ni ”. 

Tui Cục Pasang iek Ruak njom mbak di Mintri Y tế Lào, dom urang njauk ruak pandiak tabiak darah di taneh ia ini daok tagok dalam tukvak meng bilan 5 tal bilan 7 saong tal urak ini, dom urang ruak pandiak tabiak darah hu tagok tal labaih 17.559 urang, dalam nan hu 17 urang metai. Urak ini dom sang iek ruak di Ban ine Vientiane njauk mek hành lang saong bilik ginum biai ngak labik taong ruak ka urang ruak. Tui Mintri Y tế Lào, biến đổi khí hậu ngan haong bruk hajan sarau kadhau di akaok bilan hajan lac makna ba tal bruk tamuh aval ruak pandiak tabiak darah.

Gah chức năng Tây Ban Nha harei kabroi (17/8) hu dong ka 101 urang di cư njauk gar veik di angaok sa sruh gaiy độc mộc langiu tasik Tuy-ni-di, di tasik  Địa Trung Hải. Tong abih urang di cư ni, hu duah mboh dalam tuk pren yava lahik ia trak. Tui yaok pataom di kapul  Di trú dunya, kuhria meng akaok thun tal ni, hu labaih 1 ribau 100 urang metai tuk duah jalan tal  châu Âu tapa bhum tasik ni./.

Urang lang: Thu Thảo & H.Pha - 18/8/2022