Jit soi daok rah tabiak sraw kadau kan thau dahlau di dom tinh gah Meraong negar, urang tame iek ruak dak harei dak rilo, rilo abih lac uranaih oh ka klauk jru vaccine. Gru jru kakei dahlau, bruk sahaneng “oh brei klauk vaccine” daok ngak ka  uranaih mbuan njom ruak saong ba tal ruak trak. Khoa Nhiễm - Thần kinh, Sang iek ruak Nhi đồng 1, TPHCM urak ini daok jru ruak ka 70 uranaih tame ndik iek ruak soi, dalam nan hu 10 mbang brei tok suan oxy tapa idung. 93% mbang urang tame sang iek ruak  mai meng dom tinh jiak taphia TPHCM saong hu tal 80% mbang urang ruak phoi, jalan tung pruac, nhiem trung darah saong lavang lavaih. Metri Y te kakei, soi oh ka jru taong ruak, bruk klauk jru vaccine lac jalan siam abih piah pacang caga ruak.

UB Mat tran negar tinh Binh Phuoc pambuak haong huyen tapen negar Bù Gia Mập peih bruk padang ngak 37 baoh sang dalam danak dak ngak brei abih baoh sang oh daok taik tahak dalam huyen. Dom baoh sang bhap bini hu padang ngak dalam mbang ini  di dom xã Bù Gia Mập, Đăk Ơ, Phước Minh, Bình Thắng saong Đa Kia. Yaok  baoh sang  hu daong 80 trieu dong sa baoh, ramik pasiam veik 40 trieu dong sa baoh. Dom po sang hu daong sang daok jeng yau gah padang ngak brei hu siam mekre laneng lanoi, hu labik daok tani tanat, kham merat yam tagok tapa truh kathaot khang kajap.

Daok di tinh Ca Mau hu labaih 3.100 baoh sang di danak dak ngak brei abih baoh sang oh daok taik tahak oh ka hu sang jaman, tinh kham daong veik 5 trieu dong piah padang ngak. Jien nan lac daong pabak veik langiu di 60 trieu dong piah padang sang birau saong 30 trieu dong piah pasiam sang daok tui Danak dak ngak brei abih baoh sang oh daok taik tahak. Mbiah tal ini, dalam tinh Cà Mau hu padang ngak, ramik pasiam jaik 2.300 baoh sang di danak dak ngak brei abih sang taik tahak, sumu 52% bruk ba tabiak. Ngak hu blaoh  labaih 1.400 baoh sang, kuhria abih tih peih brei jaik 118 ti dong.

Bộ Tư lệnh Bhum Cảnh sát  tasik 4 bol lin ngak bruk di Ban Phú Quốc, tỉnh Kiên Giang birau peih tal pato bac sap Khmer ka 30 urang jakar, urang ngak bruk saong urang lin di jabat ini. Tal bac piah pasram sap Khmer piah ngak bruk pasang iek saong langyah bruk urang ngak suan di tathik. Tal bac  peih tabiak dalam 6 bilan, pabak ilamo 4 kadha: Pang, meyai saong bac cih vak. Ini lac tal bac pasram sap Khmer ka dua di Bộ Tư lệnh Bhum Canh sat tathik 4.

Meng harei 29 bilan 3 anak tal, kapal gilai peih drah samar meng Ban ray HCM tal Côn Đảo hu ngak bruk. Tukvak peih meng mon 5 tuk 45 minit, sa harei peih sa mbang. Yaom harak ve meng 720.000 tal 1.370.000 đồng tui tukvak saong gaiy daok. Kapal gilai  peih drah samar meng TPHCM tal Côn Đảo, oh padeih di Ban Vũng Tàu. 

Nhà Trắng khan lac Tong thong My Donald Trump brei mbaoh sarak ngak tui adat hukum kareik pambang Mentri Pato megru dalam harei ini 20/3. Ini lac bruk rah tabiak njauk tui sanya di ong dalam tuk meriak urang buh phieu palih ruah dahlau di ini. Bruk klak tabiak Mentri Pato megru lac bruk kham ngak akok meti di ong Trump piah kareik pambang sa jabat di rajaei. Dahlau di nan, ong Trump ba tabiak ka Akok Mentri Pato megru Linda McMahon “ peih ngak dom bruk njauk ngak” piah ba mbuan lagaih  kareik pambang Mentri Pato megru saong jak veik adat  pato megru ka dom tieu bang…

Tamat mbang nyaom ka 2 di thun 2025, Cục Khik piah Lien bang Mỹ ba tabiak bruk brei khik tame jien laba meng 4,25% tal 4,5%, kayua huac rilo bruk jhak. Kinh te My daok hu rilo bruk karei di gauk tuk dom bruk kuhria mboh dahlau ka jien mek tame quy 1 kadun likuh. Dom urang ilamo mboh lac sarak jien je di Tong thong Trump ba tal bruk lam phat patagok saong pacang bruk cakrok.

Harei kabroi, Mentri Quoc phong Nga khan lac, Nga saong Ukraine ngak salah blaoh bruk bayar lin daok guk. Tui nan, 175 lin bhap bini Nga hu peih palao meng bhum taneh kayua Ucraina khik iek. Bayar veik, 175 lin bhap bini di Ucraina hu bayar veik saong 22 bhap bini lin Ucraina njauk rambuac trak njauk brei iek glang y te samar chip. Taong abih bhap bini lin Nga hu daong jalan sahaneng saong y te njauk brei hu, brei pambuak haong gauk gar dalam sang, hu jru ruak saong pasram veik ka rup pabhap di dom labik iek ruak./.