Phó Thủ tướng Trần Lưu Quang bahrau mbaoh tangin tame Sarak pok angan 17 kapul hành chính pakat xã di 3 huyen dalam tỉnh Vĩnh Long lac dom xa salamat labik daok di Trung ương dalam bilan mesuh metak pacang kol France saong kol Mỹ dalam nan hu 6 xã di huyện Trà Ôn, 5 xã di huyện Tam Bình saong huyện Vũng Liêm hu 6 xã. Dom xa Salamat labik daok ini hu peih ngak sarak hu kein lagaih tui dom adat urak ini.

Hải đoàn 129 Quân chủng Hải quân pambuak bruk haong mBan Tuyên giáo Tỉnh ủy Hậu Giang, Kadung jien bac Vừ A Dính bahrau jao brei baoh sang anit ranam ka sang sarak karja daok di xã Hoà Mỹ, huyện Phụng Hiệp. Baoh sang hu padang ngak haong yaom jien 110 triệu đồng, meng Kadung jien bac Vừ A Dính saong jien daong di urang jakar, urang lin Hải đoàn 129. Meng thun 2009 tal urak ini, Hải đoàn hu peih bruk padang ngak 34 baoh sang anit ranam di rilo tinh ban, ta-eng tỉnh Hậu Giang lac 16 baoh. Ini lac bruk ngak tui jalan  “Menyum ia hadar halau ia” di bangsa drei 

Dalam bilan padeih hè, amaik ame daok pak dom phum, soc hu rilo mikva bangsa Khmer di dalam tỉnh Bạc Liêu lac chreih chrai ba anek mbik di drei nao tal paha piah bac akhar Khmer. Ini jeng lac bruk ngak lagaih, hu makna di dom amaik ame dalam bruk khik ramik, patagok dom yaom glaong di sap ndem, akhar vak di bangsa Khmer. Thun 2024, UBND tỉnh Bạc Liêu hu daong 520 triệu đồng ka urang pato sap saong akhar vak Khmer dalam tuk padeih hè. Ini lac sarak angan je di tinh, taphia di bruk peih ngak ginup, samar drah dom jalan ngak, sarak praong di Ndang saong Kanja ngan haong mikva bangsa takik.

Njauk sau gila kaik min oh nao klauk jru pacang caga, sa urang likei daok di huyện Bù Đăng, tỉnh Bình Phước matai. Harei 13/6, urang ruak labuh ruak khang, ngak brei rup glaih glar, pandiak dalam rup, pandik cambaoh abih rup saik, mbang huak takik, kan luan, huac ngin, huac la-an, huac ia. Tal harei 14/6, ong hu ba tame sang iek ruak saong hu bác sĩ mboh lac njuak ruak sau gila kaik. Tal harei 17/6,kayua ruak biak trak, ong matai nao. Dahlau di nan, di bilan 2/2024, ong nan haong  5 urang karei najuk sa drei sau kaik. Yaom lac hu urang khan lac sau kaik nan nyu matai ye, min abih 6 urang njauk sau kaik jeng oh hu urang halei nao klauk jru pacang caga ruak sau gila kaik. 

Tukvak jaik di ini, Hậu Giang hu mboh yaok piluh labik glut jaleih bahrau ngak sarau kadau tal raidiuk di rahra. Mbang glut jaleih rahtabiak di xã Phú Hữu, huyện Châu Thành. Tui kuhria hu labaih 300m2 taneh lahik, jaik 50m jalan mbak nao mai jeng paduan nao. Mbang glut jaleih mbang dalam jaik 10m ngak kan kandah tapak tal 3 baoh sang gah dalam. Mikva daok panduan ba nao labik karei samar drah, plaih nyaih di labik glut jaleih. Tuk camriep, yaok baoh sang hu daong 30 triệu đồng. Kuhria meng akaok thun tal urak ini, Hậu Giang rahtabiak 22 labik glut jaleih ar takai kraong, lahik labaih 3 ribau m² taneh, tui kuhria khat lahik labaih 3 tỉ đồng.

Labaih 1.000 bác sĩ njauk dang anak bruk điều tra duah thau ka bruk taduan mek jien oh cambaih laih meng sa Cty jru. Cảnh sát Seoul khan lac rilo bác sĩ hu taduan mek jien mbaok saong dom pandap karei meng dom triệu Won tal yaok pluh triệu Won ka yaok urang meng sa Cty jru Korean Drug. Tui nan, taong abih atau dom bác sĩ njauk điều tra tui panuac langyah di urang nan ka dom pok pandap saong jien ndo bo urang taduan mek. Cảnh sát Seoul jeng peih bruk điều tra hãng ngak jru Korea Drug kayua medil lac brei jien ka dom bác sĩ piah kê đơn dom janih jru di Cty brei ka urang ruak.

Cục Khik iek Jit ruak (DDC) di Mintri Y te Thái Lan hu kakei rahra negar ini nao tal Nhật Bản paglaong caik hatai saong eng drei khik caga anak mbang tamuh jit ruak njom jru mek kayua liên cầu khuẩn daok rahtabiak di Nhật Bản. Tui Cuc khik iek jit ruak, vi khuan ini meda njom pambak tok tapa ia pabah, janih ia karei meng urang ruak atau gaok tame labik laka njauk ruak. Vi khuan njom tapa rup pabhap tapa labik laka atau meda lac pandik tarakaong saong ngak tabiak jru mek meda njom pambak grauk labik dalam rup pabhap saong ngak trak trak, ngak kan kandah tal dom mô saong mbuan ba tal suy nội tạng. meng di akaok thun tal harei 26/5 bahrau blaoh, hu 690 urang njauk vi khuan di Nhật Bản saong 163 urang metai kayua ruak ini.

Gha tui iek bruk langik tasik negar Mỹ brei thau, dom ban praong di Mỹ daok hu langik pandiak glaong di abih kuhria dalam yaok pluh thun tapa haong bruk langik pandiak yau pui am di bhum Trung Tây saong Đông Bắc taneh ia ini. Di ban ine Washington haong langik pandiak 36 độ C. Dalam tuk nan, ban New York tui kuhria meda hu 5 harei gam hu langik pandiak mangaok 32 độ C, mbang camereip abih kuhria meng bilan 6 thun 1988, Mỹ mboh hu yaok ratuh menuac matai kayua langik pandiak yaok thun./.