

Meng harei 1 bilan 7 anak tal, Pasang iek taong abih gah ngak nong, palei pala thun 2025 meda hu peih ngak. Mbang ini brei pasang iek dom baoh sang ngak mbang, dom baoh sang ngak pah, dom labik ngak bruk, gah ngak mbang pablei salih saong hop tac xa jeng yau rahra diuk rai di palei pala oh hu mbaok tame ngak bruk tapak. Pasang iek taong abih gah ngak nong, palei pala mbang ini biak hu makna piah duh ka Danak dak pakat negar saong yam tame dunya dalam gah ngak nong, palei pala.
Hoi dong bhap bini tinh Soc Trang mbang X, vaktu 2021-2026 pasang iek brei khan tapa rilo harak gal, du thao sarak hu makna praong dalam bruk patagok kinh te-xa hoi, bruk ngak brei patrun kathaot di bol bhap bangsa takik. Dalam nan, thun ini gilang pariak karja parabha peih ngak Danak dak pakat negar patagok kinh te - xa hoi bhum urang bangsa takik di tinh labaih 114 ti dong. Ngan haong bruk pakacah patagok kinh te; patrun kathaot samar, khang kajap, dui jaik sumu gauk dalam raidiuk, jien mek tame di bhum urang bangsa takik.
Ngan haong hatai kham merat glaong, hadei jaik 3 bilan peih ngak, tinh Hau Giang hu salah blaoh danak dak brei oh daok baoh sang taik tahak samar drah jang bruk kuhria ba tabiak dahlau, ngan haong 1.479 baoh sang, taong abih jien buh tabiak jaik 63 ty dong. Abih di nyu nan lac, meng hu ngak siam bruk pathau khan, Danak dak hu bruk pajum tangin, njauk hatai di rahra, bruk daong di rilo kapul, manuac urang. Yaok baoh sang hu padang, pasiam mek hu tanut “3 khang” piah khik kajap karo salamat, njauk haong bruk daok dang mbang ngui di rahra hu truac tagok hatai je piah yaok baoh sang patui veik uak drei tagok, tani tanat raidiuk.
Tinh An Giang ngak brei salah bruk oh daok baoh sang taik tahak ka dom urang hu ngak bruk daong cach mang saong daok kham merat tal panuac bilan 6 anak tal ngak brei salah danak dak oh daok baoh sang taik tahal dalam tinh. Mbiah tal ini, tinh hu ngak salah blaoh, ba tame pandar 2.482 baoh sang; kuhria abih tih jien jak ba meng rilo gah hu 215 ti dong. An Giang hu 5 dalam 11 huyen, ban sit, ban raya hu ngak salah bruk ngak brei oh daok baoh sang taik tahak.
Tinh Tien Giang hu rilo tapol menuk ada raong praong abih di bhum Taneran kraong Cuu Long ngan haong 17 trieu drei. Bruk raong glang ini ngak tabiak bruk ngak mbang duah jien, daong rilo urang ngak nong tani tanat saong uak drei tagokdalam raidiuk. Min, bruk mbuan ngak njom nerak kayua dom labik raong glang lac sa asal kadha njauk caik hatai sangka. Mbuan mboh abih lac di huyen Chợ Gạo hu labaih 5 trieu drei menuk ada, dom baoh sang raong glang tui jalan ta-eng ngak, oh ka hu khik kajap ka bruk karo salamat sinh hoc, ngak mbau bruk njom mbak tabiak labik daok rahra, ngak kan kandah tal prein yava di rahra saong mbuan ngak njom mbak dom janih jit ruak bhian gaok.
Bol lin Pakistan njauk gauk ka bruk duia tah tukvak padeih cuh haong An Do mbiah tal harei 18/5 anak tal. Dahlau di nan, ginum biai padeih cuh di taong abih labik hu njauk gauk di harei 10 bilan 5. An Do hu peih gilac 32 mblang kapal haok dalam tuk nan Pakistan jeng khan brei peih veik taong labik ahaok par angaok langik. Bruk mesruh gauk di An Do - Pakistan kan kandah tagok dalam dom adit jaik ini kuhria meng tuk patuh phao di harei 22 bilan 4 di Pahalgam, di Kashmir kayua Ấn Độ khik iek, ngak 26 tuai damuai metai.
Bi bahrau ba tabiak bruk pakauk uranaih umo ala 15 thun pandar mang xa hoi. Bruk ini di Bi hu ngak tui negar Prang, negar daok jhul tagok sa hukum pakat chau Au piah pacang khik urang bahrau jeng dam jeng dara di angaok labik mang. Tui adat hukum pacang khik du lieu di Lien minh chau Au, dom negar dalam kapul hu brei ba tabiak thun umo biar abih meng 13 tal 16 thun piah urang bahrau jeng dam jeng dara meda padang tai khoan mang xa hoi bo oh khin bruk mbaoh tangin di amaik ame. Urak ini Bi brei ka uraniah umo 13 thun.
Meng akaok thun mbiah tal ini urang ruak patuk ho gà di Nhat Ban tagok tal jaik 12 ribau mbang. Dalam thun 2024 hu labaih 4.000 mbang, mboh tagok glong dalam thun. Sa dalam dom bruk njauk caik hatai kuhria hu dom urang ilamo y te tacei tabiak bruk njom mbak prang di vi khuan pacang hu jru khang sinh, ba tal bruk taong ruak gaok kan kandah jang. Mentri y te Nhat Ban daok iew dom amaik ame brei anek kuman klauk jru vaccine pacang ruak patuk ho ga tuk anek drei hu ginup 2 bilan - tukvak ginup piah klauk jru mbang akok meti tui jalan pacang ruak pakat negar./.
Viết bình luận