Pahadar 50 thun Harei Peih paha gah Meraong negar, yasa taneh ia (30/4/1975 - 30/4/2025) saong pamaong tal 80 thun padang rayo Sap ndom Viet Nam (VOV) (7/9/1945 - 7/9/2025), malam kabroi, VOV padang danak dak chinh luan adaoh tamia hu makna “Ragu ragam jayah”. Danak dak ba tuai damuai gilac veik mon 11 tuk meteh harei 30/4/1975, tuk hala dok di Bol lin Peih paha hu klauk di angaok pabung sang Dinh Doc Lap (urak ini lac Hoi truong Thong Nhat), Ban raya Ho Chi Minh, brei mboh ka bruk tayah jaleih taong abih di karja Sai Gon; jalan mesuh taong khamang Ho Chi Minh mek hu jayah. Tukvak khau tin jayah hu papar tapak angaok Rayo Sap ndom Viet Nam di kreh pandiak jala harei 30/4/1975 jeng sa tukvak sajarah.

Raya Vesak LHQ thun 2025 meda peih ngak meng harei 6 tal harei 8 bilan 5 anak tal, di Hoc vien Phat yao Viet Nam, Ban raya HCM. Kadha praong di Raya Vesak thun 2025 lac “ Jum pataom saong hatai anit ranam khik siam rup di anek manuac: Jalan sahaneng di Phat giao caong khin sron mbon salamat  dunya saong patagok khang kajap”. Tui kuhria hu labaih 2.000 urang lambaok vakil mai meng labaih 80 taneh ia saong 5 bhum taneh mai hu mbaok tame. Ini lac bruk lagaih piah yaih khan thaot binguk taneh ia, anek manuac Viet Nam caong takre  salamat, anit ranam, jum pataom saong njuak hatai yau gauk.

Ca Mau brei padang danak dak adaoh tamia pagam haong cuh phao bingu pahadar 50 thun harei Peih paha gah Meraong negar, yasa taneh ia (30/4/1975 – 30/4/2025). Danak dak rah tabiak di Bein bingu phuong 9, Ban Ca Mau. Jien buh tabiak peih ngak danak dak adaoh tamia meng kadung jien di Ban Ca Mau tui bruk pasang iek saong jien peih bruk cuh phao bingu meng bruk rik daong di rahra tui adat hukum.

Pamong tal bruk pahadar 80 thun Harei padang Kong an bhap bini Viet Nam (19/8/1945 - 19/8/2025), Nyaom kapol kapulan Kong an bhap bini di bhum 4 kayua Mentri Kong an peih ngak di Ban Rạch Giá, tỉnh Kiên Giang. Hu mbaok di 23 Kapol kampulan bhap bini saong labaih 1.000 urang lambaok vakil  lac urang lin, urang daoh tamia. Ini lac piah ka urang jakar, urang lin, urang daoh tamia hu pataom mbaok bac megru di gauk, peih praong duah thaau ilamo di dom bhum palei, di jabat Mentri  saong Kong an dom bhum palei, di gah CA bhap bini saong Bol lin bhap bini.

Piah daong urang ngak bruk tinh Tra Vinh peih ngak rilo sarak brei mesraiy rilo abih 150 trieu dong ngan haong jien laba lap, daong oh bayar hilac meng 12 tal 17 trieu dong patui tame yaok urang. Gam haong nan peih dom mbang meyao meyit bruk ngak, pambuak haong dom gah ngak mbang pablei salih hu angan je. 5 thun tapa, tinh Trà Vinh daong samu rahra, abih di nyu nan lac mikva urang bangsa takik, ba labaih 4.100 urang ngak bruk nao ngak bruk, bac megru di negar langiu, rilo di Japon. Kuhria rah tapa yaok urang ngak bruk pataom hu labaih 600 trieu ong hadei tuk salah blaoh harak pambuak bruk.

Tong thong My Donald Trump birau mbaoh tangin ba tabiak harak pandar tri tue nhan tao AI tame danak dak pato bac dalam sang bac. Dom anek saih di Mỹ hu bac kadha camereip saong thau pandar njauk piah bac sumu saong patagok dalam xa hoi dak harei dak hu pandar taka so. Dom danak dak patagok  lagiah hu pataom tame pato pasram AI brei gru pato bac tacei pato anek saih, sinh vien. Sa kapol  pato bac AI meda hu padang tabiak piah pachreih bruk pambuak haong bruk di urang gah langiu piah pato AI ka anek saih, sinh vien.

Rajaei Thai Lan pathau khan patui veik ngak catang bruk pasang iek pakao hala ndien tu saong kakei dahlau ka urang njuk pakao meda njauk taong bhat daok guk tagok tal 5 thun atau njauk taong bhat paok jien samu tagok 4 mbang yaom kaom ndap nda njauk pakauk. Tui dom urang chuyen gia, ruak pambuak tal bruk njuk pakao ndien tu daok lac sa naong trak ka gah y te, ngan haong labaih 300 trieu Baht jien (labaih 9 trieu dolla My) dalam hun 2024. Dom ruak kayua mai meng bruk njuk pakao hala ndien tu meda khan tal dalam nan hu: gan phoi man tinh, dot quy, pandik baoh hatai saong kurang suan yava…

Dom urang ilamu di Trung Quoc birau ini ngak tabiak mac manuacn biak sit ngak hu bruk salih thaik thaok karei tui hatai caong takre yau dalam flim Transformers, tui nan ngak bruk hu di ala taneh saong angaok langik. Bruk robot oh lac nao takai- tabak, nduac, plong chiat, par saong ndik pajan, bo  daok ngak brei thaok karei hu kajap lac bruk hu makna praong dalam bruk parilo  bruk pandar robot.