Ngak bruk online haong dom tỉnh Long An, Bến Tre, Trà Vinh, Sóc Trăng, Bạc Liêu, Kiên Giang saong Cà Mau ka bruk pacang caga njom ia mbak, dalam harei kabroi, Phó Thủ tướng Trần Hồng Hà hu mboh dom kham marat di dom bhum palei dalam bruk pacang caga njom ia mbak. Phó Thủ tướng mboh lac, ilamo dalam bruk pacang caga njom ia mbak di dom bhum palei njauk hu jalan maong atah ngan haong bhum taneran saong tui jalan lac meda kan kandah jang kayua kurang ia taba meng akaok halau ia. Suai lavik, dom bhum palei njauk kuhria tal bruk pambuak haong dom sang mac pabak ia piah ba ia hacih mai ka rahra.

Jaik 44.000 menuac di huyện Tân Phú Đông, tỉnh Tiền Giang daok dang anak bruk mbuan si kurang ia taba. Bruk pandar ia taba daok tagaok tal 10.000m3 yaok harei, dalam tuk ia meng dom sang mac tok pabak hu 8.500m3. Anak bruk yau ini, bruk daong meng dom labik karei dalam tinh lac bruk njauk ngak piah khik ka raidiuk saong prein yava bhap bini dalam huyện. Nan ye, yaok jalan ngak di anak mata saong suai lavik piah pabak ia ka bhap bini jeng daok hu tỉnh Tiền Giang pasang iek piah langyah. 

Di puk An Thành, xã Cù Lao An Bình, huyện Long Hồ, tỉnh Vĩnh Long daok hu mboh dom bruk mbuan ba tal glut jaleih taneh atah labaih 100m ngak kan kandah tapak tal 4 baoh sang saong 25 baoh sang karei daok dalam bhum. Urak ini, labik ini daok rahtabiak bruk mbuan ngak brei glut jaleih atah di takai kraong meng 18m tal 23m. Kanja palei hu jak ba rahra panduan ba dom pandap panda, oh daok dalam sang piah plaih nyaih dom khat lahik. Bruk njauk caik hatai nan lac, bhum glut jaleih ini tok atah bến phà An Bình labaih 100m di gah hạ lưu. Tui pasang iek, Bến phà An Bình lac sa dalam dom makna ba tal glut jaleih di bhum ini.

Pambuak tal bruk urang njauk ruak cúm A (H9) camereip abih di  Việt Nam, TS.BS Nguyễn Vũ Thượng – Phaok akaok Viện Pasteur TP.HCM brei thau, urang ruak lac lakei, umo 37 thun, hu dom ruak dahlau dalam rup yau ye xơ gan, me-ik saradang. Urang ruak tame sang iek ruak Ruak Nhiệt đới TP.HCM tuk njauk ruak sru la-an, viêm phổi trak saong kan suak yava. Ini lac sa dalam dom urang njauk ruak cúm di dunya saong lac urang ruak camereip abih di Việt Nam. Meng bilan 3, urang pan akaok Mintri Y tế saong Mintri ngak nong saong Patagok palei pala hu tacei pato bruk pacang caga jit, abih di nyu lac dom ruak njom mbak meng athur tapa menuac, dalam nan hu ruak cúm menuac ada. 

Sang iek ruak Đa Khoa Thanh Vũ Medic Bạc Liêu bahrau blaic raih mek 15 asal randaih meng sang ma-ik di sa urang ruak umo 65 thun. Urang ruak lac ong Trần H. mai iek ruak tuk kan ma-ik, ma-ik hasit biak suai. Dahlau di nan, ong H. hu manyum jru taong ruak tiền liệt tuyến rilo thun min ruak dak harei dak jhak nao, pandik rilo di labik hạ vị. Tapa iek ruak, dom bác sĩ chuyên khoa ngoại thận tiết niệu mboh lac urang ruak hu rilo asal randaih praong dalam sang ma-ik gam tagok sinh tuyến tiền liệt. Hadei di 60 minit blaic raih piah mek asal randaih, dom bác sĩ hu mek tabiak 15 asal ndaih praong sit tabiak truh sang ma-ik, dalam nan hu asal praong abih lac samu baoh manuk.

Cảnh sát saong bol lin Thái Lan daok dalam báo động glaong, dalam tuk mesruh gauk di bol lin Myanmar saong dom gah brok tagok di labik jaik taphia negar 2 taneh ia. Gah brok tagok hu mek khik rilo phao ndao lac baoh pacah, súng cối, súng máy, súng phóng lựu, yaok ratuh mbaik phao súng trường saong rilo siu phao di bol lin Myanmar.  Truyền thông Thái Lan ndom lac, ini daok lac bruk khat lahik biak trak damak di karja quân sự Myanmar kayua Myawaddy lac ban praong ka 4 di taneh ia ini. 

Tuk bilan eik Ramadan jaik tamat, rahra di grauk labik pak Pakistan tuh mai pasak blei pandap saong darak pasa meng kan, caga ka harei roya Eid al Fitr, lac harei roya tamat bilan eik Ramadan. Thun ini, meng urang blei tal menuac pablei jeng brei thau lac lạm phát nyu ngak ka prein blei trun biak rilo, yaom pandap panda meda lac tagok dua mbang dut saong tukvak ini di thun blaoh. Pakistan daok gaok dom cuang kandah di lạm phát (tanut glaong abih lac 38% di bilan 5 thun blaoh), sa binah lac kayua njauk kan kandah meng dom jalan kak je piah pabak panuac ieu kakei di Kadung jien dunya (IMF).

Báo Bưu điện New York ba panuac pathau khan di dom chuyên gia lac mbuan rah tabiak jit praong cúm menuac ada trak damak jang 100 mbang duk haong jit COVID-19. Tui dom chuyên gia, H5N1 hu mboh di rilo janih athur di mangaok dunya saong mboh lac daok njaom mbak tapa rilo janih athur karei, rilo meng lac janih athur hu tasau, kuhria gam anek menuac. Pasak pasang iek saong pacang caga jit ruak di Mỹ kakei lac bruk virus cúm menuk ada njaom mbak tapa athur raong brei mboh lac virus daok salih karei./.