Thu tuong Rajaei Phạm Minh Chính birau mbaoh tangin tame Sarak ka 12/CT -TTg harei 21/4/2024 ka dom bruk ngak, jalan langyah hu makna praong jhul pakhang bruk cak rok patagok kinh te -xa hoi,  dalam nan hu bruk Thu tuong jao ka dom mentri, jabat, bhum palei peih ngak siam bruk tani tanat raidiuk rahra; sangka  daong sumu urang hu buh prein daong taneh ia, urang mbang tui sarak karja; peih ngak khang, hu siam lagaih Bruk jak ba pakacah “ Palahik sang taik tahak”, ngak brei salah bruk ba tabiak dalam negar thun 2025. Thu tuong ieu Mentri LĐ-TB saong Xa hoi peih ngak siam dom jalan langyah brei cakr ok patagok darak pasar urang ngak; caik hatai pato pakai bruk ngal birau, patagok saong paglong  asar pato bruk ngak.

Harei ini, anek saih tal bac 12 dalam taneh ia meda tut angan tame pakacah tamat THPT online di mangaok blah web khik ramik pakacah di Mintri Pato magru. Anek saih hu tut iek angan tame pakacah THPT meng harei 24 tal 28/4 di angaok blah web lac https://thisinh.thithptquocgia.edu.vn. Thun ini, abih tih anek saih tal bac 12 jeng njauk tut angan tame pakacah tamat THPT tui jalan online di Mintri Pato magru. Kayua yau nan ye, mbang pasram, tut angan iek di blah web biak hu makna, daong ka dom adei ngak randap haong adat tut angan, gam tui di nan jeng caga dahlau ginup dom khau tin di drei dahlau di tuk tut angan tame biak.

Harei kaboi, QK 9 pambuak haong Sang iek ruak Đa khoa Hòa Hảo - Medic Cần Thơ hu daong brei 5.000 thung ia menyum, yaok thung 20 lít ka bhap bini kurang ia pandar di tỉnh Cà Mau. Urak ini tỉnh Cà Mau hu labaih 2.600 baoh sang bhap bini kurang ia pandar. Dahlau di nan,  Cục Hậu cần, Quân khu 9 hu pandar 3 gilai di Lữ đoàn pajeng ba 659 pambuak haong pakat ủy, karja palei pajeng ba yaok ribau met khoi ia hacih mai daong ka bhap bini Cà Mau, brei mboh bruk jum pataom bol lin – bhap bini, ilamu siam mekre di “Bol lin Wa Ho”.

Pamaong tal rahra bhum pandiak bhang, njom ia mbak, Tập đoàn Tân Á Đại Thành bahrau peih bruk jao pandap caik ia, mac halang ia ka rahra pak xã pulao Tam Hiệp, tỉnh Bến Tre. Tam Hiệp lac xa daook kreih kraong Cửa Đại saong Cửa Trung hu labaih 1.000 baoh sang ngan haong jaik 3.600 urang. Kayua vil val lac ia mbak, oh hu sang mac halei halang ia nan ye urak ini ia taba pak ini biak kurang. Tui nan, gah daong ba hu jao 20 baoh bồn caik ia ka labaih 20 baoh sang gaok kan kandah saong 6 mac halang ia ka 3 labik sang bac di pak ini. Langiu di nan, danak dak jeng alin 4 mac halang ia ka 2 labik sang bac di xã Phú Thuận, huyện Bình Đại, tỉnh Bến Tre.

Pasak Kuhria mboh dahlau bruk langik tasik pakat negar brei thau, dalam 5 harei  padeih 30/4, 1/5 langik pandiak jaik abih dom tỉnh ban dalam negar. Pandiak pa-uh saong pandiak khang dui atah di labik bhap bin daok meda ba tal apui khuah, patuh, apui khuah glai, ngak jhak tal prein yawa bhap bini yau lahik ia, soc pandiak, mebuh pandiak, đột quỵ…Yau nan ye, bhap bini brei caik hatai dalam dom harei padeih anak tal, tuk nao me-in njauk caik hatai tal prein yawa, ba tui ia menyum, payong ma-om, kem pacang pandiak.   

Tổng thống Mỹ Joe Biden bahrau brei thau paok jien daong yaom 7 tỷ USD ka dom danak dak nang luong ia harei rahra pandar pamaong tal pabak năng lượng ka jaik sa trieu baoh sang hu jien mek tame bier. Ong Biden brei thau lac, dom baoh sang hu jien mek tame bier daok buh tabiak tal 30% jien bilan di drei ka hóa đơn năng lượng. Dom urang hu taduan jien daong dalam nan hu 60 jabat saong kapul oh hu kein laba di dom mbang saong bhum palei hu dom danak dak daong ka rahra hu jien mek tame bier hu pandar nang luong ia harei saong patak pataom hu hóa đơn jien dien.

Dalam kham merat patrun patakik bruk pandar pakao điện tử, Australia bahrau chap mek  500 ribau akaok pakao hala điện tử suan hukum, yaom avit tih lac 15 triệu AUD, sumu 9,6 triệu USD. Ini lac mbang chap mek pakao hala điện tử praong abih di Australia kuhria meng dahlau mai. Meng di tuk Australia pakauk oh brei blei meng negar langiu tame pakao điện tử pandar sa mbang di akaok thun ini, dom jabat chức năng di taneh ia ini chap khik labaih 1 trieu pakao điện tử saong pacang cakak  labaih 611 ribau dom janih pakao điện tử blei tame taneh ia ini suan hukum.

Dua sruh haok trực thăng di lin tasik Malaysia harei kabroi ginuh tame gauk di mangaok langik tuk daok pasram di labik lin tasik di mbang Perak, gah Tây Malaysia, ngak ka 10 urang angaok 2 sruh ahaok metai abih. Bala rahtabiak hadei di tuk dua sruh ahaok daok hu mbaok tame pasram piah caga ka mbang duyệt binh dalam harei pahadar Harei ilamo meng kan di lin tasik Malaysia, tui kuhria hu peih tabiak dalam bilan 5 tal. Tapa đoạn băng mboh lac sa dalam dua sruh ahaok trực thăng nyu cacak kandik di sruh daok veik dahlau di tuk laik trun haluk./.