Mban Bi thu T.Ư Đảng birau patabiak sarak iew dom pakat ủy to chuc đảng, urang ngak praong dom gah, karja palei dang tabiak tacei ba tapak piah ngak jeng bruk njauk gauk, kham merat glong peih ngak dom bruk taoh talaih “thẻ kanjik” dalam thun 2024. Sarak iew dom mentri, dom gah, karja palei brei pakhang bruk khik iek gilai ikan, gilai ngak bruk gah kaya ikan dalam ia, labik gilai ikan pataok tame, kapol gilai; langyah ka nyu salah abih bruk gilai ikan oh hu harak gar, oh tut angan, oh đăng kiểm; peih ngak catang bruk mbaoh tangin, taduan saong duah thau kaya iakn dalam ia hu chap mek meng halei mai. Gam haong nan, pasang iek hu taong abih  kaya ikan dalam ia taong chap hu di tasik, di tapen ikan; oh hu kaya ikan taong chap suan hukum  pablei tabiak negar langiu…

Bilan pandiak thun ini, yaom lac ia mbak njom tame dalam, ia taba hu takik  min urang ngak nong di tỉnh Tiền Giang jeng daok pala hu labaih 3.000 ha njam patam, dom taneh thu lagu oh hadom. Mikva urang ngak nong pala dom janih njam patam lagaih haong langik pandiak yau ye: dom janih njam sabei, baoh daak, baoh kadaoh, lanaong, mariak, tamekai, baoh paya…Piah ka phun pala tamuh siam, jaik abih urang ngak nong hu khik piah ia dalam bingun, pandar ia pruh patak pataom, pacang paning. Tui panuac khan di urang ngak nong, pala njam patam bilan pandiak abih rilo phun jien jang min pablei mbuan jang, yaom glaong jang bilan hajan meng 5-10%.  

Đồng Nai hu 23 trieu drei manuk ada, lac tỉnh hu taphon manuk ada ralo abih dalam dom tỉnh, ban gah Meraong. Anak bruk rah tabiak sraw kadau di jit manuk ada dalam negar, Chi cục Raong glang Thú y tỉnh Đồng Nai daok jhul khang bruk pasang iek labik hu virus piah samar thau ruak saong brei pakhang bruk pruh jru pametai anek ruak, ngak brei hacih dom labik mbuan hu jit ruak. Tui nan, tỉnh Đồng Nai pakhang bruk pasang iek, tui iek, labik jaik taphia haong dom tỉnh hu jalan radaih, jalan kraong …piah samar duah mboh saong langyah dom bruk pablei salih manuk ada suan hukum.

Meng akaok thun tal ini di tỉnh Gia Lai gam gam hu bruk mblung ia ngak brei 13 uranaih matai, rilo meng lac uranaih daok di bhum kan kandah, bhum bangsa takik. Yaok thun, dam dara urang đoàn di Gia Lai hu peih dom tal pato caluai oh mek jien ka uranaih, saong thun ini hu peih pato tal dom bhum atah bayah. Daok tui Sở Lao động, Thương binh saong Xã hội tỉnh Gia Lai, piah pacang caga mblung ia di uranaih, brei hu bruk ba tangin tame di abih menuac sia. Abih di nyu lac amaik ame gauk gar brei caik hatai jang tal bruk khik caga saong iek glang uranaih, abih di nyu lac di tuk padeih hè.  

Akok UB bhap bini tỉnh Cà Mau tacei pato jabat chuc nang ngak  brei cambaic laic bruk apui khuah glai phun tràm, langyah catang tui hukum meyah mboh ngak suan.  Dahlau di nan, tuk jala pandiak harei 10/4 di palei Cơi 6B, xã Khánh Bình Tây, huyện Trần Văn Thời hu apui khuah glai ngak lahik labaih 40 hecta phun tràm pala gilac thun 2019. Gah chức năng hu ieu pataom jaik 600 urang lin, bol bhap tame padam apui, urak ini apui hu pacang cakak, oh daok khuah tapa dom labik glai jaik nan.   

Di nyaom biai 3 gah pakat glaong mbang camereip di Mỹ, Japon saong Philippin peih tabiak di Mỹ harei kabroi, 3 taneh ia hu tabiak harak brei panuac sanya haong gauk ka bruk 1 Ấn Độ Dương - Thái Bình Dương tự do saong peih praong, pambuak gauk, kaya meda, salamat.. Panuac sanya haong gauk hu ndom tal bruk pachreih tui dom taneh ia pulao kaoh Thái Bình Dương saong pok meyaom kham merat di dom gah, lac kapul 4 taneh ia, AUKUS, 3 gah Mỹ - Japon - Hàn Quốc piah pachreih tui sa bhum Ấn Độ Dương - Thái Bình Dương sron mbon, tani tanat saong tui adat hukum. 

Tui Kadung jien Uranaih LHQ, labaih 243 trieu uranaih di grauk labik dalam Đông Á saong Thái Bình Dương mbuan njauk ruak saong metai pambuak tal langik pandiak tuk bhum taneh ia jaik tame bilan hè langik pandiak khang. Pandiak biak khang ngak ka rilo taneh ia Đông Nam Á brei ba tabiak panuac kakei atau meng bruk ngak. Thái Lan iew bhap bini brei caga mebuk pandiak hadei di tuk hu 2 urang metai. Philippines brei padeih dom tal bac tapak di dom ban saong salih tapa bac online kayua langik pandiak.

Rajaei Prang hu ba tabiak sa Dự luật brei adat urang praong thun njauk ruak ung thư tukvak puac atau dom ruak kan kandah oh klah di matai hu pandar jru daong pamerai rup. Dự luật hu ba tabiak tuk hatai caong di rahra ka bruk hu adat brei daong pamatai rup eng dak harei dak tagok. Bruk daong pametai rup eng hu brei adat di Thụy Sĩ, Bồ Đào Nha saong dom bang di Mỹ. Metai dalam siam mekre piah plaih di pandik harao urak ini hu maong lac njauk adat hukum di Hà Lan, Tây Ban Nha, Canada, Australia, Colombia, Bỉ saong Luxembourg tui dom kadha ba tabiak di hukum./.