Bruk jao yai Báo chí Pakat negar mbang 18 hu peih tabiak tuk melam ini di Sang daoh praong Hà Nội. 122 urang vak, kapol urang vak hu kadha vak gheih abih hu pok meyaom dalam mbang ini. Tui Ban peih bruk, dom kadha payua tame pakacah Yai thun ini hu asar kadha siam. Rilo kadha hu buh rilo prein yawa padang ngak, asar kadha  roh duah birau, brei mboh bruk tacei pato tui jalan, sarak di Đảng saong Karja; ba tabiak rilo jalan padang ngak gheih mbuan pambak praong dalam manuac sia. Tapa 18 thun peih ngak, mbiah tal ini Yai daok taduan hu bruk pachreih tui di 63 Kapol Nhà báo tỉnh, ban…Bruk nan brei mboh preih dui pachreih khang di Yai jeng yau bruk kham merat di dom hoi vien saong dom pakat Hoi nhà báo dalm negar.

Mban peih ngak Jai báo chí tỉnh Đồng Tháp mbang ka VII thun 2024 bahrau peih bruk pataom iek veik saong jao jai bao chi ka dom urang vak, nyaom urang vak hu mbaok tame Jai báo chí tỉnh Đồng Tháp. Dom kadha payua tame pakacah Jai báo chí tỉnh Đồng Tháp hu biak rilo asal kadha, njauk tui bruk di anak mata, pathau khan samu, lagaih dom bruk hu makna di puk palei saong dalam bhum. Dom urang vak brei mboh bruk pathau khan, rik tame mayaih khan thaot binguk dalam tinh. Jabat rayo sap ndem Việt Nam bhum ĐBSCL hadah mbaok mata mek hu jai B di janih papar sap ngan haong kadha “caong maong meng danak dak 1 triệu ha padai hu chat luong glaong pambuak haong patagok hijao di bhum ĐBSCL”.

Thủ tướng Rajaei bahrau pok angan 2 huyen Cầu Kè saong huyện Tiểu Cần di tỉnh Trà Vinh hu tanut chuan palei pala birau  paglong thun 2023. UB bhap bini tỉnh Trà Vinh brei thau saong meyaom tui sarak ba tabiak; tacei pato ub bhap bini huyện Cầu Kè saong huyện Tiểu Cần patui bruk saong paglong dom tanut, brei caik hatai ka bruk ngak ngak mbang pala drak saong moi truong piah khik brei khang kajap dalam bruk padang ngak palei pala birau.

Ủy ban Mặt trận Negar Việt Nam tỉnh Vĩnh Long bahrau peih Harei taom gaok dom urang dalam Mban Trị sự Phật giáo Hòa Hảo tỉnh, Mban Trị sự Phật giáo Hòa Hảo saong baoh sang mikva tui agama Phật giáo hu prein haong cach mang paghadar 85 thun Harei padang tabiak agama Phật giáo Hòa Hảo. Di mbang taom gaok, ong Nguyễn Thành Thế, Phó Bí thư Tỉnh ủy Vĩnh Long ndem lac, tinh tuk halei jeng caik hatai saong palagaih ka mikva tui agama hu mbaok tame dom bruk agama tui njauk adat hukum; iek praong bruk eng drei tui adat cambat di rahra.

Tui Mban khik iek gah jalan pasei đô thị TPHCM, bilan 7 anak tal, jalan metro ka 1 (Bến Thành - Suối Tiên) meda ngak brei salah bruk peih ngak iek tich hợp, hadei di nan brei nduac iek meng bilan 10, 11 dahlau di tuk ba tame nduac pajeng tuai mek jien di quý 4 thun ini. Tal urak ini, metro 1 ngak hu labaih 98% dalam taong abih bruk ngak.

Mbang langik pandiak dui atah rahtabiak di gah barak Ấn Độ, jhul nhiet do tagok tal jaik 50 độ C, ngak ka dom sang iek ruak tapa prein, ngak kan kandah tal yaok rabau urang ruak. Langik pandiak biak khang ngak ka labaih 100 urang metai. Tui Mintri Y tế Ấn Độ, labaih 40.000 urang medil lac njauk mebuk pandiak hu mboh dalam bilan pandiak thun ini, saong takik di nyu 110 urang metai meng di akaok bilan 3. Dalam tuk nan, hajan khang dui atah di gah Đông Bắc Ấn Độ, ba tal hajan ia sua saong glut jaleih taneh, ngak ka takik di nyu 6 urang metai saong labaih 160.000 urang gaok kan kandah.

Sa mbang pandiak khang daok me-om tagok taneh ia Hàn Quốc hu dom labik tagok tal jaik 40 độ C, pandiak abih dalam bilan 6 kuhria meng thun 2010. Jaik abih dom bhum palei  hu tabiak panuac brei thau dahlau ka bruk pandiak ini.  Tui kuhria mboh, pandiak di rilo labik  meng 37,2 tal 40 độ C. Tui Jabat Pasang iek saong Pacang caga Jit ruak Hàn Quốc, dom ruak kik kayua pandiak dal harei dak tagok jang. Dalam mbang pandiak khang di bhum kreh negar Hàn Quốc, ye (aih ngin)-taginum  kapal saong hajan ngak trun pandiak di dom bhum taneh gah Meraong saong kaoh pulao Jeju gah Meraong. Di Kaoh pulao Jeju, hanjan praong dui atah tal harei ini.

Kayua yaom kaom tagok glaong saong kan kandah, rahra di tản pak ban Idlib, gah barak Syri, abih di nyu nan lac urang kumei matain mboh trun, meda lac padeih bruk pablei khan aw ngui cuk ka anek mbik, dalam nan hu gam anek kaman. Salih tame nan, urang blei dom khan aw klak piah ngak pasiam veik, ngak veik jeng khan aw cup pagap haong anek mbik di drei dalam sang. Labaih sa piluh thun mesuh metak gam haong dom cuang kandah di gah langiu nyu ngak ka bruk kinh tế Syri dak harei dak trak damak./.