Dah page ini (28/10) di Hà Nội, Mintri ngak nong saong patagok palei pala hu pambuak haong Kapul dunya ka khik caga langik tasik di Việt Nam peih ginum biai “Bruk ngak di dom kapul langiu rajaei dalam bruk kham marat salih bruk pandar ralaow athur gilai, meda ngak njom mbak ruak meng athur tapa manuac”. Dom harak ndom puac di mbang ginum biai hu klah rabha ka bruk patagok taong abih gah dalam talei pambuak bruk di anek manuac, athur, kayau patau saong môi trường sinh thái; sanya patagok bruk pambuak gauk pacang caga jit ruak njom mbak meng athur tapa manuac, abih di nyu nan lac patagok dom bruk pathau khan, ba tabiak jalan langyah dom bruk kan kandah di dom adat urak ini pambuak tal jit ruak njom pambak meng athur tapa manuac.

Di mbang nyaom ka 4 QH mbang XV, yaom xăng menyek lac bruk  hu urang QH caik hatai sangka. Tui taong yaom, bruk klaih klaoh labik pabak xăng menyek hu Mintri Công Thương kham merat tame bruk, min jeng daok brei samar pasiam veik, bac megru dom ilamu meng bruk tapa bloh, oh caik ka nyu rah tabiak veik. Urang QH hu panuac caong brei dui katut panak tukvak ramik yaom xăng menyek. QH njauk brei quyền ka UBTVQH pasang iek, cakak trun dom janih je, phí pambuak tal xăng menyek yau thuế giá trị gia tăng, thuế tiêu thụ đặc biệt piah pasang iek lạm phát hu samar di abih.

Nyaom biai ka bruk blac raih tim mạch pakat dunya hu peih tabiak di Cần Thơ harei 27/10, hu mbaok di dom chuyên gia, bác sĩ daok ngak bruk di dom labik y tế dalam saong langiu di negar. Tui Gah y tế dunya, ruak di baoh harai lac makna ba tal metai glaong abih di dunya, yaok thun ngak ka 18,6 triệu urang metai, meblah 44% abih tih dom urang metai kayua dom urang ruak oh njom mbak. Di Việt Nam, dom urang metai kayua ruak baoh hatai yaok thun lac 200.000 urang, labaih 25% urang Việt praong thun daok njauk ruak baoh hatai saong tui kuhria daok mboh di rilo urang ranaih umo. Nyaom biai piah daong paglaong ilamo taong ruak ka dom janih ruak tal baoh hatai ngan haong yaom jien lagaih di abih. 

 UBND tỉnh Bà Rịa-Vũng Tàu bahrau hu harak ieu UBMT negar Việt Nam tỉnh nộp pok jien labaih 73,4 tỉ đồng ieu pataom ka bruk pacang caga jit COVID-19 daok labaih veik (kuhria tal jhung thun 2021), mai Kadung jien vaccine kayua Mintri jien padai khik ramik. Gam haong nan, urang pan akaok tỉnh ieu pasang iek pok jien brei ka dom huyện, ban min dom labik nan oh ka pandar abih, duah thau makna, mek veik piah khik ramik, pandar njauk adat hukum.

Sở Pato magru TP.HCM brei thau, dom sang bac di dalam ban raya brei kadun veik mon tame tal bac tui yaok pakat bac. Tui nan, anak tal, dom pakat tiểu học, mầm non tame bac di mon 7 mateh, pakat THCS tame bac  di mon 7, 15 minit saong pakat THPT tame bac di mon 7. Tui labik, tui jalan radaih bo dom sang bac meda rami ramik ka nyu lagaih.       

 Ngoại trưởng Canada Mê-la-ni Giô-ly (Melanie Joly) bahrau hu mbang taom gaok Ngoại trưởng Mỹ An-tô-ni Blinh-cừn (Antony Blinken) di Ốt-ta-oa (Ottawa). Dua gah hu ginum biai rilo bruk di dua gah, njauk gauk brei ginum biai praong Canada - Mỹ mbang camereip abih ka  Ấn Độ Dương - Thái Bình Dương piah pambuak pagam jang dalam bruk mai jaik haong bhum taneh ini. Di bilan 9, dom taneh ia ini njauk gauk ka dom bruk piah ginum biai ngak brei khang kajap jang talei pambuak bruk pablei salih, môi trường haong kinh tế.

Tal urak ini hu labaih 13 triệu urang buh phieu aval dahlau di mbang pilih ruah kreih tukvak di Mỹ hu peih tabiak di harei 8/11. Tui kuhria dom urang buh phieu aval ini meda yam tapa tanut di thun 2018 meng 1 triệu tal 3 triệu urang, dalam nan meblah rilo meng lac dom urang buh phieu tapa jalan bưu điện. Dom urang buh phieu aval lac sa dalam dom jalan ba tal bruk buh phieu glaong abih di dom mbang pilih ruah di kreih tukvak di Mỹ.

Gah y tế Romania brei thau, taneh ia ini hu mbang tamuh jit tả pabui châu Phi mbang ka 2, tui kuhria mboh dahlau, 20.000 drei pabui meda ba nao am cuh klaak. Bruk brei takik nao mai hu pandar chip haong bhap bini, athur saong radaih peih; dom bruk pasang iek hu peih tabiak ngak meng harei ini (28/10). Romania lac taneh ia hu rilo mbang tamuh jit tả pabui châu Phi di abih dalam Liên minh châu Âu, jaik 200 bruk hu mboh dalam thun ini./.

Urang lang: M.P & Thu Thao