Meng harei ini 1/8, klau hukum ka taneh riya dalam nan hu Hukum Taneh riya, Hukum Sang daok saong Hukum Pablei salih taneh riya hu ba tame pandar. Cambaic laic, njauk lagaih haong raidiuk nan lac dom bruk salih birau meng dom hukum birau ini, hu urang ilamu, doanh nghiep saong bhap bini caong khin lac meda daong darak pasar taneh riya lang talaih hu dom kan kandah daok tavak yau urak ini, patagok khang kajap jang. Bruk nan ba mbuan lagaih piah dom daonh nghiep khang hatai buh jien tame, meng nan pabak taneh riya angaok darak pasar dak harei dak hu siam veik.

UBND tỉnh Sóc Trăng bahrau brei thau harak di Thủ tướng Rajaei pok angan huyện Cù Lao Dung mek hu tanut chuan palei pala bahrau thun 2023. Hadei di labaih 13 thun padang ngak palei pala bahrau, huyện Cù Lao Dung mek hu rilo jak jeng praong saong yam tagok jeng huyen mek hu tanut chuan palei pala bahrau tui Paok asal kadha tukvak 2021 – 2025. Dalam nan, hu xã An Thạnh lac sa xa hu 3 mbang gam mek hu dahlau angan xa palei pala bahrau, palei pala bahrau paglaong, palei pala bahrau kieu mau di dalam tỉnh. Tal urak ini, tỉnh Sóc Trăng hu 70/80 xã mek hu tanut chuan palei pala bahrau.

Kong an tinh Đồng Tháp peih nyaom biai brei pataom iek veik 10 thun peih ngak Kadung jien  patagok ba drei gilac veik tame bhap bini di tỉnh. Dalam 10 thun tapa hu labaih 950 urang salah tukvak daok guk  hu mesre phun jien  jiak 31 tỷ đồng piah ngak mbang patagok kinh te. Kadung jien daong ka dom urang ngak suan hukum njauk duis hu jia hatai  tame bruk sangka di Đảng saong Karja, rajakar palei pala. Meng hu brei mesre phun jien yau nan, urang daok guk blaoh raidiuk kan kandah khin yam tapa bruk melau melit, yam tagok, tani tanat raidiuk, brei takik bruk ngak suan hukum veik di bhum palei yaok thun trun ala 5%.

Tui Cuc Yaok pataom TPHCM, Danak dak jalan pasei Metro ka 1 (Bến Thành - Suối Tiên) hu ngak salah labaih 98% bruk ba tabiak. Piah ba kein lagaih ka rahra pandar  jalan Metro ka 1, ban raya hu peih ngak veik 2 danak dak praong, lac paglaong bruk pambuak nao mai pajeng ba di jalan Metro ka 1 haong 5 mblang khik radaih di tuai rah tui sang ga praong abih tih jaik 5.500 m2 saong peih bahrau 18 jalan radaih bus, radaih taxi, radaih di manuac urang, radaih juak ka rahra hu nduac di jalan Metro ka 1. Tui kuhria, danak dak Metro ka 1 meda ba tame pandar di dalam thun 2024.

UB bhap bini tỉnh Vĩnh Long tabiak panuac samar drah bruk glut jaleih taneh jalan ribong La Ghì di xã Vĩnh Xuân, huyện Trà Ôn. Taneh glut jaleih atah 220m tapa palei Vĩnh Trinh. Labik ini urak ini daok si mbuan glut jaleih veik labaih 200m, ngak jhak tal 15 baoh sang bhap bini saong labaih 50 ha taneh pala drak. Tame bilan hajan, tỉnh Vĩnh Long hu rilo labik glut jaleih mbuan gaok bala. Kayua jien ramik pasiam dom mbang glut jaleih biak ralo yau nan ye karja palei khin karja negar daong brei.

Indonesia brei patagok umo thun takik di abih piah blei pakao meng umo 18 thun tagok 21 thun piah patakik bruk bhian randap oh siam ka prein yava di negar hu rilo manuac njuk pakao. Tui sa sarak hu Tổng thống Joko Widodo mbaoh tangin tame di adit dahlau, Indonesia hu patagok umo takik abih ngan haong dom urang blei pakao saong pakauk pablei le pakao kaok lap jien saong bhian randap di dom quan pablei tapen jalan. Kanja Indonesia jeng kham marat patakik manuac njuk pakao meng jalan ngak lac yaok thun tagok jien je ngan saong pakao hala.

Tong Yam ndoc Gah Y te Dunya ( WHO) brei thau ruak bại liệt hu mboh di Gaza saong ndom lac uranaih  di bhum taneh njauk mesruh metak palai pajoa ini samar njom ruak meyah dom jalan pacang caga oh hu peih ngak samar. Dahlau di nan, Tong Yam ndoc Gah Y te Dunya jeng brei thau lac virus bại liệt  hu duah mboh dalam ia tathuak tabiak di Gaza. Gah Y te Dunya daok payua labaih sa trieu mbang jru vaccine bại liet  tal Gaza piah peih bruk klauk jru pacang caga ruak ka uranaih dalam dom adit anak tal.

Thế vận hội Bilan hè 2024 di Paris daok ngak brei tagok khang ka gah du lich saong gah blei pandar dalam ban. Tui Mintri Du lich France, dom tuai mai tal Paris tagok jang 30% dut saong tukvak ini thun blaoh. Dom labik pablei lẻ di Paris daok rah tapa zaman pablei salih biak cak rok, ngan haong doanh so pablei pandap tagok labaih 25% dalam luac tukvak rahtabiak Thế vận hội. Dom urang ilamu gah kinh te kuhria mboh lac kein laba meng Thế vận hội meda dui atah dalam rilo thun tal. Oh lac jien mek tame tapak meng du lich saong blei pandar, Paris daok taduan hu kein laba meng bruk paglaong thaot binguk saong angan je di dunya.