Danak dak  hu ba tame pandar ngak brei cak rok patagok kinh te - xa hoi di tỉnh An Giang, ba mai kein laba  biak praong dalam bhum; gam khik kajap quoc phong - an ninh. Tatua Châu Đốc hu buh jien tame ngak abih 543 tỷ đồng, oh hu talei tuan, atah 667 met,  hu 13 nhịp, 4 nhip chính  atah 260m. Hadei di 24 bilan padang ngak, tatua hu ngak salah, blaoh dahlau dut saong tukvak ba tabiak 9 bilan. 

Piah daong ka urang ngak nong ngak mbang, pala drak hu siam lagaih dalam bilan ngak padai ini, gah chuc nang tỉnh Sóc Trăng hu peih ngak rilo jalan langyah piah trun manieng dom khat lahik kayua njom ia mbak. Di ban sit Ngã Năm hu ngak pasiam 70 bilai njuk ia meng dien di labaih 62% mblang taneh ngak padai di palei. Thun ini, jalan ngak dalam ban sit aval jang labaih 20 harei dut saong tukvak ini yaok thun piah plaih nyaih hu langik hajan hangin khang di puac vụ ngak kan kandah tal padai. Gah ngak nong di ban sit Ngã Năm daok paglaong bruk pato pakai urrang jakar ilamo saong mikva bhian tui iek langik tasik piah caga pacang, patakik dom khat lahik kayua halak halin.  

Sang iek ruak Đại học Y dược Buôn Ma Thuột, tỉnh Đắk Lắk birau pambuak haong kapul Baoh sang ranaih metai glo akok Viet Nam peih ngak danak dak ngak pahala “ Iek ruak, taong ruak saong tacei pato sangka tagei ka uranaih metai glo akaok oh abih jien ka  40 uranaih metai glo akok mai meng dom huyen bhum atah bayah, bhum ceik car dalam tỉnh Dak Lak. Hu tame danak dak, dom kamuan  hu kuak cur tagei, ngak pasiam tagei bruk, buac tagei, brei jru oh mk jien. Langiu di nan, gah daong ka danak dak hu alin brei keo Flour pabum ngak hacih tagei ka dom adei uranaih. 

Cục Jalan mbak Việt Nam bahrau hu harak payua ka sở jalan mbak pajeng ba (GTVT), dom tinh, ban ieu kakei paglaong dom jalan langyah, pabak siam ka hatai caong nao mai di rahra, khik siam makre ka bruk nao mai, salamat di mangaok jalan mbak dalam tuk padeih lễ 30/4 - 1/5 thun ini. Pambuak tal gah pajeng ba, dom sở jalan mbak pajeng ba pato pakai doanh nghiep dalam ban: rami ramik ginup dom sruh radaih, urang peih radaih, urang daong bruk di radaih; Khik siam makre ilamo di mangaok radaih, pabak ginup paka meng pandap panda pasang iek jalan nao saong camera tui njauk adat, samar ngak pasiam dom bruk oh salamat di mangaok jalan mbak di urang peih radaih.

Harei ini, Sở Tài nguyên saong Môi trường tỉnh Bà Rịa - Vũng Tàu brei thau ka bruk ngak brei craoh Giao Kéo di ban sit Phú Mỹ njom nerak tachauk. Tapa dom mbang pasang iek tapak saong pambuak haong tui iek meng dom camera, quan trắc tự động, gah jabat karja oh ka mboh bruk tathuak ia nerak tachauk di dom sang mac dalam labik Tóc Tiên tabiak craoh Giao Kèo. Gah chức năng mboh lac hu jalan cống ia di dom sang bhap bini daok rah tui jalan Châu Pha ba tame craoh Giao Kèo. Taphia nan, 3 pabah mbang angaok craoh Giao Kèo di palei Tân Lễ B, xã Châu Pha njauk kreik sre, pacang jalan ia nduac, ia kandaong veik lavik harei.

Mintri Y tế Lào kakei rahra dalam taneh ia ka bruk tachrauk nerak alam langik tasik biak trak damak tuk tanut njauk dhur mun klik PM 2.5 di rilo tinh, ban dalam taneh ia yam tapa tanut salamat, ngak kan kandah tal prein yava di rahra. Mintri Y tế Lào kakei rahra daok di bhum gaok kan kandah di bruk tachrauk nerak alam, abih di nyu nan lac dom urang mbuan gaok kan kandah haong dhur mun klik PM 2.5, njauk cuk pataik pacang mbaok tuk tabiak truh sang saong siam di abih lac takik tabiak gah langiu. Bruk tachrauk nerak alam langik di Lào bhian rahtabiak meng bilan 3 tal bilan 4 yaok thun, lac tukvak salih bilan meng bilan thu tapa bilan hajan ngak ka langik pandiak bhang, langik tasik salih sarau kadau. 

Adit blaoh, Trung Quốc brei takik di abih 8 sruh kapal haoh par tal Campuchia piah ba 680 urang Trung Quốc pambuak tal bruk blei saleik me-in mbia saong pachot pagat angaok mạng mai veik taneh ia piah kaoh tui adat hukum. Đại sứ quán Trung Quốc di Campuchia jeng hu ndom lac, dom jabat pambuak tal di karja Trung Quốc saong Campuchia daok pambuak gauk peih ngak catang piah langyah tui adat hukum dom bruk cờ bạc – me-in mbia suan adat hukum saong bleik saleik pachot blah tapa mạng piah khik sron mbon ka pambuak bruk kinh tế, pablei salih, đầu tư saong du lịch di dua taneh ia.

Meng melam kabroi tal dah page harei ini, rilo mbang magei baoh taneh gam gam rahtabiak di huyện Hoa Liên, Đài Loan (Trung Quốc), mbang magei baoh taneh khang abih tagok tal 6,3 rahtabiak di dah page ini tui maong pak ini. Urak ini dom baoh sang di dalam huyện njauk bleng sa gah kayua mbang magei baoh taneh, min oh hu thei gar atau metai. Kanja huyện Hoa Liên jeng ieu kakei rahra daok dalam dom baoh sang bleng nan njauk tabiak gah langiu piah khik salamat. Tal maong 8 dah page ini, huyện Hoa Liên daok hu mboh dom mbang magei baoh taneh hu prein khang bier jang./.