Di var taom mbaok 250 urang lambaok ka urang ngak bruk daong taneh ia dahlau diah, urang naih gheih dalam negar peih ngak di page ini pak Ha Noi, Tong bi thu Tô Lâm khan lac Ndang saong Karja drei tuk halei jeng sangka tacei ba, pato jalan ngak siam bruk bayar dhar phol ka urang thuong binh, urang ngak bruk daong taneh ia. Tong Bi thu caong khin dom Mentri, karja dom bhum palei peih ngak sumu dom harak gal hanh chinh dalam bruk pasang iek, taduan urang ngak bruk daong taneh ia dahlau diah, bruk bayar jien daong ka dom urang nan hu lagaih, siam tuk peih bruk ngak tui karja dua pakat. Jhul pakhang bruk duah, pataom atau talang liet si, peih praong, jhul pakhang pambuak bruk ginum biai haong dunya, pabak khaw tin liet si, kubo kanum liet si.

Bol lin Bien phong Ban raya HCM birau alin “ Sang anit ranam” ka ong Trần Văn Hùng, anek di liet si Trần Văn Bích urak ini daok di To bhap bini ka 5, Khu pho 2, phuong Rạch Dừa. Baoh sang praong 60 m2, hu padang ngak khang kajap, praong laneng lanoi, jien buh tame padang sang abih 110 trieu dong. Bruk alin sang daok oh lac drap ar bo lac hatai anit ranam, bruk pahadar dhar phol baoh sang urang dalam sarak karja, urang ngak bruk cach mang dahlau diah. Dalam dom bruk ngak pamong tal pahadar 78 thun Harei Thuong binh - Liet si, 80 thun Cach mang Bilan 8 saong Harei negar 2/9. 

UB bhap bini tinh An Giang birau pok tagok Thu tuong Rajaei pasang iek, pabak dua danak dak jalan mbak praong piah duh ka Nyaom biai APEC 2027, tui kuhria peih ngak di Dac khu Phu Quoc. Danak ka sa lac jalan tabak tapen tasik gah Timur kaoh pulao Phu Quoc, atah 44 km peih praong pambuak jalan tapen tasik. Danak dak ka dua lac jalan tapen tasik pambuak pabah tasik An Thới, atah 2,7 km piah patagok logistics piah bruk nao mai hu lagaih di dom labik dalam luac tukvak peih ngak nyaom biai APEC.

UBND TPHCM likau brei angan ka labaih 50 jalan di do phuong, xã birau, dalam nan hu labaih 40 jalan mek angan dom urang kumei anh hung. Dahlau di nan, UBND TPHCM brei duah thau tapa dom jabat chuyen mon, dom kapol dang, karja, MTTQ Viet Nam, kapol nyaom, dom urang ilamo saong bhap bini. Meng nan hoi dong tacei pato hu ginum biai saong njauk gauk ba tabiak bruk brei angan saong ramik pasiam. Mentri Ilamo, The thao saong Yulit  jeng hu harak njauk hatai haong bruk brei angan jalan di TPHCM.

Hadei rilo bilan kadun likuh hadei baoh thanh long saong patei, baoh durian hu labik dang kaok mek jien tame meng bruk pablei tabiak negar langiu dom janih baoh kayau. Kuhria rah tapa 7 bilan akaok thun, bruk pablei njam patam baoh kayau tabiak negar langiu mek hu 3 ti 800 trieu dola My, bruk patagok glong nan mai meng baoh durian kayua hu lang talaih dom tavak tavaiy dalam bruk pablei tabiak negar langiu. Dalam 6 bilan akaok thun, Viet Nam pablei tabiak negar langiu hu 5.200 mbang durian that, kuhria abih tih hu jaik 130 ribau tấn.

Campuchia brei cadu trun bruk pambuak talei rohim haong Thai Lan saong ba dom urang jakar ngoai giao Campuchia di Bangkok mai veik negar. Gam haong nan eiw dom urang jakar ngoai giao Thai Lan di taneh ini nao palei negar. Panuac nan Campuchia ba tabiak hadei tuk Thai Lan eiw dom Dai su di drei di Campuchia ka taneh ia saong patrauk Đại sứ Campuchia di Thai Lan, kayua patuh min di melam 23 bilan 7 di labik tapen negar dua taneh ia ngak sa urang lin Thai Lan njauk rambuac.

Ho chieu Afghanistan lac takik hu iek praong abih di dunya, tok hu mien thi thuc tame 26 taneh ia. Bruk kurang atah nan brei mboh dom bruk kan palih ruah di urang Afghanistan tuk nao negar langiu. Bruk nan brei mboh bruk cakak di dunya dak harei dak kan kandah di taneh ia Nam Á ini. Dalam tuk nan, Singapore dang kaok bruk rahra hu mien thi thuc tal 195 taneh ia langiu. Nhat Ban -Japon dang ka dua hu 193 taneh ia langiu.

Dom taneh ia chau Au, dalam nan hu Prang, daok dang anak dom mbang langik pandiak catang me-om tagok ralo labik. Njauk caik hatai, langik pandiak catang di bilan 6 meng blaoh ngak ia khan tuyet di talei ceik Alps ralai samar, ngak kuhrang ia di dom labik padeih takai di ceik. Dahlau di ini, bruk ia khan ralai bhian rah tabiak di puac bilan 7 atau akaok bilan 8 min kayua bruk BĐKH yau nan ye ia khan ralai aval jang jaik sa bilan dut saong bhian thun./.