Kapul urang lambaok Thành ủy - HĐND - UBND - Ủy ban MT negar Việt Nam TPHCM kayua ong Dương Ngọc Hải, Ủy viên Ban Thường vụ Thành ủy, Phaok Akaok UBND TPHCM pan akaok, bier harei kabroi hu mai rivang, tadhau ayuh Jabat rayo sap ndem VN daok di TPHCM di tuk pahadar 99 thun Harei Báo chí Cách mạng Việt Nam (21-6-1925 - 21-6-2024). Phaok Akaok UBND TPHCM Dương Ngọc Hải taong yaom jabat rayo sap ndem VN hu ngak siam dua bruk lac Jabat lambaok di Rayo sap ndem VN di TPHCM saong bruk ngak tabiak dom kadha vak. Dom kadha vak di Rayo sap ndem VN di TPHCM biak rilo janih, rilo pandap hu yaom glaong, ndem ka dom bruk dalam raidiuk, kinh tế - xã hội di TPHCM jang yau 8 tinh, ban gah Đông Nam bộ.

Tỉnh Bình Dương bahrau peih mbaok harei pataom bilan baoh kayau tasak thun 2024 ngan saong kadha “Lái Thiêu bilan sanya”. Harei pataom bilan baoh kayau tasak hu 112 labik pablei baoh kayau, pandap mbang saong dom pandap OCOP di tỉnh Bình Dương saong dom tỉnh gah meraong, dui pachreih hu rilo menuac hu mbaok tame. Ini lac bruk piah padang angan saong yaih khan angan pablei salih meng kan di palei. Gam haong nan, yaih khan thaot binguk bhum taneh, anek menuac Bình Dương saong dom janih baoh kayau meng bhum taneh Lái Thiêu. Pasak peih bruk du lịch Đồng Nai jeng hu sa labik parang iek, yaih khan thaot binguk ka ilamu, anek menuac, langik tasik saong prein khang du lịch jeng yau bruk mbang huak di Đồng Nai. 

Dom bhum palei di tỉnh Sóc Trăng daok kham marat daong pandap panda salih bruk ngak saong ia pandar parabha ka mikva bangsa Khmer. Danak dak daong mbang ini daok dalam Danak dak ka 1 ka langyah bruk kurang taneh daok, sang daok, taneh pala drak, ia pandar meng Danak dak bruk ngak negar cak rok patagok kinh tế - xã hội bhum mikva bangsa takik. Meng thun 2022 tal urak ini, abih tih phun jien peih ngak ka Danak dak ka 1 ka langyah bruk kurang taneh daok, sang daok, taneh pala drak, ia pandar ka mikva bangsa lac labaih 200 tỷ đồng. Kuhria tal harei 15/6, Danak dak hu peih bruk daong salih bruk ngak ka labaih 2.000 sang, daong ia pandar parabha ka labaih 1000 baoh sang.

An Giang lac tỉnh hu rilo urang Cam daok. Dom thun tapa, bruk pato saong bac haroh Cam hu karja palei biak caik hatai sangka. Dalam rilo thun ini mai, tal mon 6 malam, di Sang megik Nia’mah daok di palei Phũm Soài, xã Châu Phong, ban sit Tân Châu, hu peih pabah mbang brei ka anek saih tame bac. Ini lac tal bac sap saong haroh cih di urang Cam, hu dom Tuan tuan di Sang Megik peih pato brei saoh, oh mek jien ndo hagait. Bruk pato saong bac sap Cam hu mikva dalam palei biak njauk hatai pachreih tui. Kayua lac, langiu di bruk khik ramik sap meyai, haroh cih, bruk pato sap Cam daok hu daong biak rilo ka bruk pato sap Việt. 

Dom urang ruak pandiak tabiak darah di tỉnh Tiền Giang urak ini trun biak rilo dut saong tukvak ini thun blaoh, min meda tagok tuk tame bilan hajan. Meng akaok thun tal urak ini, dalam tinh hu jaik 600 urang ruak pandiak tabiak darah, ka oh hu urang halei metai. Kayua yau nan ye, gah y te hu paglaong dom danak dak ngak hacih labik daok, pametai anek lăng quăng saong pruh jru pametai jamaok. Gam haong nan jeng paglaong bruk pasang iek dom janih lăng quăng, jamaok njom mbak ruak pandiak tabiak darah di dom bhum labik hu urang ruak, dom bhum labik mbuan tamuh ruak, meng nan peih dom bruk ngak pacang caga lagaih saong samar drah.

Mintri Y tế Saudi Arabia brei thau lac langik pandiak tagok tal 49 độ C ở palei Mecca dalam tuk urang Islam daok tamat bruk ngak haji dalam langik pandiak khang ngak ka yaok pluh urang matai kayua pandiak. Jaik 1,8 triệu urang Islam di dunya ba gauk tal Mecca meng harei 14/6 piah ngak rukun haji. Rilo taneh ia jeng brei thau lac hu menuac di taneh ia drei metai tuk nao ngak rukun haji kayua langik pandiak atau lahik oh duah mboh. Mintri Y tế Saudi Arabia brei thau, dalam harei 16/6 hu 2.764 urang abih prein kayua daok di langiu pandiak biak suai saong oh ngak tui tacei pato plaih di ia harei di tuk langik pandiak khang abih dalam harei. 

Takik di nyu 2 urang njauk cuh metai di tuk pahadar Harei di ame pak Texas di melam 15/6 – sa dalam rilo mbang cuh phao di negar Mỹ. Hadei di nan, 7 urang njauk cuh dalam sa mbang cuh phao di Methuen, Massachusetts, di dah page harei 16/6. Tui urang jakar, dua dalam dom urang njauk bala biak khang, mbuan matai saong 5 urang karei daok hu tani tanat. Dom urang njauk bala hu umo meng 15 tal 22 thun. dahlau di nan, 2 urang metai saong 2 urang karei njauk rambuac di sa hộp đêm pak Columbus, Ohio, di dah page 14/6.

Tui Akaok Mintri Lao động Marian Jurečka, Cộng hòa Séc daok dang anak bruk kurang urang ngak biak khang ngak kandah tal bruk cakrok patagok di taneh ia ini dalam pluh thun tal. Piah langyah bruk ini, rajaei Séc daok ba tabiak dom jalan ngak piah patagok năng suất saong pachreih patagok umo thun ngak bruk. Langiu di nan, rajaei brei salih bharau bruk jien bilan padeih hưu, dalam nan hu bruk tagok umo thun padeih hưu, saong dom bruk karei piah pachreih urang daok veik ngak bruk suai lavik jang./.