Harei ini 26/7, Vụ Pato mergru Đại học ( Mentri Pato megru) brei thau kuhria tal melam blaoh, hu 520.000 anek saih tut angan caong khin brei palih ruah tame đại học di he thong daong ka bruk palih ruak anek saih di mentri, kuhria abih tih hu 2 trieu 4 rituh ribau anek saih brei palih ruah. Kuhria rah tapa, yaok anek saih  brei tut angan  4,6 sang bac. Thun 2023, dalam taneh ia hu labaih 1 trieu  anek saih  hu mbaok tame mbang pakacah tamat THPT. Yau nan, 520.000 anek saih hu tut angan tapa he thong palih ruah meblah labaih metah dom anek saih hu pakacah. Lambaok Vụ Pato megru  đại học  taduan lac tukvak ini, anek saih tut angan palih ruah  yau ngaok nan lac tani tanat saong meda tagok jang dalam dom harei puac.

Cục Khik caga phun pala (Mintri ngak nong saong patagok palei pala) bahrau khan lac, Tổng cục Hải quan Trung Quốc hu harak brei thau, kreh bilan 8 meda pasang iek tapak dom bhum pala, labik tame paok la-u that pablei tapa darak pasar Trung Quốc. Cục hu panuac ieu Sở ngak nong saong patagok palei pala dom tỉnh ban ngak salah harak gar, brei urang jakar ilamu tacei pato, daong dom bhum pala, labik tame paok la-u that hu mbaok tame pasang iek tui jalan online tui caong khin di Tổng cục Hải quan Trung Quốc. Trung Quốc urak ini pandar biak rilo la-u that min bhum pala di pulao Hải Nam bahrau pabak hu 10%. Việt Nam hu labaih 180.000ha taneh pala la-u, pataom rilo di bhum tapen tasik gah kreh negar saong bhum taneran kraong Cửu Long.

Sở Jalan mbak pajeng ba tỉnh Tiền Giang khan lac, tỉnh ini daok ngak dom bruk njauk ngak piah samar peih ngak Danak Jalan mbak tapen tasik labik nao tapa tỉnh Tiền Giang pambuak haong tỉnh Long An saong tỉnh Bến Tre vaktu ka 1. Ini lac danak dak hu peih ngak praong, ngak jeng jalan pambuak dom tỉnh piah pabak prein khang cak rok patagok KT-XH bhum Taneran kraong Cuu Long. Tui kuhria mboh dahlau, phun jien buh tame ngak danak dak ini jaik 5 ribau 600 tỷ đồng meng kadung jien karja  pakat negar saong kadung jien di tỉnh. Dalam nan, jien padang ngak , Trung ương meda daong 90% phun jien mesre di ADB, 10% daok veik lac jien di tỉnh mesre veik di Trung uong meng phun jien ADB.

Mesup ini (26/7), sa gheng điện ngin di sang mac Phong điện 1 dalam xã Bình Thạnh, huyện Tuy Phong, tỉnh Bình Thuận nyu khuah. Hu thau, tuk mon 9h15, rahra mboh thak jhuk gam haong sap patuh khang tabiak meng gheng điện ngin di sang mac điện ngin Phong điện 1. Hadei di nna, pui khuah khang meng tua-bin glaong jaik 80m.  Urang pan akaok UBND huyện Tuy Phong brei thau, huyện haong dom gah chức năng dalam palei hu nao tal labik, pambuak haong sang mac ba gauk padam pui. Hadei di rilo mon kham merat, pui hu padam. Sang mac ini hu 80 tua-bin. Tukvak 1 di danak dak hu padang ngak 20 tua-bin ngin hu prein khang abih tih 30MW.                                                                      

Jabat cảnh sát pasang iek Cong an TPHCM hu ngak salah bruk pasang iek, payua ho so tapa Viện Kiểm sát Nhân dân ban raya brei ba tabiak kaoh tui hukum muk Đặng Thị Hàn Ni (luật sư, phóng viên) saong ong Trần Văn Sỹ (luật sư) ka bruk pambak tame quyen tu do dan chu. Tapa duah thau mboh lac, meng bilan 9 thun 2021 tal bilan 2 thun 2022, bi can Đặng Thị Hàn Ni saong bị can Trần Văn Sỹ ba tagok mạng XH  dom panuac kadha ngak jhak tal angan je muk Nguyễn Phương Hằng,  ong Huỳnh Uy Dũng (pasang muk Hằng), ngak jhak tal kein laba di Công ty CP Đại Nam saong Kadung jien  ngak pahla Hằng Hữu.  

 Kadung jien Dunya (IMF) bahrau brei tagok hasit tanut kuhria mboh dahlau bruk patagok kinh tế dunya dalam thun ini meng bruk kinh tế hu siam lagaih dalam 3 bilan akaok thun. Min IMF jeng hu panuac lac kinh tế dunya jeng daok dang anak dom tavak tavaiy dui atah, kayua daok bruk lạm phát, jien laba glaong saong ngak catang bruk brei mesraiy. Dalam pathau khan bahrau abih ka Triển vọng kinh tế dunya, IMF kuhria mboh dahlau lac patagok kinh tế dunya thun 2023 meda hu 3%, rilo jang 0,2 điểm phần trăm duk haong tanut kuhria mboh dahlau hu ba tabiak di bilan 4 meng bloh. Min, IMF khik tamo tanut kuhria mboh dahlau ka patagok kinh tế dunya thun 2024 jeng daok di tanut 3% kayua dom nền kinh tế patagok daok trun bruk nduac samar.

Rajaei Nhật Bản harei ini 26/7 pabak tame dữ liệu mboh lac, bhap bini Nhật Bản daok trun samar abih kuhria meng dahlau mai. Dalam tuk nan, urang negar langiu daok di taneh ia ini tagok tal tanut glaong di abih jaik 3 trieu urang. Tapa dữ  liệu nan hu mboh bhap bini taneh ia langiu  hu labik dang dak harei dak praong dalam XH Nhật Bản piah pabak ka manuac sia di taneh ia  dak harei dak takik. Bhap bini Nhật Bản daok trun thun ka 14, trun labaih 800.000 urang, trun daok labaih 122 trieu manuac  di thun 2022. Ini lac mbang akaok meti, bhap bini Nhật Bản  trun di taong abih 47 tỉnh, ban.

Dom chuyên gia di Viện Ilamu saong Công nghệ (IET) hu jabat di negar Anh daok kuhria ngak sa bruk praong nan lac peih pakacah dit blong mangaok Ia bulan di thun 2035. IET brei thau, bruk pakacah hu parabha jeng 4 mbang atah 10 minit, hu 20 minit padeih padei di kreih yaok mbang dit piah ka dom urang dit blong padang glaih. Yaok kapul dit tok hu 5 urang. Khan ao thể thao saong takhaok dit blong hu salih tapa pandap phi hành gia biak praong, hu prein ngak la-an hu pagam di gah dalam. Dom trọng tài hu mbaok angaok sân tui jalan 3 gah. Tui panuac khan di IET, dom mbang pakacah hu cakak panak piah khik salamat ka urang me-in./.