Piah khik salamat jalan mbak nao mai duh ka bhap bini uan raok Tet Nguyen dan Ula Naih saong bui ma-in Xuan 2025, Thu tuong Rajaei hu kong ndien pandar dom mentri, jabat, bhum palei hu kuhria bruk mikva nao mai ralo, kuhria caga dom bruk ngak suan hukum di salamat nagar, salamat jalan mbak nao mai dalam dom tukvak harei raya, tet; pacang caga bruk gal jalan saong gaok bala radaih. Kham marat pathau khan ka bhap bini ngak tui hukum jalan mbak hu salamat “manyum alak, mbia-oh peih radaih”, oh pandar phone di tuk peih radaih; kuak nduan mot mbao hiem tuk nao moto, radaih patuh, radaih ndien; cuk talei khik rup pabhap tuk daok ngaok oto, peih radaih nduac tui hukum ba tabiak.

Dalam thun 2024, bruk quoc phong saong an ninh di Quan khu 7 tani tanat, kinh te - xa hoi patagok bruk salih birau. Gah Bol pan phao kraong Quan khu 7 pambuak bruk langyah tani tanat ngan haong dom labik yak meriak gauk kan kandah rik tame ngak brei tani tanat, salamat xa hoi di labik bol lin ngak bruk. Dalam thun tapa, Quan khu 7 peih ngak jaik 900 tal bac pasiam, pabak ilamo quoc phong saong an ninh ka labaih 96 ribau urang. Langiu di nan, Quan khu 7 hu padang ngak 485 baoh sang jum pataom, sang bol lin, sang anit ranam bol lin - bhap bini kuhria abih tih jiak 36 tỷ đồng…

Xa tapen nagar Ia Đal, huyen Ia H’Drai hu Mbo Chi huy Bol lin Bien phong tinh Kon Tum ruah labik pakat tinh peih ngak Danak dak “Bal pataih tapen nagar pandiak tung tian mikva puk palei” pambuak haong “Harei ngak tapei nung”. Di danak dak gah bien phong alin hadiah 400 hala dok nagar, labaih 250 paok pandap, 400 yau tapei nung, alin paok jien bac ka 9 adei bac di Danak dak “Daong adei yam takai nao sang bac”, bruk ngak “Anek raong di labik Bien phong”, daong pajaih limo binai ka 2 baoh sang kathaot piah ngak mbang…Kuhria abih tih jien pandap alin labaih 350 trieu ndong.

Tỉnh Tiền Giang daok peih ngak dom bruk nao rivang, alin pandap, peih ngak dom bruk sambai Xuan, raok Tet Ula Naih 2025 kuhria tui jien labaih 44 ty 6 rituh trieu ndong. Langiu pandap alin brei di Akok negar ka urang taha umo, dom urang dalam sarak di karja tinh jeng mai rivang, alin pandap ka amaik VNAH, baoh sang di sarak karja naih gheih. Gam rivang saong alin pandap 85 baoh sang di sarak karja naih gheih saong baoh sang bol lin daok ngak bruk di Trường Sa, sang gian DK1. Langiu di nan, di dom  bhum palei  daok hu rilo pandap Tet alin ka dom baoh sang kathaot, jiak kathaot, urang raidiuk kan kandah.

Harei pataom meyaom bruk ngak meng kan thun 2025 ngan haong kadha “Bar ilimo kajap livik, khik nem makna” daok peih ngak di huyen Lai Vung, tinh Dong Thap. Harei raya hu ralo bruk ngak yau: peih ngak labik parang iek, ma-in pasram dom bruk ngak meng kan; ndom mayai, parang iek, yaih khan dom pandap panda OCOP. Huyen Lai Vung hu phun quyt hong ba mai kein laba glaong ka mikva, ngan haong ralo bruk ngak meng kan. Dalam nan, bruk hit rauk gilai, gaiy di xa Long Hậu saong ngak nem Lai Vung hu Mentri Ilimo - Padhih saong Jirah rivang taduan mek harei Drap ar ilimo oh mbaok di anak mata di pakat Nagar.

Mentri Kong an Trung Quoc birau khan iew kakei bhap bini paglong jalan sahaneng caga dahlau dom panuac da-a ngak bruk di negar langiu, piah palaik njiak  jeng urang bala di dom gah pachot pagat tapa negar. Urak ini, dom rilo baoh sang urang Trung Quoc caong khin daong duah gauk gar njauk urang pachot pagat  tabiak negar langiu ngak bruk hadei di nan oh pambuak hu veik. Rilo urang dalam nan kateik ngak dom bruk suan hukum. Mentri Kong an Trung Quoc khan lac brei pakhang pambak praong bruk chap mek bruk ngak suan tui jalan internet tapa negatr dalam tukvak anak tal.

Hoi ndong Bao an Lien hop quoc hu khan tapa sa sarak nghi quyet katung suai tukvak bruk ngak di Mban urang ilimo di Uy mban taong bhat Libi thun 1970, tui nan peih praong dom bruk taong bhat pambak tal bruk pablei manyek tabiak nagar langiu suan hukum di Libi. Sarak ni jang hu ba tabiak dom panuac barau pambak tal bruk pakauk vu khi akha saong dom jalan pakreik jien padai drap ar hu ba tame ngak meng thun 2011 hadei tuk pableik urang pan akaok nagar Libi Muammar Gaddafi.

Rajaei Anh birau pakauk janih jru xylazine ngak cadu rak sahaneng, piah kham ngak brei trun takik urang metai pambuak tal jru ngak ghien saong langyah dom kapol nyaom  ngak suan hukum pablei jru pakauk nan. Ini lac sa janih jru ngak cadu rak sahaneng catang di athur, min pandar ka manuac, jru ini meda ngak kan kandah, dalam nan urang oh thau megei pacang veik saong ngak laka kalik trak kan dhit siam.