Tui Hiep hoi An ninh mạng pakat negar, dalam thun ini, yaok 220 urang hu pandar samart phone di Viet Nam ye hu sa urang njauk gaok pachot pagat. Khat lahik kuhria mboh dahlau  kayua pachot pagat  online  ba tal thun 2024 tagok tal 18.900 tỷ dong. Hu mboh urang njauk pachot pagat ralo min takik thei mek hu veik jien biak takik. Tuk njauk urang pagat, yaom lac labaih 88% urang pandar phone hu khan brei thau chip, khan ka gauk gar ayut sahabat, min tok hu labaih 45% urang pandar phone hu khan brei jabat karja thau. 

“Festival bruk ngak sara Viet Nam - Bac Lieu: Jalan 100 thun bruk ngak sara – rai menuac”. Festival ini hu rah rabiak meng harei 6-3-2025 tal 8-3-2025 haong angan “Patagok yaom glaong asar sara Viet Nam”. Festival bruk ngak sara Viet Nam – Bac Lieu 2025 kuhria tal 3 bruk praong: khik ramik saong patagok yaom glaong sajarah, ilamo bruk ngak sara; paglaong yaom kaom jien padai tapa bruk pandar ilamo ky thuat tame bruk ngak pandap sara; patagok bruk pambuak gauk di urang ngak sara, gah pablei salih haong hop tac xa piah ba sara Viet Nam tame dalam darak pasar dunya.

Mentri Chi huy Bol lin Bien phong tinh An Giang birau peih bruk pathau khan ka sajarah dak rai  80 thun anh hung di Bol lin Bhap bini Viet Nam ka mikva bhap bini di ban sit Tịnh Biên tinh An Giang. Di var pathau khan, labaih 200 bhap bini hu khan brei tau ka dom bruk ngak naih gheih saong pathau khan bruk ngak hu hadah krah di Bol lin, gah Bol lin Bien phong saong  di Bol lin Bien phong tinh An Giang. Gam haong bruk pathau khan, Bol lin Bien phong tinh hu jao brei 200 paok pandap ka bhap bini bangsa takik di bhum tapen negar.

Tinh Dong Nai hu Trung uong pok meyaom lac tinh ngak salah blaoh bruk brei oh daok sang taik tahak meng thun 2019. Min, urak ini jeng daok 520 baoh sang bangsa takik khin daong jien piah padang sang barau, pasiam veik sang daok. Kayua nan tinh hu jak ba phun jien meng dom danak dak trun kathaot saong ieu da-a dom gah ngak pahla daong ka baoh sang kathaot hu pasiam, pakajap sang danaok. Dalam thun ini, hu padang saong pasiam 213 baoh sang gul pataom ka baoh sang kathaot, kan kandah lac urang bangsa takik, hu abih tih jien labaih 14 ribau 700 ty dong.

Dom harei ini, hajan oh njauk bilan rah tabiak di ralo labik di bhum taneran kraong Cuu Long, di dua tinh Tien Giang saong Ben Tre  hajan oh njauk bilan ba tal urang pala bingu Tet having kakok. Urak ini, dom baoh sang pala bingu Tet glaig glar njuk pruh tathuak ia hajan tabiak, pruh jru pacang halak halin…Langiu di nan,  kayua oh hu pandiak yau na ye bingu  mbuan khut oh tabiak baoh bingu oh njauk tukval. Pala bingu Tet lac bruk ngak meng kan di tinh Tien Giang, Ben Tre, yaok thun, 2 bhum palei ini hu labaih 10 trieu pandap bingu Tet tabiak darak pasar.

Dom urang Muslim Islam di Indonesia hu tut angan piah nao haji pak Mecca yaok thun hu tagok rilo jang, tal ini mboh hu labaih 5 trieu urang daok dalam harak cang. Rajaei Indonesia jaik ini jeng hu jak ba karja Saudi Arabia brei tagok rilo mbang urang nao Haji ka urang Indonesia hu 20.000 mbang, mek hu taong abih 221.000 mbang urang sa thun. Min, tanut ini nyu samu lac sa urang Muslim brei cang takik abih lac 25 thun tra meng tal mbang hu nao. Harak cang hu nao Haji dui atah kayua labik haji aguma di ban Mecca oh ginup ka rilo urang.

Salih ka tuyet patih, Noel di Australia bauk pandiak, kayua taneh ia ini daok di Gah Meraong baoh taneh yau nan ye dom  bilan njuak cagar veik. Urak ini dom pho hu ngak mekre hadah  meng phun thong saong gom Noel, dom baoh sang hu ngak mekre meng yaok ribau talei gom saong rilo pandap ngak mekre karei tui kadha do Noel. Di Sydney, dom hare ini daok peih ngak rilo darak pasar Noel. Tuai damuai hu iek phun thong Noel glong di pasak Martin Place ngan haong 110.000 gom led, sa patuk  salih sambo mau glong 3,4 met, gam haong 330 pandap mekre karei tra.

 Takik abih lac 32 urang ngak hadeng di Afghanistan daok gar hadei di sa mbang jaleih labang dang di tinh Samangan, gah Barak negar ini. Urak ini dom urang lin daong veih daok samar chip duah dom urang ngak dang daok gar. Gaok bala di labang dang bhian rah tabiak Afghanistan kayua dom adat pasang iek bruk ngak oh ka tani tanat. Langiu dang patau, daok kuac mek patau hijao, khoang san, ameh saong patau chiet jien. Min, urang ngak bhian ngak bruk dalam labik oh kajap bo jeng oh hu pandap paacang khik rup drei ka njauk.