Salam uan harei pahadar 50 thun Harei Peih paha gah Meraong negar, yasa taneh ia (30/4/1975 - 30/4/2025), tinh Binh Duong padang peih rilo danak dak siam gheih ka rahra. Bruk njauk caik hatai dalam malam ini (25/4) lac danak dak nghe thuat biak gheih hu rah tabiak di mblang adaoh tamia pasak Ban Bahrau Binh Duong. Bruk ini pataom rilo urang nghe si, dien vien danei angan mai parang iek, duh ka rahra rilo kadha adaoh tamia hu dak padang biak siam gheih. Abih di nyu nan lac, danak dak daok hu mbaok di radaoh hu rahra ba hatai anit ranam lac Hòa Minzy, pagun sanya “ngak tanrak hadah” mblang adaoh tamia.

Page ini, biak rilo bhap bini saong tuai damuai di Ban raya HCM hu pataom mbaok tame bein Ben Bạch Đằng, Quận 1 piah thaok binguk labik radaih pajeng phao saong iek kapal ahaok tuan hala dok, gam ahaok tiem kich par trun par tagok angaok langik. Mon 9 tuk, dom kapal ahaok di Bol lin Phong khong - Khong quan pasram par haong gauk ba tui hala daok Negar saong hala dok Ndang. Rilo tuai damuai khan lac, urang mai meng rilo bhum palei piah ba drei tame chreih chrai harei jayak praong 30 bilan 4.

UB Bhap bini tinh Tien Giang bahrau ba tabiak jalan ngak ka Sarak ramik tinh Tien Giang saong Dong Thap jeng tinh Dong Thap (bahrau), pasak hanh chinh – chinh tri hu padang di ban Mỹ Tho, tinh Tien Giang. Hadei pagam, tinh Dong Thap (bahrau) brei tani tanat bruk ngak ka labaih 22.600 urang jakar, cong chuc, vien chuc. UB Bhap bini tinh Tien Giang hu pasang iek, kuhria, padang jalan ngak patui veik ramik radak, pandar dom labik sang, taneh, ngak bruk salih panduan ka jabat, labik, oh luai rah tabiak palai lahik.

Page ini, tinh Soc Trang peih bruk jao brei paok jien bac Kadung jien pachreih bac Dương Kỳ Hiệp ka anek saih kathaot yam tapa kan kandah, bac megru naih joi. Mban peih bruk hu jaoh brei 240 paok jien bac, yaok paok yaom 1 trieu dong saong alin 2 paok jien bac taong abih gah, yaok paok 3 trieu dong ka anek saih kan kandah, metui medhua, jaoh jo, bangsa Khmer di tinh. Mbiah tal ini, Kadung jien pachreih bac Dương Kỳ Hiệp taduan jaik 6,6 ti dong saong jao brei 2.700 paok jien bac ka anek saih hu raidiuk kan kandah bangsa Khmer hu nao bac.

UB Bhap bini tinh Dak Nong hu mbaoh tangin ka phun jien 600 ty dong piah pakajap, pasiam jalan Tinh lo 1 pambuak huyen tapen negar Tuy Đức saong huyen Đắk R’Lấp gam  jalan Ho Chi Minh. Jalan praong 9 met, atah abih jaik 26 km. Danak dak kayua Gah Pasang iek dom danak dak buh jien tame padang tinh Dak Nong ngak po buh jien tame. Dalam bilan 4/2025, brei ruah gah dang ngak; tal bilan 6 padang bruk kuhria saong da-a urang dang ngak; puac bilan 7 brei ruah gah dang ngak ba tame bruk padang ngak. Kuhria tal abih thun 2025 salah blaoh meng 20 – 30% jalan.

Mentri Ngoại giao Philippines Enrique Manalo khan lac, Hiep hoi dom taneh ia Đông Nam Á (ASEAN) saong Trung Quốc sanya ka bruk chinh tri samar ngak brei salah Bo Quy tac langyah di tasik Bien Dong (COC) thun anak. Urang dang akok jabat brei panuac ka Hoi dong An ninh Taneh ia Jonathan Malaya taong yaom dom mbang  ginum biai COC daok suai damuai, tui nan brei mboh hatai caong takre tal tuk Philippines dang akaok ASEAN di thun hadei, Bo quy tac langyah di tasik Bien Dong COC hu ngak salah blaoh.

Rajaei negar Anh harei kabroi brei thau ka paok jien buh tame hu yaom 400 trieu dolla Mỹ tame ndien meng hangin tuk negar ini dang peih ngak Nyaom biai pakat glaong ka an ninh nang luong harei hadei. Urak ini, negar Anh hu meteh ndien ngak tabiak meng angin saong ia harei, meneing daok veik meng athak cuh saong nang luong hat nhan. Anh ba tabiak bruk kuhria ngak tabiak taong abih nang luong meng dom gah ngak tabiak meng janih karei dalam thun 2030./.

Mentri Khung hoang langik tasik saong Khik caga bhap bini Hy Lạp harei kabroi khan lac taneh ia ini brei peih urang daong padam khuah  rilo abih dalam thun ini  piah caga “ bruk jhak rah tabiak” kayua apui khuah glai. Hy Lạp kuhria dahlau brei ba jaik 18 ribau lin padam apui, gam yaok ribau urang halan hatian mai ngak bruk. Langiu di nan, piah samar thau apui khuah glai, Hy Lạp ba tame ngak 80 ahaok par oh hu manuac peih hu pagam meta camera dut iek pandiak, tagok dua mbang dut saong thun dahlau./.