Dang akaok nyaom biai mbang ka 2 Kapol ngak bruk daong Mban tacei ba jalan Karja dom danak dak hu makna praong pakat negar, praong di gah jalan mbak piah tacei ba peih ngak dom bruk dom daknak dak jalan pasei  do thi ban Ha Noi saong Ban raya HCM, Phó Thủ tướng Trần Hồng Hà khan lac: Dua ban nan brei pambuak bruk haong dom mentri, gah đơn vị pambuak tal peih ngak catang njauk tukvak, dalam nan jalan pasei Bến Thành - Suối Tiên hu ba tame pandar di bilan 11 thun 2024, jalan pasei Nhổn – ga Hà Nội ba tame pandar puac bilan 7 thun 2024. Ngan haong danak dak patagok jalan pasei do thi, Phó Thủ tướng Trần Hồng Hà caong khin: Mentri Jalan mbak pajeng ba saong dua ban nan brei ba tabiak jalan ba ngak dom thiet ke dang akaok dunya gah jalan pasei tuk padang ngak danak dak.

Mbang nyaom ka 17 HĐND TP.HCM mbang X, vaktu 2021 – 2026 hu tamat blaoh di tuk mesup ini. Mbang nyaom brei tapa 37 sarak ka patagok KT – XH saong dom asal kadha karei. Akaok HĐND TP.HCM Nguyễn Thị Lệ brei thau, ini lac dom Sarak biak hu yaom glaong, ba jalan ka dom jabat chức năng peih ngak piah patagok KTXH saong raidiuk di bhap bini ban raya thun 2024 saong dom thun patui di nan. HĐND TP.HCM hu panuac ieu UBND TP langyah dalam, taong yaom bruk, kuhria mboh aval dom bruk KTXH 6 bilan puac thun 2024 piah hu jalan caga dahlau.

Mentri Pato megru hu khan brei thau điểm dom mon pakacah. Tui nan, maong rah tapa,  điểm dom mon pakacah tamat THPT thun ini jeng daok khik hu bruk tani tanat saong sumu haong điểm dom thun dahlau. Tapa điểm pakacah brei mboh Mbang pakacah tamat THPT thun ini mek hu ginup dom bruk ba tabiak, nan lac taong yaom bruk bac da-a di anek saih tui bruk ba tabiak di gah pato megru tui danak pato pho thong; pasang iek brei tamat  bac THPT saong nan lac jalan piah taong yaom bruk pato saong bac di sang bac pho thong saong bruk tacei pato di dom jabat khik iek gah pato megru.

UBND tỉnh Tiền Giang hu pok meyaom saong alin harak meyaom gam haong jien thưởng brei ka 10 sang ba akaok nao dahlau dalam bruk jao mbaok taneh piah ngak danak dak padang ngak jalan radaih nduac samar Cao Lãnh - An Hữu, tukvak I. Danak dak ini nao tapa 2 tỉnh Tiền Giang saong Đồng Tháp, atah jaik 12km. Piah peih ngak danak dak binah 2,  tukvak 1 tal urak ini, tỉnh Tiền Giang hu ngak salah bruk bayar jien, daong ka dom sang hu taneh njauk mek ngak jalan.

Jalan huyen Rau Cần - Xã Khánh (labik tapa palei Phú Thạnh, xã Phú Long, huyện Châu Thành, tỉnh Đồng Tháp) glut jaleih trak ba tal klaoh jalan nao mai. Labik glut jaleih atah 60 met, mbaok jalan njauk ia ba theik  trun kraong, talah ra-ai jaik sang rahra. Glut jaleih ngak ka jalan klaoh, radaih oh nao mai hu. Tuk bruk glut jaleih rah tabiak, karja palei brei  pacang veik, tuan talaoh vak akhar brei thau saong katung talei pacang vin taom dar, oh brei menuac mai jaik  mbuan gaok bala. Urak ini karja palei daok ba tabiak jalan ngak  pasiam piah daong bhap bini nao mai hu siam mekre, salamat.

Patui khan ka bruk 6 urang matai di Thái Lan. Mesup ini, Cảnh sát Thái Lan hu peih họp báo brei thau makna di bruk nan. Cảnh sát khan lac meng kandah gauk kayua bruk nyim jien, tavak sraiy, 1 dalam 6 urang metai lac menuac  đầu độc pametai 5 urang daih. Cảnh sát jeng duah mboh hu angan urang ka 7, daok dalam bilik haong 6 urang nan. Urang ini tabiak truh Thái Lan, mai veik Việt Nam meng harei 10/7. Dahlau di nan, melam 16/7, tapa pasang iek mboh lac bilik di dom urang matai hu kreik meng gah dalam saong oh mboh hu bruk lac hu menuac meng gah langiu tame.

Harei ini, Nga saong Ucraina peih palao 90 lin njauk cap mek tui sa harak sanya kayua Dom Tiểu vương quốc Ả Rập Thống nhất (UAE) dang tabiak pambuak bruk. Yau nan min, urak ini dom jabat  karja Nga saong Ucraina jeng oh ka brei panuac hagait ndom tal bruk nan. Nga saong Ucraina hu dom mbang ginum biai peih palao lin njauk cap mek dalam brukg mesruh gauk dui atah 27 bilan tapa. Bilan dahlau, jeng ala bruk dang tabiak di Dom Tiểu vương quốc Ả Rập Thống nhất, Nga saong Ucraina hu peih palao yaok gah 90 urang lin njauk cap mek.

Sa bala radaih bus biak khang di Tây Nam Peru, tuk mesup harei 16/7 tui mon di labik nan, ngak brei takik di abih 26 urang matai, labaih 10 urang njauk rambus. Bala rah tabiak tuk sa sruh radaih bus nduac meng tỉnh ini tapa tỉnh daih takhuah saong laik trun labik ceik dalam labaih 200 mét. Tuk nan, angaok radaih bus hu jaik 40 menuac. Peru lac taneh ia hu dom bala gah radaih peih angaok jalan rilo abih dalam bhum. Thun 2023, hu labaih 3.130 urang matai dalam labaih 87.000 mbang bala./.