Rilo anek saih kan kathaot taduan hu pok jien bac dalam thun ni 

Dah page ini, di Sang Quốc hội, hu peih mbaok Mbang nyaom ka 16 di Ủy ban Thường vụ Quốc hội (TVQH). Peih tabiak dalam 3 harei, di mbang nyaom ini, Ủy ban TVQH pasang iek, brei panuac ka rilo asal kadha hu makna praong ka bruk padang ngak hukum, gam haong nan, Ủy ban TVQH jeng brei panuac ka pathau khan di di Rajaei ka dom bruk ngak hu tuk peih ngak Danak dak bruk ngak negar ka cak rok kinh tế xã hội bhum mikva bangsa takik saong bhum ceik tukvak 2021 - 2030. Taong abih dom asal kadha ini meda hu pok tagok Quốc hội di Mbang nyaom biai ka 4, Quốc hội mbang 15 tui kuhria hu peih tabiak di harei 20/10 anak tal.

Kapul pachreih bac tỉnh Trà Vinh pambuak bruk haong Sở Pato megru bahrau peih bruk brei 334 pok jien bac ka anek saih, sinh viên kan kathaot pachreih bac di dalam tỉnh; yaok pok yaom meng 2-3 triệu đồng. Abih tih yaom jien bac hu jao brei mbang ini, lac 700 triệu đồng meng jien di kapul khik ramik Kadung jien “Từ thiện Trí tuệ” daong brei.  Dom pok jien bac ini hu daong ka dom adei yam tapa kan kandah di anak meta, kham merat bac da-a siam piah daong dak padang  Trà Vinh dak harei dak siam mekre, kaya meda.

  Anak  bruk rilo labik pablei xang di dalam ban TPHCM kurang xang pablei, melam bloh (9/10), Petrolimex TP.HCM hu ba 80 radaih bồn pajeng xang manjek meng kho mai ka taong abih dom labik pablei piah patagok bruk pabak. Piah lang talaih dom kan kandah ka dom labik pablei salih xang manjek, Sở Công thương meda peih mbang taom gaok, pang panuac sua tangi tapak di dom doanh nghiệp, pok panuac pato tacei jalan ka UBND ban raya pathau khan tal dua Mintri Công thương saong Mintri Jien padai ka bruk pablei le piah daong ka dom doanh nghiệp tani tanat yaom yaom, khik tani tanat bruk pabak, pablei salih, pandar di bhap bini.

 4   # Dom harei jaik di ini, meng hu langik tasik siam lagaih, urang taong ikan di Bà Rịa Vũng Tàu gam gam taong cap hu biak rilo ikan mai saong duah hu jien triệu meng yaok mbang tabiak tasik dalam dom mon. Tui panuac khan di rilo urang taong ikan, tui yaom pablei meng 20.000 – 25.000 đồng sa kg, hadei di kaoh abih jien xăng meyek, urak ini, yaok mbang nao tasik daok labaih hu meng 800.000 tal 1,2 triệu đồng, hu tuk meda duah hu jien glaong jang meyah taong njauk tapon ikan praong. Meng ini mbiah tal Tết Nguyên đán lac bilan tabung glaong di bilan ikan mai, thun ini ikan mai nyu mai suai jang nan ye ikan hu rilo jang yaok thun.

Tui Viện Quy hoạch thủy lợi Miền Nam, ia ndik di gah angaok kraong Cửu Long daok tagok saong meda tagok tal tabung glaong di ia ndik thun 2022 di harei ini saong harei paguh. Di Tân Châu, ia ndik glaong abih di tanut 3,5 -3,65 m, glaong jang tabung glaong di ia ndik thun 2021 meng 7 tấc 7 tal 8 tấc7. Di Châu Đốc, ia ndik glaong abih di tanut 3,20-3,30 m. Yau nan, ia ndik thun ini lac sit,  oh ngak kan kandah tal bruk pala drak di bilan thu đông. Min, tui kuhria meng urak ini tal puac thun triều cường tagok glaong nan ye meda mbuan dauk di dom labik taneh dhaong, abih di nyu nan lac dalam tuk triều cường gam haong hajan khang.

Di mbang taom gaok urang dang akaok Uỷ ban Điều tra Nga, Tổng thống Vladimir Putin hu panuac lên án bruk patuh di mangaok tatua Crưm di harei dahlau di nan, lac bruk khủng bố, saong hu panuac lac dom gah đặc nhiệm Ucraina dang gah likuk bruk nan. Tổng thống Nga V.Putin ndom lac: bruk nan, lac sa bruk khủng bố piah palai tayah cơ sở hạ tầng dân sự biak hu yaom glaong di Nga. Dahlau di nan, tuk mesup 08/10, Nga brei thau, sa sruh radaih pajeng pandap nyu patuh ralai di mangaok tatua Crưm, ngak brei jalan radaih jaleih meneing, 7 bồn xăng menyek di sa radaih praong nyu khuah, 3 urang metai.

Malaysia khan lac brei klaak bruk pakauk oh brei pablei tabiak negar langiu ralaow manuk meng harei paguh. Dahlau di nan, Rajaei Malaysia hu patabiak bruk pakauk pablei tabiak negar langiu ralaow manuk, dalam tuk taneh ia ini daok gaok bruk kurang ralow menuk pabak dalam taneh ia saong yaom tagok. Di thun 2020, Malaysia mek tame hu jaik 19 triệu đôla meng bruk pablei tabiak negar langiu manuk ada, dang ka 49 di dunya ka bruk pablei tabiak janih pandap ini.

Hu takik di nyu 10 urang metai saong 60 urang karei lahik di harei 8/10 hadei di tuk sa radaih praong takhuak di bang Anambra, Nigeria. Tui panuac khan di jabat khik ramik bruk samar drah pakat negar, radaih praong nan pajeng 85 urang, nyu takhuak di tuk hu ia sua praong, ngak brei tuai gar dalam radaih. Anambra lac bang 29 dalam 36 bang di Nigeria urak ini hu ia sua biak khang meng akaok thun tal ini. Ia sua ba seik rilo sang danaok, hamu puh, jalan mbak, ngak kan kandah tal meteh triệu menuac./.

Urang lang: Thu Thảo -Mousaphuong -10/10