Jabat rayo sap ndem VN daok di Ban raya HCM bahrau peih bruk sơ kết 1 thun pambuak gauk haong palei Bình Hòa (di xã Phan Hòa, huyện Bắc Bình). Palei Bình Hòa, xã Phan Hòa, huyện Bắc Bình, hu 316 baoh sang ngan haong 1.895 urang, abih tih jeng lac mikva Cam tui agama Bà ni. Raidiuk di rahra di pak ini daok gaok rilo kan kandah. Dalam thun tapa, Rayo sap ndem VN daok di Ban raya HCM hu patagok bruk ngak, labik dang di drei, ngak siam bruk pathau khan, samar drah brei thau dom  bruk rahtabiak di dalam tỉnh Bình Thuận, abih di nyu nan lac di huyện Bắc Bình, xã Phan Hòa saong palei Bình Hòa. Tapa nan, Jabat rayo sap ndem VN daok di Ban raya HCM hu jao alin 10 paok jien bac saong dom pandap panda ka dom anek saih kan kathaot yam tapa kan kandah bac naih joi saong 50 paok pandap ka dom sang kan kathaot dalam palei.

Thành đoàn TP.HCM bahrau  peih bruk tabiak mbaok dom danak dak halan hatian bilan hè thun 2023. Bilan hè halan hatian thun 2023 di dam dara TP.HCM rah tabiak meng harei 11/6 tal harei 6/8, tui kuhria dui pachreih hu labaih 700.000 mbang dam dara, bol bhap rahra hu mbaok tame meng labik pasak lac TP.HCM tal dom tỉnh Đông Nam Bộ, Tây Nam Bộ, bhum tapen tasik Nam Trung Bộ haong Tây Nguyên. Gam haong nan, lac dom bruk halan hatian di dam dara TP peih ngak di dom xã pulao Thạnh An, huyện Cần Giờ, huyện đảo Phú Quý (tỉnh Bình Thuận) saong negar Cộng hòa Dân chủ Nhân dân Lào.

Sở Ngak nong saong Patagok palei pala tỉnh Bình Thuận bahrau hu pathau khan Danak dak cak rok patagok thanh long di dalam tỉnh tal thun 2030. Danak dak ini hu brei thau lac, tal thun 2030 mblang taneh pala thanh long lac 30.000 ha, năng suất tui kuhria mek hu 22 tấn/ha, baoh paik hu 660.000 tấn sa thun. UBND tỉnh Bình Thuận ieu kakei jabat chức năng cak rok patagok pajaih thanh long tai mbong patih, bhong, parabha labik pala, salih số; daong ba ka dom doanh nghiep ngak thanh long; cak rok patagok darak pasa meng kan saong darak pasa bahrau. Kapul Thanh long Bình Thuận njauk patagok jang veik dom bruk ba akaok nao dahlau piah ba jalan, pambuak haong doanh nghiệp.

Po bein tỉnh Tiền Giang saong Bến Tre daok chreih chrai kayua rilo janih baoh kayau daok hu yaom. Di akaok bilan hajan, baoh kruac bhung kanduh hijao po bein pablei ka urang pablei salih yaom mangaok mala 30 rabau đồng/kg, glaong jang tuk akaok thun labaih 10 rabau đồng/kg. Thanh long ralow bhong yaom jaik 40 nghìn đồng/kg, ralow mbong yaom labaih 25 rabau đồng/kg, laba meng 15-20 rabau đồng/kg. Tiền Giang, Bến Tre lac dom labik hu taneh pala phun mbang baoh praong di bhum ĐBSCL, lac labaih 200 rabau ha. Dalam nan kruac bhung kanduh hijao, la-u, thanh long hu pala biak rilo, năng suất glaong, brei baoh luac thun.

UBND tỉnh Long An bahrau tabiak panuac brei thau bruk samar drah ka bala glut jaleih takai kraong Cần Giuộc saong kraong Vàm Cỏ Tây. Tui nan, glut jaleih rahtabiak di takai kraong Cần Giuộc (gah jalan tỉnh 826C, xã Phước Lại, Huyện Cần Giuộc) lac biak kan kandah, atah labaih 70 m. Di pak ini rahtabiak rilo labik talah praong labaih 6 - 8 cm, jaik takai jalan njauk glut jaleih labaih 8 - 10 cm, ngak kan kandah tal bruk salamat di dom baoh sang. Di takai kraong Vàm Cỏ Tây, kraong ribaong di dua puk Bến Kè, Nước Trong, Voi Đình njauk glut jaleih labaih 50 m, taneh glut jaleih saong mbang dalam meng mbaok taneh trun ala kraong meng 4 - 6 m. Tỉnh Long An ba tabiak dom jalan ngak samar drah, yau ye samar drah panduan ba rahra saong drap ar nao labik karei tabiak truh labik glut jaleih biak kan kandah saong labik mbuan rahtabiak glut jaleih; pacang cakak bhum daok glut jaleih saong labik mbuan glut jaleih, rami ramik padang ngak jalan salamat.

Urang dang akaok Iran brei thau lac halan hatian yam tal sa thỏa thuận haong phương Tây bo oh ngak kan kandah tal labik ngak hạt nhân di taneh ia ini. Gam haong nan ndom lac, phương Tây oh pacang hu Iran patagok vũ khí hạt nhân meyah taneh ia ini caong khin ngak yau nan. Min  Iran jeng ndom lac taneh ia ini oh khin ngak vũ khí hạt nhân kayua hatai jia agama di drei. Dom bruk ginum biai meng atah di Iran haong Mỹ piah pambuak veik thỏa thuận hạt nhân thun 2015 di Iran haong 6 taneh ia praong, khang oh duah hu jalan tabiak hadei di tuk dua gah jeng ndom lac gah daih ba tabiak dom caong khin oh njauk

Di negar Anh, nhiệt độ glaong meng di akaok bilan 6, tuk bahrau yam tame bilan pandiak, ngak suh sah ka bruk pambuak tal prein yava di rahra saong mbuan ba tal kurang ia. Di ban ine London di Anh bahrau hu nhiet do glaong abih kuhria meng akaok thun tal urak ini tagok tal labaih 30 độ C. Jabat An ninh Y tế Anh hu ba bruk cảnh báo tagok tal tanut "kanjik đậm" ka dom bruk mbuan ngak kan kandah tal prein yava di rahra kayua langik pandiak. Di Đức, tui kuhria nhiet do glaong jang tanut kuhria di yaok thun lac labaih 1 độ C dalam luac bilan pandiak, mbuan rahtabiak bruk pandiak bhang tua riya biak trak damak. Mbaok ia di dom kraong meda trun bier, ngak kan kandah tal bruk nao mai pajeng ba di jalan ia.

Hajan praong saong ngin khang ngak tayah tayac rilo labik di bhum tây bắc Pakixtan. Karja pak nan brei thau lac takik di nyu 27 urang metai saong 146 urang karei njauk rambus. Karja brei thau lac khat lahik biak trak damak kayua rilo sang glaong rilo tal dalam bhum njauk khut tayah hu padang ngak meng pandap mbuan jaleih yau ye kiak saong haluk kiak. Kuhria meng bilan 6 thun blaoh, ia sua praong khang jeng rah tabiak di Pakixtan ngak brei labaih 1.700 urang metai. Jabat kuhria mboh dahlau bruk langik tasik daok hu panuac ieu rahra paglaong hatai sangka anak bilan hajan ribuk yaok thun./.