Nyaom biai ngan haong kadha: “Jayah praong bal Pataih thun 1975 haong jaman patagok bahrau di taneh ia Viet Nam”, kayua Mentri Quoc phong dang ngak hu rah tabiak di harei 20/4 anak tal di Ban raya Ho Chi Minh. Nyaom biai piah brei mboh saong ngak tantu cambaih laih Jayah praong bilan Pataih 1975 lac jayah di hatai yasa taneh ia saong hatai caong ka sron mbon salamat di rahra Viet Nam; lac sa jayah di hatai oh huac metai lahik, hatai sahneng di urang Viet Nam saong prein khang di hatai gul pataom gauk di taong abih bangsa adei sa-ai pagam haong prein khang dalam mbang kalin kan mesuh metak taong Mỹ, daong taneh ia.

Uy mban bhap bini tinh Dong Nai birau ba tabiak Bruk peih ngak Danak dak tatua Mã Đà saong dom jalan pambuak haong tinh Bình Phước. Tui nan, tatua  Mã Đà hu padang ngak dalam bilan 6 ini saong ba tame pandar dalam bilan 12 thun 2025. Padang ngak jalan pambuak meng tatua Mã Đà tal jalan Vành đai 4 - TPHCM dalam bilan 6 thun 2026, ba tame pandar di thun 2028. Roh duah piah ngak pabak veik dom jalan pambuak haong tinh Binh Phuoc.

Tinh Bac Lieu bahrau peih mbang Pataom mbaok di bingun Tet Chol Chnam Thmay di bangsa Khmer. Di var pataom mbaok, Akaok UB Bhap bini tinh Bac Lieu Phạm Văn Thiều caong lac dom ong su sai, urang jakar, bol lin saong mikva bangsa Khmer patui veik patagok bruk gul pataom, ngak siam dom jalan, sarak di Ndang, hukum di Karja; chreih chrai hu mbaok tame dom danak dak pakacah anit ranam taneh ia, padang palei pala bahrau…Bingun ini, urang dang akaok tinh Bac Lieu hu alin hadiah ka 22 su sai dang akaok baha agama Bhat Nam tong saong alin hadiah jien pachreih bac ka 20 anek saih, sinh vien urang bangsa Khmer.

Kong an tinh Soc Trang birau mek hu 5 urang umo meng 15 tal 18 thun daok di ban Soc Trang piah duah thau ka bruk pametai manuac. Kayua bruk oh njauk gauk meng dahlau, tal melam 8 bilan 4, tuk nao angaok jalan Tôn Đức Thắng, dom urang nan mboh Nguyễn Ngọc Lộc saong Nguyễn Minh Nhựt, peih radaih angaok jalan haong gauk blaoh pagui tui Lộc saong Nhựt  tame tapen jalan. Hadei di nan, dom urang suak to saong ndon tamo bao hiem taong tame saong peih radaih moto gilik tapa rup Lộc saong Nhựt. Hadei di nan, dua urang nan hu ba tame sang iek ruak chip min  Nguyễn Minh Nhựt metai.                         

Biar harei mesup kabroi 10/4, hajan praong dui atah pagam tui hajan patau ngak dauk dalam dom jalan di tinh Binh Duong, ngak ka jalan mbak gaok kan kandah, khat lahik ka drap ar jien padai saong ngak kan kandah tal bruk daok dang di rahra. Tui Rayo Kuhria mboh dahlau langik tasik bhum Meraong negar, langik di tinh Binh Duong saong dom tinh jaik taphia dalam dom harei anak tal dak harei dak takik pandiak hadei rilo harei pandiak khang nan mbuan rah tabiak angin khang, katal klak, hajan patau. Kayua nan rahra brei caga langik oh lagaih, khik kajap salamat ka drap ar saong bruk diuk rai dalam tukvak anak tal.

Urak ini langik La Nina tamat hadei 3 bilan saong Baoh taneh urak ini daok kreh bilan El Nino. Ini lac bruk siam abih dalam klau bruk ba tal ribuk jhak, tua riya, ia sua saong pandiak tagok di baoh taneh. Tui Jabat Khik iek  langik saong ia tasik taneh ia Mỹ, bruk ini dui atah jaik abih thun 2025. Bruk nan ngak kan kandah jang dalam bruk dut kuhria mboh dahlau ka langik tasik. 

Sa sruh kapal haok  truc thang laik trun kraong Hudson di ban New York, Mỹ ngak metai 6 urang. Dom video di mang xa hoi brei mboh sruh kapal haok  Ben 206 mbleik kandang saong ralo njauk ia dauk. Rilo kapal gilai daong bala  hu ba mai labik ini. Bhum Manhattan lac labik hu kapal haok par nao mai biak ralo gam kapal haok yulit saong kapal haok di ta-eng urang. Dalam dom thun tapa hu rah tabiak rilo mbang bala kapar haok di labik ini.

Dom urang metai dalam mbang glut tabung sang kalup kapol melam di ban ine Cộng hòa Dominica meng akaok adit tagok labaih 200 urang. Dom urang bol lin brei padeih daong saong salih tapa ramik dom urang metai, jaik abaih dalam nan oh ka thau angan je thei. Bruk ba tal bala urak ini daok hu ngak brei cambaic laic. Ini lac kalup kapol  melam hu padang dahlau di ini 50 thun saong praong brei tal 500 urang tame./.