Ngak bruk haong Mban tacei ba Pakat negar saong Mentri Quoc phong ka bruk ramik caga  peih bruk Pahadar  50 thun harei peih paha gah Meraong negar, yasa taneh ia (30/4/1975 - 30/4/2024), ong Nguyễn Văn Nên, Bí thư Thành ủy TPHCM mboh lac, bruk rah tabiak di harei 30/4/1975 lac sa dalam dom bruk pasang hadah hadai abih dalam sajarah dakrai khik caga taneh ia di bangsa drei. Meng nan yam tame jaman yasa, sron mbon, bebat tu do saong padang tagok CNXH. Khol drei caga pahadar 50 thun gam sap pagap yam tame jaman birau, jaman pok drei patagok di bangsa  piah brei mboh  50 thun tapa khol ngak hu hagait paje, hagait daok oh ka ngak hu. Yau nan ye yaok bruk ramik caga brei tani tanat, pambuak bruk, hu makna saong njauk labik dang khang kajap di nyu.

Festival bingu  Đà Lạt mbang ka 10 thun 2024 hu peih ngak di melam kabroi (5/12) di Ban Đà Lạt tỉnh Lâm Đồng. Ngan haong kadha “Bingu Đà Lạt - Ragam ralo sambo mau”, tapa Festival bingu Đà Lạt brei mboh ban Đà Lạt  lac ban Festival Bingu di Việt Nam, lac bruk nyaom pataom bui sambai di ban bhum ceik glaong la-ar, mekre, ban hadah krah  gah Alat ragam di UNESCO. Tui nan,  patui bruk iek praong meyaom dom siam gheih meng bingu jeng yau palei pala bingu; ba mbuan lagaih  ka gah ngak bingu  Đà Lạt hu pambak praong, trik tame  biak ralo jhuk pakhang bruk patagok kinh te - xa hoi di tỉnh Lâm Đồng.

Bilan hangin barak thun ini, dom baoh sang urang daok di labik glut jaleih  Cồn Nhàn di xã Đông Hải, huyện Duyên Hải, tỉnh Trà Vinh oh daok haduh hatai kayua hu labik daok birau. Danak dak  Panduan salih labik daok ka bhap bini drak samar kayua glut jaleih ar tasik Cồn Nhàn, palei Đông Thành saong palei Hồ Thùng, xã Đông Hải hu taneh praong 13.000m2 saong 51 takai sang. Labik daok birau hu buh jien tame ngak salah jalan mbak nao mai lagaih; ndien pandar saong gom truac hadah…Kuhria abih tih jien buh tame labaih 17 tỷ đồng meng kadung jien tỉnh.

Yai nduac ngak pahala online ngan haong kadha “Pambuak dua gah bui sambai” kayua Kadung jien Tâm Tài Việt saong Vietlott peih ngak dalam bilan 12 ni,  piah jak ba urang rik jien tame padang ngak tatua kajap, salih ka tatua  jaoh laman lamuac mbuan rah tabiak bala di bhum  Tây Nam Bộ. Danak dak ini ba tabiak  kham jak ba hu 2 tỷ đồng piah padang ngak dom tatua khang kajap, salamat ka mikva.

Tukvak jiak ini, di tỉnh Bạc Liêu mboh hu ralo jalan pachot pagat meblah mek drap ar birau. Dom urang payua tin nhan tal dom rajakar ngak praong gham ba thaot bingu, video  ngak jhak  tal angan je bruk ngak di urang; meyah oh khin ye brei payua jien tame  ka kol nyu…Yau nan ye, jabat chuc nang caong khin dom jabat, đơn vị saong bhap bini brei ngak njauk jalan diukrai pagheih; brei sahaneng caga  juai caik kol mbleik saleik nyu pagat, pandar kong nghe glong piah meblah drap ar.

Jabat Pasang iek Negar Hàn Quốc khan lac canh sat taneh ia ini tame pasang iek Tổng thống Yoon Suk Yeol ka bruk ba tabiak hukum thiet quan luat hadei tuk gah caga veik payua harak pathau meriak cagar veik ong. Harei 3/12, Tổng thống Yoon Suk Yeol ba tabiak hukum thiet quan luat, ndem lac mesruh pacang veik “ dom urang tangin takai di Triều Tiên” yau nan min adat hukum nan hu tah klak  hadei 6 mon. Harei 4/12, gah cagar veik ndem puac dius di ong Yoon ngak suan hukum negar kayua oh hu bruk hagait praong piah ba tabiak hukum bol bala yau nan.

Indonesia si patabiak hukum pakauk dam dara  pandar MXH, hadei mboh huac dak harei dak parilo kanjiak jhak kayua  kong nghe ini tal prein yawa, akaok sahaneng di uranaih. Thun 2023, hu jaik 35% uranaih  di taneh ia ini gaok kan kandah kayua ruak jalan akaok sahaneng. Dom bruk nan ngak jhak rilo jang tal uranaih tapa  dom mac jamraih  ky thuat saong internet, yau bruk chap uranaih ngak tui saong domn asar kadha kajhak angaok MXH.

Gah Pato megru, Khoa học saong Ilamo  Liên hợp quốc (UNESCO) hu brei angan ka bruk riak alak meng sake di Nhat Ban tame sarak Drap ar Ilamo  phi vat the  di dunya. Ilamo riak alak sake hu meng yaok ribau thun, pandar birau koji piah tagok tapaiy, hu labik dang biak praong dalam ilamo di “taneh ia Harei tagok”. Bruk riak alak  sake  abih ralo adit saong bhian pagap haong bruk ngak mbia./.