Di Nyaom biai pakat negar roh duah, bac megru, thau cambaih dom Sarak Nyaom biai mbang 6 BCH Trung ương Đảng mbang 13,  Ủy viên Mentri Chính trị, Bí thư Trung ương Đảng, Akok mban Tổ chức Trung ương Trương Thị Mai hu ndom tal bruk salih birau jalan pan akaok di đảng, abih di nyu lac bruk ngak di dom pakat ủy, di tổ chưc đảng, bruk ba akaok nao dahlau di urang jakar, urang đảng, urang dang akok. Ramik veik bruk ngak, jhul khang bruk parabha pakat, parabha quyền; bruk pasang iek hu jhul pakhang, rik tame ngak catang bruk kỷ luật, kỷ cương dalam Đảng.

Melam 5/12, di Hà Nội hu peih bruk jao giai mbang pacacah saong parang iek thaot bingu Hadah mbaok meta ka bhum tapen negar thun 2022 kayua Ban Tuyên giáo Trung ương ba tabiak. Dalam jaik 10.000 blah thaot bingu di 1.000 tác giả, Kapul Jai thuong hu pok mayaom 22 kadha gheih di abih. Gam haong nan, pilih ruah 188 blah thaot piah yaih khan tal rahra. Đại tướng Phan Văn Giang, Akaok Mintri Quốc phòng brei thau, jalan tapen negar mbaok taneh negar drei atah labaih 5.000 km, lac labik hu makna biak praong dalam bruk khik kajap  negar drei. Bruk paglaong hatai sahaneng ka bhum tapen negar lac sa dalam dom bruk praong dang akaok.

Gilang pariak Karja Viet Nam birau ramik veik bruk brei mesre phun jien di dom gilang pariak thun 2022 tagok jang meng 1,5 -2% ka taong abih dom gah tín dụng. Bruk ramik veik hu ngak tui jalan lac, dom gilang pariak  mek jien tame hu siam jang, jien laba biar jang meda hu patagok bruk brei mesre glong jnag. Gilang pariak Karja  caong khin dom gilang  brei palagaih sumu  piah brei jien mesre, pataom phun jien tame ka gah ngak mbang pablei salih, abih di nyu lac brei mesre dahlau ka gah ngak nong palei pala, pablei tabiak negar langiu, D.N sit saong mbiah, cong nghiep…

UBND tỉnh An Giang bahrau patabiak jalan peih ngak danak dak “Khik ramik, patagok yaom glaong ragu daoh, ragam tamia dom bangsa takik pambuak haong cak rok patagok du lịch tukvak 2023-2030”. Tỉnh meda peih bruk padang ngak, peih ngak siam dom janih du lịch lagaih haong ilamo di rahra, peih praong gah kinh tế cak rok patagok bhum mikva bangsa takik saong bhum ceik. Gam tui di nan jeng iek praong bruk khik ramik, patagok dom yaom glaong di ragu daoh ragam tamia meng kan di dom bangsa takik, jeng pandap du lịch ilamo karei di tỉnh.

Tui pasang iek di Sở Ngak nong saong Patagok palei pala tỉnh Trà Vinh, thun 2022, jaik abih dom bruk ngak mbang birau, salih janih phun pala brei jien tame glong jang meng 2 tal 3 mbang. Urang ngak nong hu paglong prein khik iek, pala drak, raong kaya ikan dalam ia tui jalan birau, pambuak darak pasar piah pablei pandap. Dom bruk ngak mbang salih birau meng taneh ngak padai tapa pala njam patam, raong hadang giraong hijao, pala la-u pablak  pala hareik.. duah laba hu meng 70 – 100 trieu dong sa ha sa vụ.

Pasak pacang caga jit ruak Mỹ brei thau, jit cúm meda tagok khang di taneh ia ini. Dom urang ruak tame sang iek ruak tagok khang tal tanut glaong abih kuhria dalam piluh thun tapa. Tal urak ini, hu takik di nyu 14 dam dara metai kayua ruak cúm. Tui Pasak Pacang caga jit ruak Mỹ, langiu di jit cúm, dom labik y tế di Mỹ daok dang anak bruk tapa prein  kayua dom urang ruak njauk ruak jalan suak yava karei yau ye COVID-19, virua hợp bào jalan suak yava … tagok khang.

Urang jakar ban Duesseldor, Đức brei thau lac kareik pabah mbang labik darak Giáng sinh piah pacang caga bruk mbuan taong tame hadei di tuk cảnh sát  hu taduan phone urang iew mai lac taong tame labik nan. Dahlau di nan sa adit, cảnh sát ban ine Berlin jneg brei pacang dom jalan saong khik brei salamat labik jaik  darak Giang sinh  danei angan di Alexanderplatz hadei di tuk pang phone dreih yau nan. Thun 2016, 12 urang metai tuk  sa urang peih radaih tải nduac tame darak Giang sinh di ban ine Berlin.

Takik di nyu 27 urang metai hadei di mbang glut jaleih taneh kayua hajan khang, lam sa sruh radaih buýt saong dom sruh radaih karei di 1 tỉnh Tây Bắc Colombia. Gah daong duah urang njauk bala hu ba dom sruh radaih, pandap panda chuyên dụng piah duah dom urang daok diuk. Labik Tây Bắc Colombia lac labik njauk kan kandah abih kayua langik tasik biak jhak meng bruk La Nina dalam 3 thun gam. Labaih 270 urang di Colombia metai dalam dom bruk samar drah hu pambuak tal La Nina meng bilan 8/2021 tal ini./.