Tui sarak kadha birau di Mentri Kong an, urang pakacah mek sarak adat  peih radaih moto meyah laik binah cih vak min brei pakacah dom kadha daok veik. Yau ye, asar kadha sát hạch radaih hang A1, A, B1 hu kadha vak saong peih radaih tui jalan cih. Urang pakacah oh gam binah cih vak min hu brei pakacah peih radaih tui jalan cih. Urang pakacah binah cih vak hu siam atau pakacah peih radaih hu tapa tanut ba tabiak blaoh ye brei khik veik tanut nan dalam 1 thun. Jeng tui sarak ini, urang hu sarak peih radaih oto daok tukvak pandar ye brei klak tapa pakacah binah cih vak tuk tut angan pakacah mek sarak adat peih radaih moto, radaih patuh.

Di ban raya, ban sit dom diuk pasang klaoh klak gauk sumu 2,9%, rilo jang 2,4% urang daok di bhum palei pala, dalam nan di bhum Dong Nam Bo dang akaok hu jaik 560.000 urang, tui nan lac Bhum taneran kraong Cuu Long hu labaih 521.700 urang ralo abih dalam negar. Tapa bruk pasang iek dân số bhap bini saong sang daok kayua Tong cuc Yaok kuhria birau ba tabiak. Ban ray HCM hu diuk pasang klaoh klak gauk  ralo abih, hadei di nan tal Ban Ha Noi. Ini lac dua ban praong hu rilo bhap bini abih dalam negar.

Huyen Chợ Gạo, tỉnh Tiền Giang birau mek hu tanut chuan palei pala birau paglong. Chợ Gạo nan lac sa dalam dom bhum palei ngak mbang cakrok patagok tani tanat abih di tinh Tien Giang. Baoh sang kathaot rilo gah di taong abih dom xa dalam huyen  tok daok 1,91%. Tapa jaik 10 thun salih birau, mbiah tal ini Chợ Gạo tok daok labaih 130 ha padai, hu jaik 16 ha salih tapa pala dom janih phun pakau mbang baoh hu kein lagaih di huyen  yau: thanh long, la-u, kruac bung...daong ka urang ngak nong duah hu jien tame rilo. Abih di nyu nan lac jien mek tame meng bruk pala thanh long lac 600 trieu dong sa hecta.

Danak dak “Bilan klau bhum tapen negar” ngan haong kadha “ Dhlak anit Taneh ia dahlak”  birau hu peih ngak di Don Bien phong pabah mbang negar dunya Vĩnh Xương, ban sit Tân Châu, tỉnh An Giang. Danak dak hu rilo bruk ngak yau ye: salam hala dok di got jameng padang di tapen negar 241, cuh gilau di sang pahadar Balai Biên phong, alin 20 kadung pandap ka anek saih kathaot saong baoh sang ka urang di sarak karja. Tapa danak dak, Mban peih bruk caong takre hu pambak praong hatai ranam taneh ia palei negar, paglong jalan sahaneng khik caga bruk ngak po di dam dara.

Di tinh Dong Nai, yaom pabaiy pablei ngak rilo lac jaik 150 ribau dong sa kilo, glong jang 40 ribau dong sa kilo dut saong tukvak ini thun dahlau. Tui urang ngak nong khan lac kurang pablei pablei dalam tuk urang daok caong blei rilo pabaiy dak harei dak rilo ba tal yaom pabaiy diuk tagok glong. Urak ini, urang khin blei ralo pabaiy dak harei dak rilo yau nan ye urang raong pabaiy di dom palei di Dong Nai buh jien tame raong pabaiy. Mikva raong glang pabaiy hu daong brei phun jien, tacei pasram bruk raong glang. Yau nan min, karja dom bhum palei hu kakei mikva brei kuhria caga bruk pablei pabaiy tuk blak gauk raong rilo.

Thai Lan daok parilo jalan pacang caga jit ruak tapa bruk dut iek ruak ka tuai damuai mai meng dom taneh ia hu mbuan hu jit ruak, hadei dom harak pathau khan ka jit ruak pandiak oh ka thau meng halei mai di taneh ia CHDC Congo birau ini. Tui nan, taong abih tuai damuai  mai meng Congo meda hu pasang dut iek pandiak dalam rup saong brei thau labik daok, laik phone di urang pak Thai Lan, jeng yau tukvak mai meng Congo. Tui Gah Y te Dunya, kuhria tal harei 19/2, mbang tamuh jit ruak oh ka mboh meng lavik mai di CHDC Congo, ngak ka 955 njom ruak saong 60 urang metai.

Bilan Ramadan di urang Islam daok peih ngak, rilo bhap bini  Pakistan sami samar kuhria blei pandap piah mbang eik tui adat hu makna biak praong dalam thun. Dalam nan lac baoh kayau that, chala saong dom janih pandap mbang karei karei yau ye bei prang hu biak rilo urang takre. Yau nan min, bhap bini bayar abih ralo jien blei pandap oh siam. Rilo bhap bini brei mboh hatai caong takre rajaei ba tabiak dom sarak langyah bruk khat lam phat jien padai. Dalam tuk nan, dom po kuan pablei tagok yaom blei pandap tame biak glong.

Sa mbang langik la-ar birau tame bhum Barak saong Đông Trung Quốc ba tal nhiet do la-ar trun labaih 10oC tui nan lac hajan, tuyet saong hangin catang. Nhiet do biar abih di ban Ergun di bhum Nội Mông, trun la-ar am 38°C. Jabat Kuhria iek langik tasik Trung Quoc ba tabiak tanut katam kanjik ka langik la-ar birau abih jiak ini. Urak ini, karja bhum palei ba tabiak jalan ngak samar drah piah ngak pandiak am tani tanat ka bhap bini, khik taphon athur raong./.