Kapul  urang Quoc hoi Ban raya HCM, đơn vị ka 5 birau hu var taom gaok cử tri quan Tân Phú dahalu di mbang nyaom ka 5, Quoc hoi mbang XV. Di var taom gaok dom cử tri brei thau bruk haduh hatai anak bruk dom urang jakar pakat phường ngak bruk oh ka gheih, ngak kan kandah ka bhap bini. Langiu di nan, cử tri hu ndem tal bruk lih mek labik tapen jalan; patui bruk daong blei tapuk giao khoa ka thun bac birau; kraong 19/5 di quan  njom nerak tachrauk trak; danak dak  padang ngak tatua Tân Kỳ Tân Quý padeih biak suai, ba tal palai jien padai karja saong drap ar bhap bini; likau brei pasiam, pabak Hukum taneh riya, Hukum sang daok, Hukum pacang caga tham nhũng.

Tapa 2 thun peih ngak Kết luận 01 di Mintri Chính trị ka patui jalan peih ngak Chỉ thị ka 5 brei jhul khang bruk bac megru saong ngak tui jalan hadah krah siam mekre di Hồ Chí Minh, tỉnh Tiền Giang hu 1 kapul, 2 urang hu Thủ tướng Rajaei pok brei harak meyaom saong 1 kapul, 2 urang hu mBan Tuyên giáo Trung ương alin harak meyaom kayua naih gheih dalam bruk bac megru saong ngak tui jalan hadah krah di Hồ Chí Minh. Langiu di nan, hu 1.778 kapul nyaom, menuac urang hu dom pakat ủy Đảng, dom jabat pok meyaom…Patui bruk ini, mBan Thường vụ Tỉnh ủy hu alin harak meyaom brei ka 15 kapul saong 29 urang naih gheih dalam 2 thun peih ngak Kết luận 01 di Mintri Chính trị.

 UB bhap bini tỉnh  Bình Thuận birau khan tapa Sarak  jien bac thun 2022-2023 ngan haong dom labik pato bac pakat mầm non, pato pakai pakat pho thong, pato pakai thường xuyên di karja piah daong, klak rabha dom kan kandah, rik daong tani tanat raidiuk bhap bini. Dalam nan, ngan haong pakat bac mầm nontal Trung học cơ sở bhum palei pala hu daong meng 62.000 tal 92.000 đồng/ sa anek saih  sa bilan. Daok THPT hu daong 155.000 đồng sa anek saih sa bilan. Di bhum urang bangsa takik, bhum ceik saong kaoh pulao hu daong  meng 30.000 tal 75.000 đồng sa anek saih sa bilan.

Pasak patagok quỹ taneh tỉnh Bà Rịa- Vũng Tàu brei thau, yaom lac kham merat jhul samar bruk peih ngak jalan cao tốc Biên Hòa- Vũng Tàu, min tal urak ini, bruk peih taneh piah ngak, labik nao tapa ban sit Phú Mỹ daok gaok rilo kan kandah. Urak ini hu labaih 500 sang saong 2 kapul nyaom hu harak brei bayar labaih 1.000 tỷ đồng ka mblang taneh jaik 45ha. Min jeng daok 372 sang, kapul nyaom oh ka hu harak brei bayar jien, kayua harak gar daok rilo tavak tavaiy. Bruk suai damuai ini ba tal suai damuai bruk peih taneh saong pasang iek, bayar jien ka dom sang

Di tỉnh Hậu Giang dalam dom harei jaik ini hu rilo urang njom ruak COVID-19. Tui Sở Y tế tỉnh Hậu Giang, dalam 7 harei tapa, Hậu Giang hu labaih 60 urang njom ruak COVID-19,  yaok harei hu meng 4 urang ruak tagok. Ta-eng harei 8/5 hu 13 urang. Gah chức năng tỉnh Hậu Giang kakei bhap bini brei caik hatai, juai iek lap jit COVID-19, njauk brei peih ngak siam “ kadha 2 K+”, abih di nyu  brei klauk jru vaccine ginup njauk tui gah Y te peih ngak.

Rajaei Malaysia daok pamaong tal bruk pakauk, oh brei pandar kadung nylon dalam dom bruk pablei salih sit dalam negar di thun 2025 piah trun takik bruk nerak tachauk alam môi trường kayua pandap katak pandar sa mbang. Malaysia lac sa dalam 10 taneh ia dang akaok di dunya daok dang anak bruk kan kandak khik iek pandap klaak tabiak meng katak. Tui pathau khan di Kapul dunya khik ramik langik tasik (WWF), Malaysia pandar 148.000 tấn nhựa piah tame paok pandap mbang dalam thun 2020.

Tui harak pathau  khan birau abih di dom gah ngak bruk oh mek laba bhian tui iek dom mbang patuh phao di Mỹ, meng akok thun 2023 mbiah tal ini, Mỹ hu takik abih lac 202 mbang patuh phao. Tui gah ngak bruk oh mek laba nan, sa mbang patuh phao ralo mbang sumu gauk ngak brei takik abih lkac 4 urang njauk rambuac, oh kuhria urang patuh phao saong dom mbang patuh phao daok patagok di Mỹ. Ta-eng dalam puac adit blaoh hu 7 mbang patuh phao ralo ngak brei 8 urang metai saong 7 urang njauk rambuac.

Dom menuac metai kayua ia sua saong jaleih taneh di gah timur Cộng hòa Dân chủ Congo tagok tal labaih 400 urang, langiu di nan, yaok rabau menuac jeng daok lahik hadei di ia sua. Hajan khang harei 4/5 ngak brei dom kraong ia dauk glaong nduac tapa ar, ngak brei jaleih taneh, dauk dalam ia dom palei tapen kraong, jaleih sang danaok saong palai khut taneh pala. Ini lac bala meng langik tasik praong abih kuhria meng kan mai di Congo. Hội Chữ thập đỏ brei thau lac, urak ini daok hu labaih 8000 menuac daok caong hu daong, labaih 5.500 menuac jeng oh ka duah mboh. Tổng thống taneh ia ini brei caik quốc tang hadar tal dom urang njauk bala./.