Labaih 800 urang vak mbao dalam taneh ia saong dunya tut angan ngak bruk di Raya praong 30/4 anak tal. Rayo Sap ndom Viet Nam (VOV) saong Rayo Papar binguk Viet Nam (VTV) ngak bruk brei papar sap, papar binguk tapak riyak negar di Harei pahadar 50 thun Peih paha gah Meraong negar, yasa taneh ia. Ong Nguyễn Văn Khanh, Phaok Yam ndok Pasak harak mbao Ban raya Ho Chi Minh brei thau, hu 810 phong vien di labaih 100 jabat pathau khan, harak mbao dalam negar saong dunya ngak bruk di harei Raya praong 30/4 anak tal. Dalam nan, hu 630 phong vien dalam negar saong 180 phong vien negar langiu tut angan.

Kadha “Hiep dinh Paris tal Jayak praong bilan Pataih thun 1975” daok hu parang iek di Gilang khik piah Inem krung Mesruh metak, TPHCM. Ngan haong 140 pandap, thaot binguk, harak tai lieu, yaih khan thun bilan rilo rambah rambeip, kan kandah min biak hadah mbaok meta di bangsa. Tapa nan daong ka urang mai mong iek hu mboh bruk biak biai saong biak druat druai ka bruk mesruh metak khang kadang di bol lin saong bhap bini Viet Nam di mblang mesruh metak, chinh tri saong gah bol lin.  Meng dom bruk njauk peih ngak biak samar drah, tui jalan tacei ba taong kalin biak naih joi tal tukvak metai diuk haong khamang, taong abih hasa hatung hatai yau gauk kham merat khang kajap yau kali yau pasei piah taong abih bangsa dalam bruk mesruh metak, rik tame ngak jeng Jayak praong bilan Pataih thun 1975.

Pahadar 50 thun harei peih paha gah Meraong negar yasa taneh ia (30/4/1775 – 30/4/2025), Gilang khik drap ar Quan khu 9 di Ban Can Tho peih bruk parang iek ngan haong kadha “50 thun danei miat miat kadha jayah praong”. Danak dak hu parang iek labaih 300 tai lieu, thaik thaot, ndap nda saong labaih 100 baoh tapuk ndom ka makna, labik dang, makna sajarah praong dalam di Jayah praong bilan pataih thun 1975, tapa nan daong pato pakai urang jakar, bol lin saong Rahra di dalam bhum, abih di nyu nan lac rai hadei patagok bruk katmang, pabak hatai anit ranam taneh ia, hatai hadah mbaok meta ka negar.

Dom harei ini, di dom darak pasar meng kan lavik mai di Ban raya HCM saong rah tui tapen jalan pasak Ban raya, rilo urang tuan hala dok, me-om ndon, tuan bangron, ngui ao, tauk sticker…thaok binguk hala dok meriak bhong patuh kanjik piah cang pahadar 50 thun Harei peih paha gah Meraong negar, yasa taneh ia. Di dom darak meng kan mai yau Thị nghè, Bà Chiểu, quận Bình Thạnh; darak Tân Định, Đa Kao, Quận 1...tuan bak hala dok meriak bhong patuh kanjik uan raok raya pahadar harei 30 bilan 4 anak tal.

Harei raya 30/4 - 1/5 thun ini, tinh Tay Ninh caong takre raok hu parilo tuai damuai, kuhria mboh dahlau hu meng 25% tal 30% dut haong tukvak ini thun dahlau. Tuai damuai mai Tay Ninh dalam bingun ini di 4 labik jirah rivang hu makna dalam, nan lac: Labik inem mek sajarah saong labik gheih mekre ceik Bà Đen, Toa thanh Cao Đài Tay Ninh, Binek kavei Dầu Tiếng saong Inem mek pakat negar Labik Trung uong Cục gah Meraong negar. Tinh daok peih rilo danak dak ilamo – adaoh tamia yau ye: parang thaik thaot, nyaom darak pablei ndap nda bhum palei, parang iek nghe thuat, cuh phao bingu salam uan 50 thun peih paha…

Urang kumei Demi Moore danei angan di Hollywood birau hu harak tap chi People pok meyaom lac Urang siam biai abih di dunya di thun 2025. Umo 62 thun, Demi Moore hu angan dalam flim mek hu yai thuong birau ini dalam bo flim bhut bhong The Substance, dalam nan amuk  tame angan sa urang pato pasram rup pabhap umo thun taha daok pagui tuk tukvak yaok harei tapa. Dalam flim, muk biak joi ba drei tame piah ngak ka dalikan di Hollywood.

Ngan haong kadha “Padang veik xa hoi harei hadei ka raidiuk di khol drei”, Bruk parang iek Dunya EXPO 2025 peih pakak bahrau ini di Japon, hu 158 negar saong bhum taneh ia tame. Parang iek jeng pamaong tal bruk ngak kuhria ngak hu jeng biak xa hoi 5.0 di Japon, ba mai bruk ginup meda ka rahra meng bruk pandar hu lagaih abih kong nghe khau tin, pagam tame ngaok mang saong gah langiu.

Du lieu birau abih meng Cuc khik iek tasik saong langik Mỹ brei mboh, dom mran karang di dunya  daok yam tapa tukvak ngak patih mbong di dunya mbang ka 4 praong abih kuhria meng lavik mai. Dom karang nan metai hu mboh takik abih di nyu lac 83 taneh ia  saong bhum taneh. Karang patih  tuk tasik pandiak tagok, ba tal dom tảo diuk dalam karang tabiak gah langiu. Yau nan min, dom mran karang meda diuk veik meyah ia tasik hu siam la-ar gilac.