Thủ tướng Phạm Minh Chính bahrau mbaoh tangin tame harak padang kapul ngak roh duah, tong yaom prein pandar gah hàng không dân dụng di mblang kapan haoh quân sự Thành Sơn (Ninh Thuận) song mblang kapan haoh quân sự Biên Hòa (Đồng Nai); gam song nan, roh duah danak dak  xã hội hóa, buh jien tabiak tui jalan công tư peih ngak dom cảng hàng không. Ngan song dom mblang kapan haoh quân sự Thành Sơn song Biên Hòa, meda peih bruk pasang iek, tong yaom rilo bruk yau ye, labik, bruk hạ tầng, taneh riya; alam môi trường, bhum langik; tong yaom prein peih ngak hàng không dân dụng.

Bruk taduan mek harak di UNESCO pok angan tamia xòe Thái lac inem krung ilamu phi vật thể lambaok ka menuac sia dunya, peih mbaok harei pataom ilamu - Du lịch Mường Lò, duah thau labik mekre pakat negar hamu takai kanyan Mù Cang Chải thun 2022 peih tabiak di Yên Bái tuk mon  8 melam 24/9 hu brei saoh harak tame iek oh mek jien. Dalam dom bruk ngak piah taduan mek harak, hu rilo bruk yau: diễu hành angaok jalan hu mbaok di  500 nghệ nhân, bhap bini dom tỉnh: Yên Bái, Sơn La, Điện Biên, Lai Châu; parang iek thaot inem krung tamia Xoè Thái saong thaot mekre ravang me-in 8 tỉnh Tây Bắc, ilamu dom bangsa bhum Tây Bắc…

Công ty TNHH Đầu tư jalan roya 1 Tiền Giang brei thau: meng mon 1 jala pandiak harei 25/9, BOT Cai Lậy ngak iek bruk mek jien min oh mek di mangaok  bilai jalan roya ka 1, tal harei  27/9 peih prong tong abih dom jalan di bilai roya ka 1. Bilai mek jien  jalan plaih Cai Lậy jeng hu ngak yau nan, piah tal harei  7/10, BOT Cai Lậy peih bruk mek jien veik, hadei di sa tuk vak brei padeih. Danak dak padang ngak jalan roya ka 1 tapa ban  Cai Lậy atah labaih  38km, abih tih phun jien buh tame ngak mbang camereip  labaih 1.400 tỷ đồng. Bilai mek jien caik di jalan roya ka 1 peih ngak meng harei 1/8/2017 piah mek jien ka 2 jalan ni. Min, kayua rilo urang peih radaih pandar jien rai blei harak, ngak gar jalan, ngak ka po  đầu tư gam gam  xả trạm song padeih mek jien  meng harei 14/12/2017.

Meng harei 23 – 26/9, Sở Ilamu, Thể thao saong Du lịch ban Cần Thơ pambuak haong UBND huyện Phong Điền peih “harei pataom du lịch sinh thái Phong Điền – Cần Thơ” mbang ka IX, thun 2022. Langiu di bruk yaih khan dom janih baoh kayau bingi, pandap du lịch di TP Cần Thơ saong huyện Phong Điền, harei pataom daok hu ginum biai ka jhul khang yaih khan, patagok du lịch hadei di jit COVID-19. Harei pataom piah daong paglaong akaok sahneng di bhap bini ka yaom glaong di du lịch, patagok siam lagaih dom bruk du lịch sinh thái pambuak pagam haong ravang iek bein phun mbang baoh, du lịch tâm linh pambuak haong ravang sirah inem krung sajarah - ilamu,…

Urak ni, tỉnh Cà Mau tok daok huyện Thới Bình dok khik ramik song patagok  dàn nhạc  Plêng Skô Thum, dalam nan hu baha  Rạch Giồng song baha  Cao Dân, di palei  7, xã Tân Lộc. Dàn nhạc prong ni  hu 15 janih alat ragam, urak ni, dok hu labaih  30 nghệ nhân di  Cà Mau hu mbaok tame me-in. Tui  mBan bangsa tỉnh Cà Mau, bruk ba dàn nhạc hagar praong tame angan inem krung ilamu  phi vật thể pakat negar lac bruk dahah hadai mbaok meta di mik va Khmer. Tuk vak anak tal, tỉnh daok brei buh prein yava tame piah khik ramik saong patagok ilamu dom bangsa, dalam nan hu inem krung gar prong ni.

Mintri Ngoại giao Ấn Độ hu panuac ieu rahra di drei brei biak caik hatai tuk duah bruk ngak di Thái Lan. Tui nan urak ini hu dom Cty công nghệ thông tin hu mbaok tame dom bruk blei saleik, pachot kỹ thuật số saong ngak ja jien điện tử. Kol nan nyu pilih ruah urang Ấn Độ saong sanya lac ba nao ngak bruk di Thái Lan. Gah Ấn Độ brei thau, hu 80 – 90 rahra taneh ia ini njauk lah pachot tapa Mi-an-ma suan hukum. 32 urang hu daong pakalah tabiak truh labik nan.

Ả Rập Xê-út hu urang kamei  phi hành gia camereip par tame vũ trụ dalam thun  2023. Pathau khan kayua  Ủy ban Không gian A Rập Xê-út batabiak dalam tuk vak  negar Ả Rập Vùng Vịnh dok jhul khang jalan ngak, Pamong tal thun  2030 piah salih bahrau kinh tế, trun bruk pagam pambak tame xăng menyek.  Dahlau di nan, bilan 2/2021, Các Tiểu Vương quốc Ả Rập thống nhất hu cuh sa kapan pasang iek tame quỹ đạo di  sao Hỏa. Taneh ia ini jeng daok kuhria cuh  kapan haoh duah thau ia bilan dalam thun  2024 song kuhria padang sa labik dok mangaok sao Hỏa dalam thun 2117.

Tui 1 dữ liệu bahrau meng UB châu Âu, tok hu 2% urang Ba Lan ndom lac urang pahat rup atau me-in thể thao gam gam. Ini lac takik di abih dalam Liên minh châu Âu. Hu 46% urang Ba Lan mboh lac, kurang tukvak lac makna ngak ka urang oh pasram pahat hu. Thun bac 2022-2023, rajaei Ba Lan hu ba tabiak dom quy định ngak brei anek saih kan likau hu adat di bác sĩ piah klah di bac dom tal bac thể dục./.

Urang lang: H.Pha & M.P – 24/09/2022