Mintri jalan mbak pajeng ba hu harak brei tapa danak dak buh jien tame padang ngak jalan Hồ Chí Minh gah Chơn Thành - Đức Hòa piah pambuak abih jalan meng Pắc Bó (tỉnh Cao Bằng) tal Đất Mũi (tỉnh Cà Mau). Danak dak atah abih tih jaik 73km, labik camriep di xã Trừ Văn Thố di huyện Bàu Bàng, tỉnh Bình Dương; labik puac pambuak haong jalan roya N2 di huyện Đức Hòa, tỉnh Long An. Di vaktu parabha, danak dak hu 2 jalan radaih, tukvak ngak salah hu 6 jalan radaih. Danak dak hu yaom jien buh tame ngak abih tih jaik 2.300 tỷ đồng. Tui kuhria, danak dak hu peih ngak di dalam thun 2023 saong hu ngak salah di thun 2025.

UBND tỉnh Cà Mau hu pok panuac tagok Mintri Jalan mbak Pajeng ba, Cục Hàng không Việt Nam pasang iek, brei patui bruk pandar kapal haoh E190 di mblang kapal haoh Cà Mau yau jalan ngak dalam tukvak tapa mbiah tal tuk bruk pasiam jalan par trun tagok hu peih ngak. Tapa nan, hu daong lang talaih kan kandah ka tỉnh, pabak hatai caong di bhap bini saong doanh nghiệp dalam tỉnh. Dahlau di nan, jalan par nao saong mai Hà Nội - Cà Mau hu peih tabiak meng harei 29/4/2023.  

Bình Phước urak ini hu 41 bangsa takik ngan haong labaih 200.000 urang, meblah jaik 20% abih tih rahra dalam tỉnh. Tukvak tapa, peih ngak dom danak dak, bruk ngak di tỉnh, mBan Bangsa tỉnh Bình Phước hu peih bruk daong taneh daok, sang daok, phun jien ka mikva ngak mbang tabiak truh  kathaot. Min, kuhria tal akaok thun ini, Bình Phước jeng daok 2.830 baoh sang kan kathaot lac mikva bangsa takik. Anak bruk ini, mban Bangsa tinh brei thau lac, meda daong pato bruk ngak, yaih khan bruk ngak, brei masaiy jien ngak mbang, pala drak, pablei salih, buh jien tame bruk bac magru piah paglaong ilamo ka mikva, tani tanat raidiuk.

Di Đông Nam Bộ, dalam 1 adit jaik ini, yaom durian tagok khang. Yaom blei oh pilih ruah lac 80.000 - 90.000 đồng/kg, tagok 15.000 - 20.000 đồng/kg duk haong bilan 6. Ini lac yaom glaong takik mboh kayua urak ini lac bilan daok hu paik baoh. Yam ndok sa doanh nghiệp di bhum taneran kraong CL pablei durian tabiak negar langiu brei thau, Thái Lan jaik abih bilan durian, rilo menuac kuhria mboh dahlau lac yaom durian daok tagok. Min anak meta mboh lac yaom pablei di Trung Quốc urak ini oh lagaih haong yaom dalam taneh ia, mbuan ba tal rilo khat lahik ka doanh nghiệp pablei tabiak negar langiu.

Ia di 22 binek caik ia di Ninh Thuận urak ini daok labaih 69%, ginup ia pabak ka tinh dalam bilan pandiak. Langiu di nan, tinh jeng hu ngak salah Binek hạ lưu kraong Dinh piah caik ia taba saong pacang caga ia mbak njom tame, Ninh Thuận bhian hu thau tal lac bhum labik thu lagu abih di dalam taneh ia, hajan takik. Tui So ngak nong saong patagok palei pala, Ninh Thuận hu padang jalan ngak piah pacang caga haong El nino saong bruk njom ia mbak di thun 2023. Ini lac jalan langyah cambaih laih piah parabha, ngak samu ia pandar saong ia pabak ka dom bruk ngak pandar yaok harei karei.

Gah hàng không vũ trụ Ấn Độ daok caga peih tabiak jamriak eng drei ngak bruk di angaok mbaok ia bulan di harei paguh (14/7), piah brei mboh bruk taneh ia ini hu mbaok tame angan dom taneh ia cakrok dalam gah roh duah langik tasik saong thương mại vũ trụ. Bruk cuh tagok langik ini lac bruk camereip abih di Ấn Độ kuhria meng tuk Thủ tướng Na-ren-đra Mô-đi brei thau dom sarak jhul patagok bruk buh jien tame dom Cty tư nhân dalam gah vũ trụ saong vệ tinh. Dom urang ngak praong di Ấn Độ brei thau, hatai caong di Ấn Độ lac khin patagok thị phần dom bruk cuh vệ tinh vũ trụ dunya rilo jang 5 mbang dalam sa pluh thun tal.

 Sa mbang pandiak bhang dui atah meng California tal gah maraong Florida (Mỹ) di harei 12/7 bahrau blaoh. Tui kuhria dalam dom harei anak tal, nhiet do di dom labik meng 43-47 độ C yam tapa tanut kỷ lục di dom bhum gah Tây Nam negar ini. Dịch vụ langik tasik negar Mỹ hu patabiak dom  pato tacei, tui iek saong brei thau nhiệt độ biak glaong di dom bhum, labik hu labaih 100 triệu urang Mỹ daok. Dalam nan dom bang di Đông Bắc jeng daok glaih glar piah pasiam veik hadei di mbang bala hajan ia sua biak trak damak dalam dom harei jaik di ini. Tui dom urang roh duah ilamo gah langik tasik brei thau lac langik tasik dak harei dak trak damak di grauk labik di taneh ia Mỹ lac mai meng biến đổi khí hậu di dunya kayua anek manuac ngak tabiak.

Gah thú y dunya brei thau, bruk tamuh tabiak gam gam di jit kúm menuk ada tukvak jaik ini oh lac ngak brei trun biak khang hệ sinh thái động vật, bo daok ngak ka vi- rút mbuan njaom mbak tapa menuac rilo jang. Thun blaoh, 67 taneh ia hu dom mbang tamuh kúm menuk ada độc lực glaong H5N1 di menuk ada saong cim glai. Abih tih labaih 131 triệu menuk ada metai atau njauk ba nao am cuh klaak. Meng akaok thun tal ini, jit kúm menuk ada jeng daok mbak praong, hu 14 taneh ia brei thau lac tamuh jit. Njauk caik hatai lac di dom taneh ia, vi-rút H5N1 jeng hu mboh di mengiu saong sau.