Mban Tuyen giao Trung uong dang tabiak ngak, pambuak haong Thanh uy Ban raya HCM saong Rayo papar binguk Viet Nam peih ngak Danak dak “Jum pataom dom urang naih gheih dalam bruk bac da-a saong ngak tui jalan sahaneng, diukrai siam mekre di Ho Chi Minh di bhum gah Meraong negar thun 2024” di melam ini 11/10. Danak dak hu pok meyaom 17 urang naih gheih, 12 bruk ngak lac dom urang jakar, urang đảng, dom urang lin, bac si, tri thuc, halau janeng, bol bhap bangsa, urang ngak, urang ngak nong. Meng dom bruk siam mboh gheih di meta, urang hu rik tame pambak praong dom bruk kham merat, jhuk kadun likuh dom bruk kanjak jhak, mek bruk gheih jhul kadun bruk kanjak, brei mboh yaom glong di jalan sahaneng, jalan diukrai di HCM ngan haong bruk ngak cách mang di Ndang saong bruk patagok di taneh ia.

UB Bhap bini tinh Dong Thap pambuak haong Mentri Ngak nong saong Patagok palei pala peih bruk palao labaih 200.000 drei ikan pajaih rilo janih trun kraong Tiền piah pasiam veik kein lagaih ikan taba pambuak tinh Dong Thap – An Giang – Can Tho thun 2024. Meng thun 2022 tal ini, Mentri Ngak nong saong Patagok palei pala pambuak haong 3 tinh An Giang, Can Tho, Dong Thap peih bruk palao yaok ribau tấn ikan trun kraong Hậu, kraong Tiền haong rilo janih mbuan lahik pajaih, hu yaom glaong, kan duah, piah daong pasiam veik kein lagaih ikan ia taba di dom labik kraong ribaong bhum taneran kraong Cuu Long.

Kapol Kinh te – Quoc phong 778 (Quan khu 7) birau hu jao brei phun jien padang ngak 2 baoh sang “ Jum pataom” ka ong  Điểu Trần Đạo saong baoh sang muk Điểu Thị Loan, bangsa S’tiêng xa Phú Nghĩa, huyen Bù Gia Mập, tinh Bình Phước, kathaot rambah oh hu sang daok. Bruk ngak nan piah daong ka dom baoih sang sarak, bangsa takik hu labik daok tani tanat, sahanang hatai brei cak rok patagok, patruh kathaot, dak padang talei rohim jum pataom, dak padang bhum taphia negar huyen Bù Gia Mập khang gah kinh te, kajap ka quoc phong.

Kong an tinh An Giang bahrau alin hadiah 90 paok pandap saong radaih juak ka rahra, anek saih mikva bangsa Khmer sang kan kandah dalam tinh. Dalam nan, hu 35 paok pandap hu alin hadiah ka baoh sang mbang tui sarak, baoh sang kan kandah; 50 paok pandap saong 5 radaih juak ka anek saih Sang bac THCS Ô Lâm hu sang kan kandah, tari taring bac, sang atah sang bac. Abih tih yaom paok pandap lac labaih 24 trieu dong.

Hadei labaih 2 thun taphia gauk yaom trun biar, urak ini yaom lanung hu tagok veik glong meng 100.000 tal 110.000 dong sa kilo, urang raong hu laba labaih. Yau nan min, rilo mikva di bhum gah Pei negar njauk brei kuhria sahaneng palao raong kayua huac raong ralo jang bruk caong blei. Tinh Kiên Giang  hu labaih 360 baoh raong lanung oh hu gluh jaik 1.650 kuang raong, ralo urang raong lanung  tui hatai di drei. Piah bruk raong oh hu gluh patagok tani tanat, Pasak Pachreih nong Kien Giang  duah doanh nghiep  blei che bien saong pablei tabiak lanungpiah yaih khan, duah labik palei lanung hu tani tanat.

Rabuk Milton ngak angin bah khut tayah bang Florida, Mỹ, ngak takik abih 10 urang metai saong yaok trieu urang oh hu ndien pandar. Bruk pasiam veik daok hu dom luc luong chuc nang ngak. Labaih 9.000 Bol lin Taneh ia hu daong saong kham  merat pasiam veik, langiu di nan daok hu 50.000 urang ngak gah ndien hu ieu mai piah langyah bruk lahik ndien di rilo labik. Dom kapul daong duah hu jeng hu ieu hadei tuk abih rabuk. Tong thong Joe Biden brei thau Rajaei Mỹ caong khin nyaom biai gilac piah langyah hatai caong daong di hadei di rabuk.

Tui Kadung jien Dan so LHQ (UNFPA), yaok 4 uranaih adei kumei umo dara ye hu jiak 1 adei kumei njuak taong paoh, rambeik rapai kayau ayut di drei. Yaok thun, di dom labik daok cakrok patagok, hu labaih 12 trieu adei kumei umo meng 15 tal 19 thun ndik tapui anek; yaok trieu adei kumei dang anak bruk iek lap, iek karei saong njauk taong paoh. Kayua yau nan ye, Kadung jien Dan so  LHQ  iew manuac ba tangin daong tame padang ngak dunya njauk yau gauk saong sumu gauk jang, labik uranaih kumei hu praong tagok salamat.

Hu takik abih 20 urang ngak mỏ metai saong 7 urang karei njauk rambuas trak dalam mbang taong mai di sa kapul urang hu phao kraong tame dalam labik khai thác hadeng di gah tay nam Pakistan di harei ini. Langiu di nan, kapul ini jeng pandar lựu đạn piah taong dom labik ngak mỏ. Cảnh sát pak ini hu brei mboh dom urang metai min sahneng urang metai daok hu tagok rilo veik kayua rilo urang njauk rambuas trak. Tal ini, kapul urang dang likuk bruk ini jeng oh ka thau thei.