Pahadar 134 thun Harei manek Chủ tịch Hồ Chí Minh, 95 thun padang  Công đoàn Việt Nam (28.7.1929 - 28.7.2024) saong Bilan Urang ngak thun 2024, di harei 19/5 anak tal, di Hà Nội, Mbao Lao động meda peih ngak Danak dak pok je Việt Nam ngan haong asal kadha “20 thun pamadeih prein khang Việt Nam”. Di Danak dak pok je Việt Nam thun ini, Mban peih bruk meda pok mayaom 20 kapul nyaom, manuac urang naih gheih, angan je dalam yaok gah di raidiuk, xa hoi. Hadei di 20 thun, danak dak pok je Việt Nam hu pok mayaom 294 kapul nyaom, manuac urang. Dom jak jeng di 40 thun salih bahrau di taneh ia hu bruk rik tame di dom kapul nyaom, manuac urang hu pok mayaom dalam danak dak.

Peih ngak tabung glaong bruk pakacah “Đồng Khởi bahrau”, Kapul urang ngak nong dom pakat dalam tỉnh Bến Tre hu ba tabiak ngak, pachreih tui bruk pala phun hadar Wa. Tapa jak ba, dom kapul nyaom, menuac urang daok dalam saong langiu tỉnh hu daong 5.000 phun dầu, 10.000 phun mai kanjik, 6.000 phun bông giấy, 6.000 phun paneing, 2.500 phun hoàng yến. Kapul urang ngak nong tỉnh Bến Tre jeng hu parabha brei dom pakat kapul 9 huyện, ban dalam tỉnh piah pala di dom labik hu rilo menuac nao mai.

Công an tỉnh Đắk Lắk gam haong kanja palei hu peih bruk padang ngak 807 baoh sang anit ranam. Tal urak ini hu 270 baoh sang hu ngak salah, jao ka dom baoh sang piah tame daok. Ini lac bruk ngak di Danak dak padang ngak 1.200 baoh sang anit ranam alin ka sang kathaot, sang gaok kan kandah ka sang daok di tỉnh Đắk Lắk hu Mintri Công an peih ngak ngan haong phun jien padang ngak abih tih labaih 96 tỷ đồng. Yaok baoh sang praong 36 m2, hu paga pacang, tabung tôn, nền kiak. Phun jien padang ngak yaok baoh sang takik di nyu lac 80 triệu đồng, dalam nan Mintri Công an daong 50 triệu, daok veik lac kayua Công an tỉnh Đắk Lắk saong dom puk palei ieu pataom, rik tame.

Tỉnh Hậu Giang daok peih ngak rilo jalan ngak piah pacang caga glut jaleih takai kraong tuk yam tame bilan hajan. Tỉnh ieu dom gah chức năng, dom puk palei pataom tame ngak khang jang bruk pathau khan, kuhria mboh dahlau, khan brei thau dahlau piah bhap bini thau caga saong patrun dom khat lahik anak bruk glut jaleih, peih ngak samu gauk dom jalan ngak khik caga salamat ka bhap bini. Dom puk palei brei jhul khang jang bruk pathau khan piah ka bhap bini oh padang ngak sang daok di tapen kraong, tapen ribaong, pacang jalan ia nduac ba tal glut jaleih.

Bahrau ini, adei Ngô Nguyễn Thành Nhân lac anek saih bac tal 6 Sang bac  THCS saong THPT Ngô Văn Nhạc, xã Mỹ Tân, huyện Cái Bè, tỉnh Tiền Giang tuk nao di jalan pak puk 1 xã Mỹ Tân ye duan hu sa kadung teik kalik, gah dalam hu 3.166.000 đồng min oh hu harak gar hagait nan ye oh thau thei piah biyar veik. Hadei di nan Nhân ba nao tal công an xã Mỹ Tân pathau khan piah daong jao veik ka urang ngak lahik. Tapa pasang iek, công an xã hu brei thau kadung teik kalik nan lac di amuk Nguyễn Thị Nhanh, daok dalam puk ngak laik. Taduan hu paok jien, amuk Nhanh biak uan tabuan saong pok mayaom bruk ngak siam di adei Ngô Nguyễn Thành Nhân.

Điện Kremlin brei thau, Tổng thống Nga Vladimir Putin hu mbang ravang pakat karja tal Trung Quốc dalam 2 harei lac 16 saong 17/5. Ini lac mbang tabiak negar langiu camereip abih di ong Putin kuhria meng di tuk ong tagok ngak Tổng thống nhiệm kỳ bahrau. Tổng thống Nga Vladimir Putin haong Chủ tịch Trung Quốc Tập Cận Bình meda ginum biai cambaih laih taong abih dom bruk ka talei pambuak bruk abih gah, ba tabiak dom jalan ngak praong piah patagok jang talei pambuak bruk biak biai Nga-Trung, gam haong nan, ndom biai nao mai ka dom bruk dunya saong bhum taneh.

Indonesia taduan hu paok masaiy daong di Japon yaom tagok tal 903 triệu đôla Mỹ piah patui bruk peih praong dom radaih apui dien lubang di ban ine Jakarta. Paok masaiy hu pandar tame bruk padang ngak jalan atah 24,5 km, pandar kong nghe di Japon. Bruk padang ngak labik jalan bahrau, dui atah meng gah timun tapa gah pai, saong dom jalan pasei abih gah meda patui veik ngak trun manieng bruk gar jalan nao mai, pasiam veik alam moi truong, trun manieng dom kanjak jhak di alam saong daong ka dom kham marat pacang veik haong bruk BDKH di Indonesia. Dalam tuk nan, dom paka pambuak gauk kinh te saong kong nghe Japon meda hu pandar.

Bộ Nội vụ Đức bahrau khan lac brei patagok dom bruk ngak piah khik salamat dalam tuk hu Giải vô địch dit blong châu Âu - Euro 2024 di taneh ia ini meng 14/6 tal 14/7 tal. mBan peih bruk Euro 2024 duah jalan pacang cakak dom bruk yau ye tấn công khủng bố, tấn công mạng... Gah an ninh Đức hu brei bruk khik caga siam mekre ka 2 triệu 700 rabau menuac takre dit blong di 24 labik di dom kapul dit blong di rilo labik dalam taneh ia ini saong 10 sân vận động – labik hu 51 mbang dit pakacah. Dom labik brei ka urang takre jeng meda hu mbaok 12 triệu tuai./.