Dalan nan Thu tuong pandar Akaok UB Bhap bini dom tinh, ban pandar labik tantu cambaih laih ngak bruk; sangka iek praong pasang iek siam dom bruk ngak suan hukum jalan mbak bhian rah tabiak dalam mbang padeih padei raya, dom jalan, labik saong tukvak mbuan rah tabiak bala jalan mbak, gar jalan di dalam labik daok; padang bruk pasang iek 24/7 dalam mbang padeih padei raya. Gam haong nan brei thau lek taka phone jalan talei pandiak ka bruk khik kajap siam mekre karo salamat jalan mbak ka rahra.

Roya Vesak Lien hop quoc 2025 peih ngak meng harei 6 tal harei 8 bilan 5, di huyen Binh Chanh, Ban raya HCM. Giao hoi Phat giao Viet Nam dang tabiak peih ngak Roya Vesak Lien hop quoc 2025 piah ayut cuai sahabat di dunya hu mai tal Ban raya HCM. Tapa nan dom asar kadha di danak dak, nyaom biai ilamo, bruk ngak ilamo, xa hoi di Roya Vesak Lien hop quoc 2025, ayut sahabat dunya hu thau cambaic laic jang ka bruk sajarah jeng yau ilamo Phat giao Viet Nam dalam nan hu labaih 2000 thun pambuak pagam haong bangsa taneh ia.

 UB Bhap bini tinh Tien Giang bahrau peih pakak, ba tame bruk ngak tatua Tân Phong – pambuak tapa kaoh pulao angaok kraong Tiền dalam huyen Cái Bè saong huyen Cai Lậy. Tatua Tân Phong hu padang ngan haong taong abih phun jien buh tame lac labaih 239 ty ndong, lac sa dalam dom danak dak hu makna di Tien Giang, daong xa Tân Phong, huyen Cai Lậy brei oh daok xa kaoh pulao, pambuak jalan mbak ngan haong taneh riya; brei kein lagaih patagok kinh te – xa hoi, daong paglaong raidiuk daok dang me-in di rahra bhum palei.

Tinh Ninh Thuan daok kham merat peih bruk ngak brei abih baoh sang oh daok taik tahak tal harei 30 bilan 6 meda hu ngak salah blaoh, daong yaok rituh  baoh sang urang bangsa takik hu daok dalam sang birau, khang kajap. Danak dak daong yaok baoh sang padang ngak birau hu 60 trieu dong meng kadung jien karja, gam 20 trieu dong jak ba bhap bini rik tame. Ngak habar piah yaok baoh sang padang ngak hu jaik 100 trieu dong, daong mikva hu labik daok khang kajap.

Tal tukvak ini, urang ngak nong tinh Hau Giang hu yuak blaoh mbang padai bilan Dong Xuan, hu tanut laba mek hu meng 25 trieu dong/ha ba tagok. Urak ini mikva hu trun pajaih hu labaih 53.000ha padai He Thu. Gah ngak nong Hau Giang pachreih, mikva pala drak patui tame langik karei di yaok bhum, gam haong pambuak haong bruk pasang iek halak haling ndam di phun padai piah ruah hu tukvak trun pajaih bilan He Thu ka njauk lagaih, khik kajap plaih di halak haling.

Kong ty Jalan pasei An Do birau padang ngak iek sa got ATM mek jien tu dong  angaok radaih pui. Bruk sahaneng hadah  krah birau nan lac kham merat di gah jalan pasei An Do piah salih bruk ngak mbang pablei salih, pasiam jitvu, peih tabiak jaman birau saong bruk patagok birau. Makna di bruk nan piah pabak ka bruk jirah rivang yulit pakat dunya, jhul pakhang bruk pajeng ba pandap panda  saong hu pandar kong nghe birau.

Di Japon daok rah tabiak raya bingu do quyen. Raya hu padang peih ngak di kalan Nezu yao klak hu umo jaik 1.900 thun, tuai damuai mai tal ini brei hu maong iek bruk siam gheih di mbuan bingu do quyen ngan haong labaih 3.000 phun daok dalam labaih 100 pajaih karei gauk. Do quyen lac janih bingu hu rahra Japon biak chreih mekre saong hu pala rilo dalam bein bingu, paga, mblang sang baha saong dom kalan. Yaom lac sa janih bingu bhian, min do quyen tuk halei jeng bau tal hatai gheih ghang siam mekre saong sron mbon salamat, biak karei dalam ilamo Japon.

Jabat chuc nang Thai Lan khan lac, dom mbang bala rah tabiak angaok jalan mbak parilo dalam bingun peih ngak adat Thaik ia Songkran, ba tal 200 urang metai saong jaik 1.400 urang njauk rambuac. Urak ini yaom lac adat Songkran tamat blaoh, min daok hu dom bhap bini likau padeih ngak bruk dui atah piah nao rivang gauk gar atau jirah rivang ma-in. Yau nan ye, jabat chuc nang Thai Lan brei patui veik bruk pasang iek, jalan mbak piah hu samalat siam mekre, takik rah tabiak bala./.